भांगरभूंय | प्रतिनिधी
पणजी : सरकार पर्पल फेस्टा खातीर १६ कोटी रुपया खर्च करपाचे तयारेंत आसा. मात सुमार ४ म्हयन्यां सावन बंद आशिल्लें संजय शाळेंतलें प्रशिक्षण आनी पुनर्वसन केंद्र परत सुरू करपाचे मागणे खातीर दिव्यांग विद्यार्थ्यांच्या पालकांचेर आझाद मैदानाचेर धरणें धरपाची पाळी आयल्या. ही सामकी वायट गजाल. हें केंद्र बेगीनूच सुरू करपा खातीर मुख्यमंत्री डॉ. प्रमोद सावंत हांणी बेगीनूच हस्तक्षेप करचो अशी मागणी विरोधी पक्ष फुडारी युरी आलेमाव हांणी केली.
विशेश भुरग्यांक सुविधा दिवपाच्या सरकाराच्या सुस्त वृत्ती विशीं चिंता उक्तावन आझाद मैदानाचेर विशेश भुरग्यांच्या पालकांनी केल्ल्या धरणें आंदोलनाचेर विरोधी पक्ष फुडारी युरी आलेमाव हांणी प्रतिक्रिया उक्तायली. ह्या वेळार तांणी भाजप सरकारच्या असंवेदनशील वृत्तीचेर टिका केली.
सरकाराक इव्हेंट आयोजनाचें पिशें लागलां. अंदूं पर्पल फेस्ट- २०२४ खातीर वट्ट १६ कोटी रुपया खर्च जातले. ही रक्कम दिव्यांग व्यक्तीं खातीर आसरो केंद्र उबारपाक खूब जाली. दुर्दैवान, भाजप सरकार ना जाल्ले गजालींक प्राधान्य दिता, नाका जाल्ले खर्च करता, अशें आलेमांव हांणी म्हणलें.
विशेश विद्यार्थ्यां खातीरचें प्रशिक्षण आनी पुनर्वसन केंद्राची इमारत असुरक्षीत आशिल्ल्याची घोशणा केल्ल्यान सरकार फाटल्या ३ महिन्यां सावन हें केंद्र स्थापन करपा खातीर पर्यायी जागो सोदपाक अपेशी थारलां. सप्टेंबराचे सुरवातेक इमारती वयल्यान पडून एका दिव्यांग विद्यार्थ्याक मरण आयलें. तेन्ना सरकारान ऑक्टोबर २०२३ मेरेन केंद्र स्थलांतरीत करूंक नाशिल्लें. हाचे वयल्यान भाजप सरकाराची दिव्यांगा विशीं असंवेदनशीलताय मुखार येता असो दावो आलेमाव हांणी केलो.
बौद्धीक आनी शरिरान दिव्यांग आशिल्ले सुमार ११० विद्यार्थी फाटल्या तीन म्हयन्यां सावन घरा आसात. तांचे सदचे जिणेचेर हाचो परिणाम जाता. तांचे वागणुकेचेर हाचो परिणाम जाल्ल्यान पालकां मुखार आव्हान निर्माण जाल्यांत, अशें आलेमांव हांणी नमूद केलें.
भाजप सरकाराक दिव्यांग व्यक्तींची जतनाय घेवपाक वेळ ना. सरकाराचें लक्ष फकत भ्रश्ट तरेन इव्हेंट आयोजन करपाचेर आसा. फाटल्या वर्सा पर्पल फेस्ट- २०२३ च्या इव्हेंट आयोजन एजंसीची निवड फिक्सींगा वरवीं केल्लें. अंदूं तेच एजन्सीक १६ कोटींचें काम दिलां, हाची म्हायती म्हाका मेळ्ळ्या. पर्पल फेस्ट २०२३ त जाल्ल्या खर्चा परस अंदूं दुपेटीन खर्च करून हें फेस्ट मनयतले, अशें आलेमांव हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
