भांगरभूंय | प्रतिनिधी
बिजींग, खबरां संस्था : प्रवास करपा खातीर खंयसरूय भायर सरल्यार रस्ते मेकळे जाय. अश्या रस्त्यांचेर प्रवासूय करप सुसेगादान जाता. फाटल्या कांय वर्सां सावन वाहनांचोय आंकडो बरोच वाडला. हाका लागून येरादारी कोयंडीची समस्या निर्माण जातना पळोवपाक मेळटा. ही येरादारी कोयंडीची समस्या भारतांतूच न्हय तर पुराय संवसारार आसा. खुबशे जाण ह्या जावन वाहनांचे कोयंडीत सांपडटात. एका वरा खातीर ना जाल्यार चडांत चड दोन वरां खातीर. मात वट्ट १२ दीस चलपी येरादारी कोयंडी तुमी केन्ना पळयल्या?
संवसारांतली सगळ्यांत व्हड येरादारी कोयंडी
चिनांतल्या बिजींग हांगा आशिल्ल्या बिजिंग-तिबेट एक्सप्रेस वे १०१ चेर सुमार १०० किमी आनी ताचे परसूय चड अंतराचेर वाहनांच्यो बरयोच व्हड रांको लागिल्ल्यो. देखून ही संवसारांतली सगळ्यांत व्हड येरादारी कोयंडी अशें सांगलां. १४ ऑगस्ट २०१०त ह्या म्हामार्गाचेर हें चित्र पळोवपाक मेळिल्लें. १२ दीस मेरेन हांगा येरादारी आडकून उरिल्ली.
इतली येरादारी कोयंडी कित्याक जाल्ली?
बिजींगांत आशिल्ल्या तिबेट एक्स्प्रेस वे हांगा रस्तो दुरुस्तीचें काम सुरू आशिल्लें. जाका लागून येरादारी एकाच मार्गान वळयल्ली. जीं जड वाहनां मंगोलियाच्यान बीजिंग मेरेन बांदकामाचें सामान व्हरतालीं ताका लागून बीजिंग भायर येवपाचे मार्ग बंद जाल्ले. पळयतां पळयतां ही येरादारी कोयंडी बरीच वाडली. हांगा संवसारांतली सगळ्यांत व्हडली येरादारी कोयंडी पळोवपाक मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
