भांगरभूंय | प्रतिनिधी
जीत आरोलकार : तुयेंच्या लोकांनी घेतली भेट
भांगरभूंय । प्रतिनिधी
पेडणें : रस्त्याचे कुशीक स्वताचे जमनीर आशिल्ल्या बांदकामाक कोणूच हात लावचो ना. रस्त्या खातीर जी जमीन संपादीत केल्या आनी ते जमनीर जर बांदकामां केल्लीं आसत जाल्यार मात तांचेर कारवाय जातली, अशें आमदार जीत आरोलकार हांणी सांगलें.
रस्त्याचे कुशीक जीं बेकायदो बांदकामां आसात ताचेर सरकारान कारवाय करची, असो आदेश उच्च न्यायालयान दिला. ते उपरांत पंचायतींनी बेकायदो बांदकामांचीं मोजमापां घेवन संबंदितांक नोटिसो धाडपाचें सत्र सुरू केलां. हे खातीर रस्त्या कुशीक बांदकामां केल्ल्या तुयेंच्या लोकांनी थळावे आमदार जीत आरोलकार हांची भेट घेवन तांच्या बांदकामां अभय दिवपाची मागणी केली. ह्या वेळार आरोलकार तांचे कडेन उलयताले.
ह्या वेळार तुयेंचे उपसरपंच मनोहर पेडणेंकार, आदली सरपंच तशेंच सध्याची पंच सुलक्षा नायक, आदले उपसरपंच आनंद साळगांवकार, पंच साळगांवकार, आदले सरपंच उल्हास नायक, दयानंद मांद्रेंकार आनी हेर लोक हाजीर आशिल्ले. ज्या वेळार रस्त्या खातीर सरकार जमीन संपादीत करता आनी ती जमीन भौशीक बांददाम खातें रस्तो विभागा कडेन दिता, त्या वेळार रस्तो विभाग कितें करता, असो प्रस्न पत्रकारांनी आमदार आरोलकार हांकां विचारलो. जाप दितना आरोलकार हांणी सांगलें, जमीन संपादनाची प्रक्रिया पुराय जाले उपरांत ती रस्तो विभागाचे सुवादीन दितात. आपली जमीन सुरक्षीत दवरचे खातीर जर एकाद्या वेळार ताचेर कोण बांदकाम करता जाल्यार तें आडावपाची प्रक्रिया रस्तो विभागान करची, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
