भांगरभूंय | प्रतिनिधी
बर्गेन, खबरां संस्था : प्रदुशण उणें करपाक नॉर्वेन व्हड पावलां उबारल्यांत. कार मुक्त फुडाराचें ध्येय साध्य करपाक संवसारांतलो सगळ्यांत लांब ‘सायकल बोगदो’ नॉर्वेच्या दुसऱ्या व्हडल्या शारांतल्या बर्गेनांतल्या एका दोंगरांत तयार केला. सुमार तीन किलोमिटराच्या बोगद्यांतल्यान हेर खंयचीच वाहनां वचपाक शकनात. हांगा फकत सायकल चलोवपी आनी चलत वचप्यांक येवपाची परवानगी आसा.
लोवास्टकन दोंगरांतल्यान कापिल्ल्या ह्या बोगद्याक ‘फिलिंग्सडाल्सटनेलेन बोगदो’ अशें म्हण्टात. फ्लिंग्सडेलन आनी मिंडेमिरेन वाठारांक तो जोडटा. 2019 वर्सा बोगद्याचें बांदकाम सुरू जालें आनी चार वर्सांत तें पुराय जालें. तो बांदपाक 238 कोटी रुपया खर्च केल्यात. सायकलीन हो बोगदो हुंपपाक सुमार 10 मिनटां आनी चलत वचपाक 40 मिनटां लागतात. ह्या बोगद्यांत सायकल चलोवप्यां खातीर 3.5 मीटर रुंदायेची लेन आसा, जाल्यार चलप्यां खातीर 2.5 मीटर रुंदायेची वेगळी लेन आसा. लोकांचो प्रवास याद उरपा सारको जावचो म्हूण बोगद्यांत सजावट केल्या.
शाराच्या सायकल धोरणाचेर काम करपी अनार ग्रेग म्हणटा, सध्या शारांत सायकल चलोवप्यांचो वाटो 4% आसा. 2030 मेरेन तो 10 टक्क्यां मेरेन वाडपाचो आसा. सध्या दर दिसा 650 सायकल चलोवपी हांगा येतात. दर दिसा 2600 सायकल चलोवपी बोगद्यांतल्यान वतले असो अदमास आसा.
बर्गेन थळावे प्रशासन अधिकारी फाटल्या दोन दशकां सावन गाडयेचो वापर उणो करपा खातीर वावुरतात. हे खातीर शारांत दोन ल्हान गाडयोय सुरू केल्यो. येरादारी 30 टक्क्यांनी उणी करपाचो तांचो हेत आसा. हें ध्येय साध्य करपाक सायकल बोगदो योगदान दितलो अशें मानतात. पेट्रोल आनी डिझेल गाडयां परस इलेक्ट्रीक वाहनांचो प्रचार करपाची येवजण नॉर्वे सरकारान आंखल्या. ताचे परिणामूय दिसतात. नॉर्वेंत खपपी पांच गाडयां मदल्यो चार गाडयो इलेक्ट्रीक आसात.
लोकांक मार्गदर्शन करपा खातीर बोगद्यांत रंगीत दिवे बसयल्यात. सन डायलाच्या संकल्पनेचेर ताची रचना आकर्शक आसा. सकाळीं 5:30 ते रातीं 11:30 मेरेन हो बोगदो उक्तो आसतलो. थंड हवामानांत सायकल चलयतना लोकांक कसलोच त्रास जावचो न्हय म्हणून बोगद्याचें तापमान 7 अंश सेल्सियस दवरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
