संजीवनीक परत संजीवनी दिवपा खातीर नव्यान यत्न

भांगरभूंय | प्रतिनिधी

पीपी तत्वाचेर इथेनोल प्लांटा खातीर निविदा जारी

पणजीः धारबांदोडेंच्या संजीवनी साखर कारखान्याक संजीवनी दिवपाचे यत्न परत एक फावट सरकारान सुरू केल्यात. फाटले खेपे कारखानो चलोवपा खातीर कोणाकडल्यानच प्रतिसाद मेळूंक ना. उपरांत आतां नव्यान निविदा जारी करून ७५ किलो लीटर दर दिसा (केएलपीडी) क्षमतेचो इथेनोल प्लांट कारखानो चलोवपा खातीरचो हावेस शेतकी संचालनालयान उक्तायला.
संजीवनी सहकारी साखर कारखानो मर्यादीत हाची उदरगत तशेंच ईएनए बॉटलींग प्लाण्ट आनी इथेनॉल डिस्टिलरीच्या उत्पादन प्लांट भौशीक-खाजगी भागिदारी (पीपीपी) तत्वाचेर चलोवपाक दिवपा खातीर शेतकी संचालनालयान कळोवणी केल्या. हो कारखानो दिवपाची निविदा प्रक्रीया ही भौशीक-खाजगी भागिदारी खात्या वरवीं जातली.

ह्या कारखान्यांत इथेनॉल प्लांट चलोवपा खातीर फाटल्या दोन वर्सांच्या काळांत चार निविदा शेतकी संचालनालयान जारी केल्ल्यो. मात हे निविदा प्रक्रीयेंत एक इत्सुक वांटेकार जावंक नाशिल्ल्यान हे येवजणेक शुन्य प्रतिसाद मेळिल्लो. ह्या काळांत शेतकारांनी उस रोवप सोडलें आनी जे शेतकार उस रोयताले ते आपले पीक खानापूर साखर कारखान्यात घालताले.
आता शेतकी संचालनालय नव्यान यत्न सुरू करून ह्या प्लांटाक नव संजीवन दिवपा खातीर हो कारखानो पीपीपी सयत डिझायन – बांदणी-अर्थीक संचालन-हस्तांतरण (डीबीएफओटी) तत्वाचेर दिवपाचो हावेस उक्तायला. ह्या प्रकल्पाच्या पुरस्कारा खातीर पारदर्शक आनी स्पर्धात्मक प्रक्रिये वरवीं पावणी प्रक्रियेंत वांटेकार जावपाक विहीत पात्रताय आनी निकश पूर्ण करपी योग्य अर्जदारांक वा बोलिदारांक आमंत्रीत केला. भौशीक-खाजगी भागिदारी खातें हे प्रकल्पा खातीर शेतकी खात्याक सल्लागार सेवा दितले.
हे अस्तिवांत आशिल्ल्या कारखान्याची उदरगत आनी आधुनिकरण करून दर दिसा ३५०० उस गाळपाचे क्षमते सयत डिस्टलीर खातीर उसाचे रोसा पासत साखर आनी सिरप हो कच्चो माल तयार करप, तशेंच भारत सरकाराच्या इथेनोल ब्लॅण्डेड पॅट्रोल उपक्रम खाला इथेनोल पुरवण करपाखातीर इथेनोल तयार करपी वा सोर्‍याचे बोटलींग करपी ७५ कएलपीडी क्षमतेचो प्लांट उबारपाचो हातूंत प्रस्ताव आसा.
ते भायर कारखान्याचे सुवातेंत एक पेट्रोल पंप आसा. ज्या कंत्राटदाराक ही निविदा मेळटली ताणें भारत पेट्रीलियम ली. आनी संजीवनी सहकार कारखानो ली. हांचे मदीं कबलात करून तो चलोवपी जापसालदारकी घेवची पडटली.