भांगरभूंय | प्रतिनिधी
कोंकणी कवी, लेखक, पत्रकार आनी आमचो इश्ट संजीव वेरेंकाराच्या ‘फाटल्यान वळून पळयतना’ ह्या आत्मचरीत्र पुस्तकाचें निकतेंच प्रकाशन जालें. संजीव हो संवसार सोडून वचचे पयलीं ताणें तें बरयल्लें. पूण तो हें पुस्तक प्रकाशीत करुंक पावलो ना. अपूर्व प्रकाशनान हें पुस्तक छापलें. स्नेहान ताका बरी प्रस्तावना बरयल्या. संजीवान ह्या पुस्तकांत जिणेंतले अणभव, आपले खास शैलींत सोंपें भाशेंत मांडल्यात. संजीवाची लिखाण शैलीच वेगळी. तेच खातीर तर ताणें खूब वाचक जोडले. संजीवाक हांव फाटल्यान याद करता तेन्ना…
संजीव म्हाका सामको लागींचो कुटुंबीक इश्ट मानी. काशीनाथ नायक, मुकेश थळी, उदय म्हांब्रो, संजय नायक सर… सर्गेस्त अशोक शिलकार हेय बी ताचे क्लोज फ्रेंडस. संजीवाची आनी म्हजी वळख जाली ती सुनापरान्त पेपरांत. पेपर तेन्ना नवोच सुरू जाल्लो. संजीव संपादकीय विभागांत काम करी. हांव तेन्ना मदींमदीं लोक अदालत ह्या काॅलमात पत्रां बरयतालों. गांवच्यो बारीक बातम्योय दितालों. ती दिवंक केन्नाय हांव सुनापरान्तात वतालों. संजीव थंय येतल्यांची विचारपूस करी. एक दीस म्हजीय केली. आनी म्हाका सांगलें गांवचे सरपंच, कलाकार, सुटके झुजारी हांच्यो सुनापरान्ताक मुलाखती घे. हांवें तेन्ना घेतल्यो आनी त्यो छापूनय आयल्यो. म्हजी उमेद वाडली. शिरोडेच्यान म्हजो गांव सात किलोमिटर पयस. तेन्ना रस्तोय सामको बाबत. आमगेर येवपच कठीण आशिल्लें. एक दीस अचानक संजीव आनी ताचो इश्ट संजय नायक म्हज्या बरपाचो मानधनाचो चेक घेवन अचकीत आमगेर पावले. म्हाका अजाप आनी खूब उमेद जाली. आज संजय म्हजो सामको इश्ट जाला.
कांय दिसांनी सुनापरान्ताक कोंकणी कंम्पोजीटर जाय अशी जायरात आयली. हांवें तेन्नाच कोंकणी टायपींग केल्लें. अर्ज केलो. वास्को साळगांवकार हावजांत मुलाखतीचें म्हाका कॉल आयलें. ही गजाल संजीवाच्या कानार घाली. हांवें मुलाखत दिली. सात आठ दिसांनी म्हाका काम मेळिल्ल्याचें पत्र आयलें. हांगां संजीवान म्हाका आदार केला. पूण काम सांजचें स ते रातचें एक आशिल्ल्यान घरचीं कामाक वचूंक दिना जालीं. म्हजे आजयेचो म्हजेर उपाट मोग. ती म्हाका धाडूंक तयारच ना जाली. म्हाका वचपाक येवंक आनी रातचे कामाचे त्रास जातले हो तांकां हुस्को आसलो. कोंकणी पेपरांत नोकरी म्हूण हांव उमेदीन वचपाक फुलिल्लों. थोडे दीस तरी वता अशें आजयेक समजायलें आनी हांव कामाक रुजू जालों.
