भांगरभूंय | प्रतिनिधी
पणजीः संजिवनी सहकार साकर कारखान्याच्या बंदीच्या काळांत फाटल्या पांच वर्सात कारखान्यांत काम करपी 47 कर्मचाऱ्यांच्यो नोकऱ्यो गेल्यो. हातूंत सासणाचे, कंत्राटी आनी दीसावड्याच्या कामगारांचो आस्पाव आसा. कारखानो बंद जावचे पयली 210 कर्मचारी कारखान्यांत काम करताले आनी तातूंतले फक्त 163 कर्मचारी उरल्यात अशी म्हायती शेतकी संचालनालयान दिल्या.
गोंयभरच्या ऊस उत्पादकांक आदार दिवपी धारबांदोडेंचो संजिवनी सहकार साकर कारखानो तंत्रीक गजालीक लागून 2021 वर्सा बंद पडलो. साकर सोडून कारखान्यांत इथेनॉल तयार करपा खातीर सरकारान यत्न केले. पूण दोन फावटी इत्सुकां कडल्यान हे सुवातेर इथेनॉल प्लांट घालपा खातीर अर्ज मागयिल्ले. पूण दोनूय फावटी कोणेच इत्सा दाखोवंक ना. आतां सरकार तिसरो यत्न करपाक फुडे सरलां.
मजगतीं, कारखानो बंद आशिल्ल्यान कारखान्याच्या खूबशा कर्मचाऱ्यांच्या पोटार पांय बसला.
वर्स 2019-20सात 210 कर्मचारी काम करताले आनी कारखानो बंद जावन 47 जाणांच्यो नोकऱ्यो गेल्यो. आनी फक्त 163 कर्मचारी सद्या कामार रुजू आसात. तातूंतले सासणा खातीरचे 88, कंत्राटी 74 आनी दिसावड्या वेले फक्त एकूच कामागार आसा.
वर्स 2020-21सात कारखानो बंद जाले उपरांत 13 कामगारांक काडले आनी 197 कामगार उरले, 2021-22सात परतून 13 कामगारांक घरा धाडले आनी संख्या 184 मेरेन पावली, 2022-23सात 6 कामागरांक काडले आनी कामगारांची संख्या 178 मेरेन पावली, 2023-24सात परतून 6 कामगारांक कामा भायरे केले आनी ही संख्या 172 मेरेन देंवली, 2024-25सात परतून पाच जाणांच्यो नोकऱ्यो गेल्यो आनी 167 कामागार उरले आनी ह्या वर्सा 2024-25सात चार कामगारांक काडल्यात आनी 163 कर्मचारी हे कारखान्यांत सद्या तरी कामाक आसात.
मजगतीं, सासणा खातीरचे कर्मचारी 2019-20सात 114 आशिल्ले. 2020-21सात तांची संख्या उणी जावन 108 मेरेन पावली, 2021-22सात 102 कर्मचारी, 2022-23सात 97 कर्मचारी, 2023-24सात 93 कर्मचारी, 2024-25सात 90 आनी 2025-26सात 88 कर्मचारी उरले.
जाल्यार कंत्राटी कर्मचारी 2019-20सात 90 आसले, 2020-21सात कर्मचाऱ्यांची संख्या उणी जावन 88 मेरेन पावली, 2021-22सात 81 कर्मचारी, 2022-23सात 80 कर्मचारी, 2023-24सात 78 कर्मचारी, 2024-25सात 76 आनी 2025-26 74 कर्मचारी उरले.
ते भायर 2019-20सात 6 कामागार दीसावाड्यार कामांक आशिल्ले तातूंतले फक्त एकच कामगार 2020-21 ते 2025-26 मेरेन दीसवड्यार काम करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
