भांगरभूंय | प्रतिनिधी
डिसेंबर अखेर मेरेन मेळिल्ली मुजतवाड
भांगरभूंय । प्रतिनिधी
पणजीः संजिवनी साकर कारखान्यांतल्या 91 कायमस्वरुपी आनी 79 कंत्राटी अश्या 169 कर्मचाऱ्यां विशीं फुडल्या सप्तकांत सरकार अंतीम निर्णय घेतलें, अशी म्हायती शेतकी संचालक संदीप फळदेसाय हांणी ‘भांगरभूंय’ कडेन उलयतना दिली.
संजिवनी साकर कारखानो बंद आशिल्ल्यान थंय काम करपी 91 कायमस्वरुपी आनी 78 कंत्राटी अश्या 169 कर्मचाऱ्यांच्या फुडाराचो प्रस्न उपस्थीत जाला. सरकारान ह्या कर्मचाऱ्यां मुखार स्वेच्छा निवृत्ती घेवपाची अट दवरिल्ली. पूण कर्मचारी स्वेच्छा निवृत्ती घेवपाक तयार नात. सरकारान आपली वेवस्था हेर खात्यांनी करची, अशी मागणी ते करतात.
शेतकी खात्यान ह्या कर्मचाऱ्यांक कामाचेर दवरपाची मुजत सुरवेक 30 सप्टेंबर मेरेन दिल्ली. पूण ते उपरांत मुजतींत डिसेंबर अखेर मेरेन वाड केल्ली. आतां तांच्या प्रस्नाचेर फुडल्या सप्तकांत सासणाचो उपाय काडटले, अशें फळदेसाय हांणी सांगलें. फाटल्या कितल्याश्याच वर्सां सावन हे 169 कर्मचारी संजिवना कारखान्यांत काम करतात. सरकारा कडल्यान तांच्या प्रस्नाचेर ठोस उपाय येना हे खातीर तांचे कडल्यान एकसारकी नाराजी उक्तायतात. कांय कर्मचाऱ्यांनी पिराय मर्यादा हुपिल्ल्यान तांकां हेर सुवातेचेर काम मेळप कठीण जातलें. ताचेर सरकार कसलो निर्णय घेतलें, हे फुडल्या सप्तकांत जावपी बसके उपरांतूच स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