संजीवाक थोडे दीस रातचे आनी थोडे दीस दिसाचें काम आसतालें. आमी काम जातकच थंयच सुनापरान्तात न्हिदताले. थंय आमची वळख वाडली आनी इश्टागत केन्ना जाली तें म्हाका तरी कळ्ळें ना. संजीवान ते काळार कोंकणी आनी पेपरा खातीर खूब त्रास काडल्यात. पगाराक बी केन्नाच प्राधान्य दिलें ना. तेन्ना संजीव, बाबलीबाब, गीता हेदे, अतुल पंडीत, यशवंतबाब पालेकार, रीता नाडकर्णी, दामोदर घाणेकार, शैलेश भरणो, मंगेशबाब बोरकार, मंगला पै, गीता नेसरीकर, राजू पोपकार, सुनील जाधव, प्रदीप पाटील, दिनेश तेंडुलकार ,एकनाथ सामंत, उल्हास नायक अशे जायते जाण सुनापरान्तात वेगवेगळ्या विभागांनी मोठ्या उत्साहान रातचें दिसाचे काम करी. तेन्ना ते वातावरणात आमी रमताले.
1992 वर्सा म्हाका वाळपय सरकारी नोकरी मेळ्ळी आनी हांवे सुनापरान्ताच्या पदाचो राजिनामो दिलो. संजीवान, बाबलीबाबान बी सरकारी नोकरी मेळटा तर तूं रावूं नाका अशें सांगिल्लें. हांव तांचो उपकारी. सुनापरान्तात लागतना म्हाका 450 रुपया पगार आनी तीन वर्सांनी सुनापरान्त सोडलो तेन्ना सुमार 2400. तेन्ना तोच खूब. ते पगारानच हांवे तेन्ना बजाज स्कूटर घेतिल्ली. उपरात संजीवूय सुनापरान्त सोडून पणजे नवप्रभात पावलो. हांव सरकारी कामाक केन्नाय पणजे म्हज्या हेड आॅफिसांत वतालों. काम जातकच वतना दनपरा संजीवाक मेळपाक हांव प्रेस रूमांत वतालों. संजीव थंय नासल्यार तेन्नाचे पत्रकार बालाबाब गावणेकार, सुनीता धेंपे बी म्हाका प्रेस रुमात बसूंक दिताली़ं. मागीर संजीवाक मेळून हांव घरा येतालो़ं. ताका प्रेस रुमांत मान आशिल्लो. ते खातीर म्हाका हो मान मेळटालो.
संजीव पत्रकारिता करतना कविता बरयत आशिल्लो. अदींमदीं पुस्तकांय छापी. एक दीस पुस्तक प्रकाशना दिसा ताणें म्हाका घरा वेऱ्यां रावूंक आपयलो़. हांव गेलो. तांगेर परकीपण जाणवलें ना. ते उपरांत खूब फावटी हांव वेऱ्यां, आल्तीन आनी मंगेशी ताच्या फ्लॅटार रावला. ताच्या फ्लेटांत म्हाका पूर्ण स्वातंत्र्य आशिल्लें. हांव सहजा कोणागेरच राबित्याक रावना. पूण संजीवागेर रावतालों.
संजीव आनी हांव खूबकडेन भोंवले. केन्ना तो आनी हांव जाल्यार केन्ना तो ताची फॅमीली आनी हांव. राजस्थान, केरळ, गुजरात, दिल्ली, मुंबय, मेंगलोर आनी बारीक सारीक खूबकडे. सगळी कडेन म्हाका व्हरतालो. हरशीं फालिमेक घेवन वतना सहजा कोण हेराक वांगडा व्हरनात. तेय बी दरफावट. पूण तो म्हाका दरफावट व्हरतालो.
बेळगांव वचून रावप संजीवाक खूब आवडटालें. वर्साक दोन तिनदां तरी आमी वताले. बेळगांवचें अनुपम हाॅटेल आमचें सवकळीचें जाल्लें. थंयचे स्टाफ संजीवाची बरी उठबस करी. संजीव दिसतकच हाॅटेला भायले रिक्षावाले ताच्या फुड्यांत येताले. संजीव रिक्षावाल्यांच्या कुटुंबाची धंद्याची बी चवकशी करी. तें तांकां आवडटालें जावंक जाय.
