संवसारांतली पयली एआय मॉडेल्स सोबीतकाय सर्त, भारताची एआय झाराचो टॉप 10 त आस्पाव
भांगरभूंय | प्रतिनिधी
खबरां संस्था ः मिस वर्ल्ड आनी मिस युनिव्हर्स ह्या सारक्या सोबीतकाय सर्ती उपरांत आतां संवसारांतली पयली एआय सोबीतकाय सर्त जातली. फोर्ब्साच्या खबरे प्रमाण, एआय मॉडेलांतली ही सर्त ब्रिटनची फॅनव्ह्यू कंपनी वर्ल्ड एआय क्रिएटर अवॉर्ड्स (डब्ल्यूएआयसीए) हांच्या सहकार्यान घडोवन हाडटा.
2 एआय परिक्षकां बराबर जनसंपर्क सल्लागार अँड्र्यू ब्लॉच आनी वेवसायीक सॅली ॲन-फॉसेट हे सर्तींत परीक्षक म्हूण हजर आसतली. सर्तीच्या पयल्या पावड्यांर वांटेकार जाल्ल्या 1500 मदल्या पयल्या 10 एआय मॉडेलांची निवड केल्या. आतां पयल्या 3 मॉडेलांक पुरस्कार दितले.
10.84 लाख रुपया इनाम भायर मिस एआय जाल्ल्या मॉडेलाक जनसंपर्का खातीर 4.17 लाख रुपया दितले. भारताची एआय मॉडेल झारा शतावरीय हे सर्तींत पयल्या 10 वांटेकारां मदीं आसा. मोबायल जायरात एजन्सीचे सहसंस्थापक राहुल चौधरी हांणी झारा एआय तयार केल्या.
झारा ही भलायकी आनी फिटनेस प्रभावी आसा. तशेंच तिचें सोशल मिडिया पेज आसा, जंय ती भलायकी आनी फॅशन संबंदीत टिप्स शेअर करता. इंस्टाग्रामाचेर तिचें 8 हजारां परस चड फॉलोअर्स आसात. झारा आपल्या चडशा व्हिडियोंनी योगा वांगडाच निरोगी जेवणाच्यो गजाली सांगता. झारा ही ब्युटी एजंटांत आशियांतल्या 2 वेंचून काडिल्ल्या मॉडेलां मदली एक आसा.
एआय झारा ही पीएमएच बायोकेअरची ब्रँड अँबॅसेडर
झारा जून 2023 सावन पीएमएच बायोकेअराची ब्रँड अँबॅसेडर आसा. शतावरी ऑगस्ट 2023 त डिजीमोजो ई-सर्व्हिसेस एलएलपींत (DigiMojo e-Services LLP) इन्फ्लुएंसर मार्केटिंग टॅलेंट मॅनेजर म्हूण कामाक लागल्या. ती युपी नोयडा शारांत रावपी.
शतावरीच्या संकेतथळा प्रमाण भलायकी, करिअर उदरगत आनी फॅशन हांचे विशीं टिप्स शेअर करप हें तिचें ध्येय. मार्गदर्शना वरवीं व्यक्तींक तांचे सगळ्यांत बरें जिवीत जगपाक सशक्त करप. सैमीक भारतीय देखावो आनी मनशाच्या स्पर्शान झारा आपल्या अनुयायां कडेन खोलायेन जोडपाचो आनी दर दिसा तांकां उर्बा दिवपाचो हेत दवरता.
भारता भायर हेर देशांतल्या एआय मॉडेलांत रोमानियेची अयाना रेनबो, फ्रांसाची ॲनी केर्डी, मोरोक्कोची केन्झा ल्याली आनी ब्राझीलची एलिया लोव हांचो आस्पाव जाता. हाचे भायर पोर्तुगाल, तुर्कस्तान आनी बांगलादेशांतल्या मॉडेलांचीय निवड केल्या.
हे सगळे एआय मॉडेल खंयच्या तरी मळार जागृताय पातळावपाचें काम करतात. खबरां प्रमाण, मिस एआय तिची सोबीतकाय, तंत्रगिन्यान आनी सोशल मिडियाचेर आशिल्ल्या प्रभावाचेर आदारून सोबीतकाय सर्तींत इनाम जोडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
