संवसारांतले सगळ्यांत गरीब देश

भांगरभूंय | प्रतिनिधी

नवी दिल्ली, खबरां संस्था ः संवसारीक पांवड्यार कांय देशांक तांच्या दर मनशाच्या उत्पन्नाप्रमाण संवसारांतले सगळ्यांत गिरेस्त देश वा संवसारांतले सगळ्यांत गरीब देश म्हूण वळखतात. गरीब पांवड्यावेल्या देशांक चड करून राजकीय, अस्थिरताय आनी संघर्श हांचो सामनो करचो पडटा. जाका लागून तांच्या देशाचे उदरगतीक आडमेळीं येतात. आंतरराष्ट्रीय नाणें निधीच्या अहवाला प्रमाण 21 फेब्रुवारी 2024 मेरेन संवसारांतले 10 गरीब देश थारायल्यात.
दर मनशाच्या उत्पन्नाचे नदरेन संवसारांतले सगळ्यांत गरीब देश

१. दक्षीण सुदान
उदेंत आफ्रिकेंतलो दक्षीण सुदान हो संवसारांतलो सगळ्यांत गरीब देश. आंतरराष्ट्रीय नाणें निधीच्या प्रमाण दक्षीण सुदान हो संवसारांतलो सगळ्यांत गरीब देश आसून 2024 वर्सा दर मनशाक मेळपी येणावळ 455.157 डॉलर आसा. दक्षीण सुदानाक 2011 वर्सा स्वातंत्र्य मेळ्ळें आनी संवसारांतलो सगळ्यांत तरणाटो देश जालो. पूण सध्या तांकां व्हड अर्थीक अडचणी येतात. दक्षीण सुदानांत अर्थीक अस्थिरताय, समाजीक अस्थिरताय आनी गरिबी वाडत आसा.

२. बुरुंडी
उदेंत आफ्रिकेंतल्या बुरुंडी देशाचोय हे वळेरेंत आस्पाव जाता. आंतरराश्ट्रीय नाणें निधीच्या म्हणण्या प्रमाण बुरुंडी हो संवसारांतलो दुसरो सगळ्यांत गरीब देश आसून 2024 वर्सा दर मनशाक 915,879 डॉलर उत्पन्न मेळ्ळें. बुरुंडी हो उदेंत आफ्रिकेंतलो एक ल्हान देश जाका लोकसंख्येचे वाडीक लागून समाजीक-आर्थीक नदरेन खर आव्हानांक तोंड दिवचें पडटा.

३. सेंट्रल आफ्रिकन रिपब्लिक
सेंट्रल आफ्रिकन रिपब्लिक हो संवसारांतलो तिसरो गरीब देश. आंतरराश्ट्रीय नाणें निधीच्या म्हणण्या प्रमाण सेंट्रल आफ्रिकन रिपब्लिक देशांचे दर मनशाचें उत्पन्न 1,222.641 डॉलर आसा.

४. डेमोक्रॅटिक रिपब्लिक ऑफ काँगो
डेमोक्रॅटिक रिपब्लिक ऑफ काँगोहो संवसारांतलो चवथो गरीब देश. आंतरराश्ट्रीय नाणें निधीच्या म्हणण्या प्रमाण 2024 वर्साच्या अदमासा प्रमाण देशाची दर मनशाक मेळपी येणावळ 1,552,343 डॉलर आसा. सैमीक संपत्ती भरपूर आसून लेगीत देशांत भ्रश्टाचार आनी अकार्यक्षम प्रशासनाक लागून अर्थीक संकश्टाक तोंड दिवचें पडटा.

५. नायजेर
अस्तंत आफ्रिकेंतलो नायजेर देश संवसारांतल्या गरीब देशांमदीं पांचव्या क्रमांकाचेर आसा. आंतरराश्ट्रीय नाणें निधीच्या म्हणण्या प्रमाण 2024 वर्साच्या अदमासा प्रमाण निजेर देशाची दर मनशाक मेळपी येणावळ सुमार 1,674.659 डॉलर आसा. शेतकी उत्पादनाचो उणाव आनी मुळाव्या साधनसुविधांचो उणाव हीं ह्या देशाचीं मुखेल समस्या.

६. मोझांबिक
आग्नेय आफ्रिकेंतलो मोझांबीक हो देश संवसारांतल्या गरीब देशांमदीं सव्या क्रमांकाचेर आसा. आंतरराश्ट्रीय नाणें निधीच्या म्हणण्या प्रमाण 2024 वर्साच्या अदमासा प्रमाण मोझांबीकाचें दर मनशाचें उत्पन्न 1,648.555 डॉलर आसा. देशांत अर्थीक अस्थिरताय आनी सैमीक संकश्टांची समस्या चालूच आसा.

७. मलावी
संवसारांतल्या सगळ्यांत गरीब देशांच्या वळेरेंत मलावीचो सातवो क्रमांक आसा. आंतरराश्ट्रीय नाणें निधीच्या म्हणण्या प्रमाण 2024 वर्सा मलावीचें दर मनशाचें उत्पन्न सुमार 1,711.837 डॉलर आसा. अर्थीक सुदारणां बरींच चालीक लायिल्लीं आसून लेगीत मलावी हो संवसारांतलो एक गरीब देश उरला. शेतकी उत्पादन हो देशाचो मुखेल उद्देग आसून 80 टक्के लोकसंख्या ताचेर आदारून आसा. हवामानांतल्या बदलाचो ह्या देशाचेर चड परिणाम जाता.

८. लायबेरिया
लायबेरिया हो संवसारांतलो आठवो गरीब देश. आंतरराश्ट्रीय नाणें निधीच्या म्हणण्या प्रमाण 2024 वर्सा देशाची दर मनशाक मेळपी येणावळ 1,882.432 डॉलर आशिल्ली. स्थलांतर, हिंसाचार आनी इबोला सारकिल्या दुयेंसांच्या प्रकोपाक लागून देश गरिबींत बुडला असो निश्कर्श काडटात.

९. मादागास्कर
आंतरराश्ट्रीय नाणें निधीच्या म्हणण्या प्रमाण 2023 वर्साच्या आंकडेवारी प्रमाण 2023 वर्सा मादागास्कर संवसारांतलो 10वो गरीब देश आशिल्लो आनी 2024 वर्सा तो 9वें सुवातेर पावलो. आंतरराश्ट्रीय नाणें निधीच्या अदमासा प्रमाण 2024 वर्सा मादागास्कराचें दर मनशाचें उत्पन्न सुमार 1,979.173 डॉलर आशिल्लें.

१०. येमेन
आंतरराश्ट्रीय नाणें निधीच्या म्हणण्या 2023 वर्साच्या अहवाला प्रमाण संवसारांतल्या गरीब देशांच्या वळेरेंत येमेन 11वे सुवातेर आशिल्लो आतां 2024 वर्साचे वळेरेंत 10वे सुवातेर आसा. 2024 वर्सा येमेनाचें दर मनशाचें उत्पन्न 1,996.475 डॉलर इतले आसा. इतिहासीक नदरेन येमेन हो मध्य उदेंत आनी उत्तर आफ्रिकेंतल्या सगळ्यांत गरीब देशांतलो एक देश अशें संवसारीक बँकेच्या अहवालांतल्यान दिसून येता.