योगायोगान स्नेहाक जोडीदार आनी संजीवाक जावय बेळगांवचोच गावलो. अजिंक्य मुरकुटे. तो खूब प्रेमळ आनी नम्र. संजीवाक तो खूब आवडटालो. अंजिक्याचेंय संजीवाचेर खूब प्रेम आशिल्लें. म्हाका ते माव जावंय कशे केन्नाच दिसले नात. आमी खंयूय वताले तेन्ना संजीव कोणाकय आपली वळख Iam konkani poet अशी करी. konkani poet म्हणपाक ताका अभिमान दिसतालो. सदांच पत्रकारिता हें प्रोफेशन म्हणटालो.
2016 त संजीवान म्हाका सामकें एक ग्रेट सरप्रायज दिलें. तें हांवें मात केन्नाच चितूंक नाशिल्लें. तांणे यादींचें कुरकूट हे निबंधाचें अप्रतीम पुस्तक म्हाका अर्पण केलें. पुस्तक प्रकाशनाच्या आदले दिसा म्हाका सांगलें. आनी तेन्नाचे मुख्यमंत्री लक्ष्मीकांतबाब पार्सेकारांचे हस्तुकीं सन्मानान म्हाका पुस्तक भेटयलें. तेन्ना हांवें संजीवाक सांगिल्लें, हें तुवें कितें केलां ती म्हज्या जाण्ट्यांची पुण्याय. म्हज्या सारक्या एका सामान्य मनशाक पुस्तक अर्पण करपाक केदे मोठे मन अनी काळीज जाय हाजो थाव घेवप मात शक्य ना. फाटल्यान वळून पळयतना पुस्तकातय जायतेकडे संजीवान म्हज्या नांवाचो प्रेमान आनी अभीमानान उल्लेख केला. हाडामासाचीं देवळां पुस्तकातय नंदू हे कॅरेकटरात एक पॅरा म्हजेर बरयला. संजीवाक दुसऱ्यांचो गौरव करूंक आवडटालें. हाडामासाचीं देवळां आनी प्रेरणा रूख ही ताचीच दोन प्रतीका. तीं मुद्दाम वाचची.
पत्रकार म्हणटकच ताच्यो सगळी कडेन वळखी आशिल्ल्यो. ह्यो वळखी वापरून संजीवान जायते जाणांची कामां केल्यांत. खूब जाणांक मदत केल्या.
संजीव सत्य उलोवपी आनी स्पश्ट बरोवपी. अन्याया आड आवाज काडपी. आमी वांगडा आसतना तो म्हाका कुटूंबीक सामाजिक अशे खूब विशय सांगतालो. ते खरे आनी मनाक पट. शिक्षीत कुटुंबांत जावपी घटस्फोटाक लागून तो अस्वस्थ जातालो. थोडे आपसुवार्था खातीर जातींचे धेंडले नाचयतात तांजे आड उलयतालो. शिक्षणात अर्थीक सवलत कितलीय दिवची पूण मेरीटाक प्राधान्य आसूंक जाय हें मत मांडी. थोड्याक सत्य आवडना. तरी सत्य हें सत्यच आसता.
संजीव नाशिल्ल्यान आज म्हाका भोवपाक बी वचन दिसना. आनी केन्नाय गेलोच जाल्यार थंय मन रमना. ताची याद येता. निमाणे संजीव आनी आमी भायर गेल्ले ते मेंगलोर. तो उदय म्हांब्रो आनी हांव. विश्व कोंकणी केंद्राच्या संमेलनाक. हे कार्यक्रमाक गोंयचे मुख्यमंत्री प्रमोदबाब सावंत मुखेल सोयरे आसले. थंयची कार्यावळ बरी जाली म्हूण संजीव खूश जाल्लो. पूण ही संजीवाची मेंगलोर ट्रीप अंतीम जायत हें मात आमी कोणेंच केन्नाच चितू़ंक नाशिल्लें.
म्हाका संजीवाची मदींमदीं याद येता. केन्ना केन्नाय हांव ती मुद्दाम काडटां. आनी म्हजे दोळे ओले जातात.
संदेश सामंत
9423056670
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
