भांगरभूंय | प्रतिनिधी
नवी दिल्ली, खबरां संस्थाः संवसारभरांतल्या जायत्या देशांच्या बंदखणींत सध्या 23 हजारां परस चड पाकिस्तानी नागरिक कैद आसात. तांकां बलात्कार, खून, ड्रग्स तस्करी अशा गंभीर गुन्यांवांनी दोशी थारायल्यात.
पाकिस्तानी ‘डॉन’ दिसाळ्यांतल्या खबरां प्रमाण, परराश्ट्र मंत्रालयान संसदेंत ही म्हायती दिली. वट्ट 23456 पाकिस्तानी नागरिक परदेशी बंदखणींत आसात अशें मंत्रालयान आपल्या बरयल्ल्या जापांत सांगलां. तातूंतले सगळ्यांत चड साउदी अरेबियांत 12,156 लोक आसात. उपरांत संयुक्त अरब अमिराती (UAE) दुसरे सुवातेर आसा, जंय 5292 पाकिस्तानी बंदखणींत ख्यास्त भोगतात.
चीनाच्या बंदखणींत 400 पाकिस्तानी आसात. जायत्या जाणांचेर ड्रग्स तस्करी, बलात्कार, लुटमार, खून अशा गंभीर गुन्यांवांचे आरोप आसात. डॉनच्या खबरां प्रमाण बहरीनांत ताब्यांत घेतिल्ल्या 450 पाकिस्तानी नागरिकांक ड्रग्स तस्करी, ड्रग्स बाळगप आनी फटवणूक ह्या आरोपांत गुन्यांवकार थारायल्यात. मजगतीं, अफगाणिस्तानांत 88 पाकिस्तानी नागरिकांक ओव्हरस्टे आनी सुरक्षा संबंदीत गुन्यांवां खातीर दोशी थारायल्यात.
इस्लामी देशांनीय पाकिस्तानी नागरिकांचो रेकॉर्ड वायट आसा. वेगवेगळ्या गुन्यांवांक लागून कतारांत 338 पाकिस्तानी, ओमानांत 309 आनी मलेशियांत 255 जाण ख्यास्त भोगतात.
युरोपीय देशांनीय पाकिस्तानी गुन्यांवकारांची संख्या वाडटा…
युरोपांतल्या जायत्या देशांनीय पाकिस्तानी गुन्यांवकारांची संख्या वाडत आसा. फ्रांसांत 168 आनी जर्मनींत 94 पाकिस्तानी बंदखणींत आसात. ऑस्ट्रियांतय पाकिस्तानी लोकांक बेकायदेशीर स्थलांतर, मनीस आनी ड्रग्स तस्करी, खून आनी लैंगीक अत्याचार अशा गुन्यांवांनी दोशी थारायल्यात. नॉर्वेंत 3, फिनलंडांत 2, कॅनडांत 9 आनी डेन्मार्कांत 27 पाकिस्तानी नागरिकांक दोशी थारायल्यात.
2022 वर्सा एक अहवाल जाहीर जालो. 1997 ते 2013 ह्या काळांत इंग्लंडांतल्या रॉदरहॅम, कॉर्नवाल, डर्बीशायर, रोचडेल आनी ब्रिस्टल शारांनी उण्यांत उणी 1,400 अल्पवयीन चलयो लैंगीक अत्याचाराचे बळी पडल्यात अशें अहवालांत सांगलां. हातूंत चडशे आरोपी पाकिस्तानी मूळचे आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
