भांगरभूंय | प्रतिनिधी
पणजीः भारतांत आतां मेरेन विमान आनी हेलिकॉप्टर अपघातांत जायत्या राजकी फुडाऱ्यांक मरण आयला. आयज महाराष्ट्राचे उपमुख्यमंत्री अजीत पवार हांचे विमान बारामतींत कोसळ्ळें. मेळिल्ले म्हायती प्रमाण धुक्याक लागून आयिल्ल्या आडमेळींक लागून विमान वाट चुकलें आनी मागीर क्रॅश जालें. पवार हांचे पयलीं संजय गांधी, माधवराव सिंधिया, वाय एस आर रेड्डी अशा जायत्या दिग्गज राजकी फुडाऱ्यांक मरण आयला.
गुरनाम सिंग (1973) – पंजाबाचे आदले मुख्यमंत्री गुरनाम सिंग हांकां 31 मे 1973 दिसा दिल्लींत जाल्ल्या विमान अपघातांत मरण आयिल्लें.
बलवंतराय मेहता (1965) – गुजराताचे दुसरे मुख्यमंत्री बलवंतराय मेहता हांकां 1965 वर्सा भारत-पाकिस्तान झुजांत मरण आयिल्लें. पाकिस्तानाच्या वायुसेनेच्या झुजारी विमानान चुकून तांच्या नागरी विमानाचेर फारफेट केल्लो. तातूंत तांकां मरण आयिल्लें.
संजय गांधी – भारतीय राष्ट्रीय काँग्रेसीचे फुडारी, आदली प्रधानमंत्री इंदिरा गांधी हांचे एक पूत. तांकां 23 जून 1980 दिसा जाल्ल्या विमान अपघातांत मरण आयिल्लें.
माधवराव सिंधिया – ज्योतिरादित्य सिंधियाचे बापूय आनी काँग्रेसीचे वरिश्ठ फुडारी. 30 सप्टेंबर 2001 दिसा खाजगी विमान अपघातांत तांकां मरण आयिल्लें.
जीएमसी बालयोगी – लोकसभेचे सभापती आनी टीडीपीचो वरिश्ठ फुडारी. 3 मार्च 2002 दिसा जाल्ल्या हेलिकॉप्टर अपघातांत तांकां मरण आयिल्लें.
वाय एस राजशेखर रेड्डी – आंध्र प्रदेशाचे मुख्यमंत्री. 2 सप्टेंबर 2009 दिसा जाल्ल्या हेलिकॉप्टर अपघातांत तांकां मरण आयिल्लें.
डॉ. डोर्जे खांडू – अरुणाचल प्रदेशाचे मुख्यमंत्री. 30 एप्रिल 2011 दिसा जाल्ल्या हेलिकॉप्टर अपघातांत तांकां मरण आयिल्लें.
ओपी जिंदाल आनी सुरेंद्र सिंग – हरियाणाचे मंत्री आनी वरिश्ठ फुडारी हांकां 2005 वर्सा जाल्ल्या हेलिकॉप्टर अपघातांत मरण आयिल्लें.
विजय रुपानी – गुजराताचे आदले मुख्यमंत्री. अहमदाबादांत जून 2025त जाल्ल्या विमान अपघातात तांकां मरण आयिल्लें.
अजित पवार – महाराष्ट्राचे उपमुख्यमंत्री. अजित पवार हांकां बारामतींत 28 जानेवारी 2026 दिसा जाल्ल्या विमान अपघातांत मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
