संघाचे प्रचारक दुर्गानंदगिरी लातुरांत संवसाराक अंतरले

भांगरभूंय | प्रतिनिधी

पणजीः राजकारण, धर्मीक वावर, शिक्षण, समाजीक आनी सांस्कृतीक अशा वेगवेगळ्या मळार गोंयांत मुखार आशिल्ल्या संघ वावुरप्यांची एक पिळगी घडोवपी राष्ट्रीय स्वयंसेवक संघाचे प्रचारक दुर्गानंदगिरी स्वामी उर्फ दुर्गानंद वासुदेव नाडकर्णी (89) आयज लातूरांत तांचे शिश्य उमाकांत होनराव हांच्या घरांत संवसाराक अंतरले.
केंद्रीय मंत्री श्रीपाद नायक, आदले केंद्रीय संरक्षण मंत्री स्व. मनोहर पर्रीकार, केरळचे राज्यपाल राजेंद्र आर्लेकार, आदले मुख्यमंत्री लक्ष्मीकांत पार्सेकार, रा. स्व. संघाचे आदले गोवा संघचालक आनी भारतमाता की जय संघाचे संस्थापक संघचालक प्राचार्य सुभाष वेलिंगकार, मुष्टीफंड उच्च माध्यमिक संस्थेचे आदले प्राचार्य रत्नाकर लेले, शिक्षणतज्ज्ञ दिलीप बेतकेकार, विश्व हिंदू परिषदेचे स्व. सुधीर देसाय, मातृछायाचे दिलीप वि. देसाय, डॉ. हेडगेवार शिक्षण संस्थेचे सुभाष देसाय अशे जायते ज्येश्ठ वावुरपी तांच्या हाता खाला तयार जाल्ले.
मूळ अंकोला-कर्नाटकाचे काँग्रेस मोगी कुटुंबांत जल्मल्ले दुर्गानंद संघांत काम करपाक आयले. मुंबयच्या बॉम्बे पोर्ट ट्रस्टांत तांणी काम करपाक सुरवात केली. तेन्नाचे सरसंघचालक माधव सदाशिव गोळवलकर गुरूजी हांच्या वेवस्थापनांत ते मुंबय संघ कार्यालयांत आशिल्ले. थंय तांकां श्री गुरूजींचो स्नेह मेळ्ळो. गुरूजीन आपल्या गळ्यांतली भांगराची सरपळी दुर्गानंदाच्या गळ्यांत घाल्ली. 35 वर्सांच्या संघ प्रचारक म्हणून जिवितांतल्यान निवृत्त जातकच तांणी ती सरपोळी नागपूर संघ कार्यालयाक दिली.
बॉम्बे पोर्ट ट्रस्टांतली बरी पगाराची नोकरी सोडून 1961 वर्सा ते पूर्णवेळ संघ प्रचारक जाले. सुरवेक महाराष्ट्रांत तालुका प्रचारक म्हणून काम केले उपरांत सावंतवाडी जिल्हो प्रचारक म्हणून तांची नेमणूक जाली. त्या वेळार दक्षीण रत्नागिरीचे पांच तालुके आनी गोंय राज्य हांचो मेळून संघाचो ‘सावंतवाडी जिल्हो’ तयार जाल्लो. 1968 सावन 1975 च्या आणीबाणी मेरेन ते गोंयांत आशिल्ले. आणीबाणीच्या काळांत ते भूंयगत रावले, पुलिसांक संद दिनासतना एकाच वेळार पणजी आनी गोंयांतल्या मडगांवांत आणीबाणी आड सत्याग्रह घडोवन हाडले. तांकां धरल्यार पुलिसांनी 25 हजार रुपया इनाम दिवपाची घोशणा केल्ली. आणीबाणीच्या काळांत तांणी आपली वळख बदलून आनी आनंद शिरोडकार हें नांव घेवन भूंयगत काम केलें.
त्याच वेळार मुंबय महानगर प्रचारक म्हणून तांची बदली जाली. प्रांतांत नव्यान स्थापन जाल्ली “हिंदू एकजूट” ह्या आक्रमक संघटनेचे संघटनमंत्री ही नवी जापसालदारकी तांकां दिली. गोंयांतल्या म्हापशेंच्या गणेशपुरीच्या संग्राम- गणेश देवूळ बांदपाच्या वेळार जाल्लो संघर्श, साश्टीच्या (उपरांत राजकारणी जाल्लो) गुंडाचो आतंकवाद मडगांव, वास्को आनी म्हापशें हांगा आव्हान दिवपाचे काम हिंदू एकजूट संघटनेन त्या काळांत दुर्गानंद नाडकर्णी हांच्या मार्गदर्शना खाला केलें.
35 वर्सां काम केले उपरांत तांणी संघ प्रचारक म्हणून काम करप बंद केलें. तांणी 15 वर्सां आदीं संन्यास दीक्षा घेतिल्ली. तांच्या गुरून तांकां संन्यास दीक्षा दिवन श्री दुर्गानंदगिरी हें नांव दिलें. महाराष्ट्र आनी गोंयांत तांचो व्हड फॅन बेस आसा.