संवसारांतली सगळ्यांत गिड्डी बायल आनी सगळ्यांत उंच मनीस
भांगरभूंय | प्रतिनिधी
वॉशिंग्टन, खबरां संस्था ः संवसारांतलो सगळ्यांत उंच मनीस तुर्कस्तानचो सुलतान कोसेन (41) हांणी मंगळारा संवसारांतली सगळ्यांत गिड्डी (मोटवी) बायल ज्योती अमागे (30) हिची भेट घेतली. सुलतानाची उंचाय 8 फूट 2.8 इंच आसा. आनी ज्योती 2 फूट 7 इंच इतली गिड्डी आसा.
दोगांय मदली ही दुसरी भेट कॅलिफोर्नियांत जाली. हाचे आदीं 2018 त इजिप्तांत दोगांयची भेट जाल्ली. दोगांयचीं नांवां गिनीज बुक ऑफ वर्ल्ड रेकॉर्डांत नोंद जाल्यात.
‘द इंडिपेंडंट’ च्या अहवाला प्रमाण 2009 त सुलतानाचें नांव संवसारांतलो सगळ्यांत उंच मनीस म्हणून गिनीज बुक ऑफ वर्ल्ड रेकॉर्डांत नोंद केलें. तेन्नासावन तांची उंचाय 2 इंचांनी वाडल्या. सुलतान हो वेवसायान शेतकार. तांकां तुर्की भास सोडून हेर खंयचीच भास येना. देखून तांकां आपलो संदेश संवसारांतल्या लोकां मेरेन पावोवपा खातीर अणकाराची गरज लागता. जाल्यार ज्योतीक हिंदी, मराठी आनी थोडी इंग्लीश भास कळटा.
सुलतानाच्या मनगट आनी मदल्या बोटाचें अंतर 11.22 इंच आसा. संवसारांतल्या सगळ्यांत व्हडल्या तळहाताचो मनीस म्हणूनय सुलतानचें नांव नोंद आसा. हाचेभायर तांचीं पांयाचीं बोटांय सगळ्यांत व्हड आसात. ताची लांबाय १ फूट २ इंच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
