संघ देश वाटावपा खातीर संघर्श करीत रावतलो

भांगरभूंय | प्रतिनिधी

अर्जून चांदेकर: आझाद मैदानार राष्ट्रीय स्वयंसेवक संघाची कार्यावळ

पणजी: राष्ट्रीय स्वयंसेवक संघ देश वाटावपा खातीर सेगीत सघर्श करीत रावतलो. संघाक येस अपेस नाका जाल्यार समाज मोटो जाल्लो जाय. भारताच्या हिंदुत्वाचेर, सत्वाचेर आक्रमक जायत आसा, तेन्ना संघ शक्ती आनी समाजांतली सज्जन शक्ती एकठांय येवंक जाय अशें मत राष्ट्रीय स्वयंसेवक संघाचे कोंकण प्रांत संघ चालक अर्जून यशवंत चांदेकर हांणी उक्तायलें.

पणजे आझाद मैदानार आयतारा राष्ट्रीय स्वयंसेवक संघाची शताब्दी आनी विजयादशमी हे फाटभुंयेर आयोजीत केल्ले कार्यावळीत अर्जून चांदेकर मुखेल उलोवपी म्हूण उलयताले. माचयेर मुखेल सोयरे भौशीक कागाळ खात्याचे संचालक प्रसाद वळवयकार, पणजी प्रांत कार्यवाह वैभव पै हाजीर आशिल्ले.

संघ स्थापन करतना डॉ. हेडगेवार हांणी मोख दवरिल्ली. ते मोखी प्रमाण वाटचाल सुरू आसा. संघाच्या कार्याक महात्मा गांधीचे आशिर्वाद मेळ्ळ्यात. डॉ. आंबेडकर हांणी लेगीत म्हणिल्लें की, कांय गजालीं कडेन मतभेद आसले तरी संघाच्या कार्या कडेन हांव आपुलकायेन पळयतां. समाजूय आतां संघाक स्विकारूंक लागला. परिवर्तना खातीर व्यक्ती बदलूंक जाय आनी व्यक्ती परिवर्तनाची प्रक्रिया संघांतल्यान घडटा. आयज जातीपाती वेल्यान तेढ निर्माण करीत आसात. आदिवासी आनी शारी असो संघर्श जायत आसा. देशाचे सुरक्षेक घात निर्माण जाला. आमी शक्ती पणाक लायली जाल्यार 2047 पयलींच भारत महागुरू जातलो असो विस्वास चांदेकर हांणी उक्तायलो.

प्रसाद वळयकार हांणी सांगलें, डॉ, हेडगेवार, माधव गोळवलकर अशा व्हड मनशांच्या योगदानाक लागून आयज संघ घटमूट जाला. संघ देश वाटावपा खातीर सेगीत संघर्श करीत रावतलो. जातीपातीचो विचार करिनासतना संघ विचार मुखार व्हरत आसा. लोक कल्याण, राज्य कल्याण आनी देश कल्याण हो विचार घेवन संघाची वाटचाल सुरू आसा. सत्य, ज्ञान आनी धर्म हो विचार म्हत्वाचो आसा.

वैभव पै हांणी मानेस्तांची वळख करून दिली. सुरवेक सांघीक गीत, शाखेर जावपी व्यायामाचे प्रकार हांची प्रात्यक्षिकां जालीं.

मजगतीं, हे कार्यावळीक उत्पल पर्रीकार हे स्वयंसेवकाच्या भेसात वांटेकार जाल्ले.

पणजीचे आमदार बाबूश मोंसेरात लोकां मदीं बशिल्ले. पुराय दोन वरां ते कार्यावळीक हाजीर राविल्ले आनी मुखेल उलोवप्यान मराठीतल्यान केल्लें भाशणूय तांणी आयकलें. कार्यावळ सोंपतकच संघातले खूबशे स्वयंसेवक तांकां हात दिताले. जाल्यार कांय जाणांनी गळो भेट लेगीत घेतली. गोरक्षा स्टॉलाचेर तांणी खरेदी लेगीत केली. ताका लागून संघ परिवार खूश दिसतालो.