भांगरभूंय | प्रतिनिधी
6 मोबायलां सयत 40 हजार रक्कम लुटली
फोंडे, प्रतिनिधी ः संजीवनी साकर कारखान्याच्या पे- पार्किंगांत आशिल्ल्या ट्रकांतल्यान अनवळखी मनशांनी 6 मोबायल आनी सुमार 40 हजारांची रक्कम लुटल्या. फाटल्या कांय दिसां सावन अश्यो घडणुक घडत आशिल्ल्यान भायले ट्रक चालक तिडकल्यात. वाठारांत असो एक चोरांचो गट वावुरता, असो दुबाव आसा.
मेळिल्ले म्हायती प्रमाण, कारखान्याच्या वाठारांत व्हड प्रमाणांत भायले ट्रक उबे आसतात. उस घेवन आयिल्ल्या ह्या ट्रकांक लागून कारखान्याक येणावळ मेळटा. सोमारा सकाळीं अनवळखी लोकांनी पे पार्किंगांत उबे आशिल्ल्या ट्रॅकाचे हारशे काडून कॅबिनांत न्हिदिल्ल्या ड्रायव्हरांक गुंगीचे वखद फवारून बेशुद्ध केले. मागीर मोबायल फोन, रांदपा खातीर वापरिल्ले स्टो आनी ट्रकांतली रक्कम लुटली. फाटल्या कांय दिसांनी रातच्या वेळार एक- दोन ट्रकांतल्यान मोबायल आनी पयशे लुटिल्यात. पूण आयतारा रातीं व्हड प्रमाणांत सामान आनी पयशे लुटिल्ल्यान ट्रक चालक तिडकल्यात.
मजगतीं, कारखान्याचे प्रशासक सतेज कामत हांणी पे पार्किंग ट्रकांतल्यान चोरी जाल्ल्याची म्हायती दिली. अश्यो घडणुको परत जावच्यो न्हय हे खातीर वाठारांत सीसीटीव्ही कॅमेरे लावपाचो विचार करतले, अशें सांगले.
रातच्या वेळार चोरयो वाडत आसात अशें फोंडा हेवी ट्रक ट्रान्सपोर्ट असोसिएशनाचे अध्यक्ष नागराज नायडू हांणी सांगलें. हे खातीर गोंय सरकारान ट्रक टर्मिनल स्थापन करून ट्रक चालकांक सुटका दिवची अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
