भांगरभूंय | प्रतिनिधी
पणजी : नामनेचे बांसरी आनी संतूर वादक नरेश मडगांवकार (५१) हांकां मडगांवां एके कार्यावळी मजगतीं काळजाच्या आताकान मरण आयलें. तांच्या मरणान गोंयच्या संगीत, कला मळार दुख्ख पातळ्ळां. संतूर वादनांत विशेश पदवी घेतिल्ले नरेश हे मुंबयचे वादक पं. सतीश व्यास हांचे शिश्य. पिरायेच्या ८ व्या वर्सा नरेश हांणी म्हापशेंचे स्वर शृंगार संगीत अकादमीत राजेंद्र सिंगबाळ हांचे कडल्यान हार्मोनियमाचेर हिंदुस्तानी शास्त्रीय संगीत वाजोवपाची कला आत्मसात करपाक सुरूवात केली.
पं. शिवकुमार शर्मा हांचें वादन आयकून तांकां संतूर विशीं आकर्शण निर्माण जालें. गोंयांत तेन्ना संतूर शिकोवपी शिक्षक नाशिल्ले. मात, नरेश हांची शिकपाची इत्सा खर आशिल्ली. कला अकादमींत उच्च संगीत शिक्षण घेतलें. तेन्नाच बेळगांवच्या डॉ. सुधांशू कुलकर्णी हांचे कडल्यान प्रशिक्षण घेतलें. अर्थशास्त्राची पदवीय घेतली. डॉ. धनंजय दैत्यंकर (पुणे) हांचें तांकां मार्गदर्शन मेळ्ळें. फाटल्या २७ वर्सांनी भाव सतीश मडगांवकार (तबलें) हांचे वांगडा जायत्या सुवातांचेर कार्यावळी केल्यो.
संतूरांत पद्व्युत्तर पदवी
नरेश मडगांवकार संतूर वादनांत पद्व्युत्तर पदवी मेळोवपी पयले गोंयकारा आशिल्ले. राजभवनांत तेन्नाचे प्रधानमंत्री अटलबिहारी वाजपेयी हांचे हाजेरींत तांणी कार्यावळ सादर केल्ली. दूरदर्शनाचेर जायत्यो कार्यावळी केल्ल्यो. तशेंच ऍटमॉस्फीअर ह्या संवसारीक संगीत अल्बमा खातीर सादरीकरण केलें. कांय कोंकणी चित्रपटां खातीर संगीत दिलें.
मजगतीं, आयज बुधवारा पालयें, उसकय हांगा तांचेर निमाणे संस्कार जाले. तांचे फाटल्यान तांची घरकान्न, १३ वर्सां पिरायेची धूव (संतूर वादक), आवय, चार भाव, भयण, काका असो परिवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
