संघाक ‘जात’ लागना

भांगरभूंय | प्रतिनिधी

संघ मुखेली मोहन भागवत हांचें स्पश्ट म्हणणें

खंयचेय जातीचो जावपाक शकता संघ मुखेली

हिंदू उतराक विशेशण म्हूण पळोवपाचो उलो

खबरां संस्था

मुंबय : संघाक जात- पात कांयच लागना. क्षत्रीय, वैश्य, शुद्र वाब्राह्मण कोणूय सरसंघचालक जावपाक शकता. ब्राह्मण आसप ही एकसुरी पात्रताय न्हय. भारतांत रावपी दरेक व्यक्ती हिंदू आसा. ‘हिंदू’ उतराक एकादी धर्मींक वळख म्हूण न्हय जाल्यार एक विशेशण म्हूण पळोवपाक जाय, जी भारताची सभ्यता आनी सांस्कृतीक वळख दाखयता. भारताचें संवसारीक फुडारपण फक्त भाशणांनी न्हय जाल्यार आचरण आनी वेव्हारांतल्यान स्थापन जाता. कांय लोक गर्वान स्वताक हिंदू म्हणटात, कांय उदास रावतात, जाल्यार कांय जाण हे वळखीची लज दिसता, तशेंच कांय जाण आपली हिंदू वळखक विसरल्यात वा तांकां विसरपाक लायल्या, अशें राष्ट्रीय स्वयंसेवक संघाचे (आरएसएस) मुखेली मोहन भागवत हांणी सांगलें.

आरएसएसच्या 100 व्या वर्धापन दिसा निमतान मुंबय आयोजीत व्याख्यानमाळेंत भागवत उलयताले. ह्या वेळार तांणी हाजीर आशिल्ल्या लोकां कडेन संवाद सादून तांच्या प्रस्नांच्यो जापो दिल्यो.

संघाचो सरसंघचालक कोणे जावचें? ब्राह्मण, क्षत्रीय, वैश्य वा शुद्र सरसंघचालक जावपाक शकना. फक्त हिंदूच सरसंघचालक जावपाक शकता. अनुसुचीत जाती/ जमातींतली व्यक्ती लेगीत सरसंघचालक जावपाक शकता आनी जो हेर कितेंय आसा तो लेगीत सरसंघचालक जावपाक शकता. हांगा कोण खंयचे जातीचो आसा, ह्या आदाराचेर कार्यकर्त्यांची नेमणूक करिनात. जो काम करता, ताकाच नेमतले, अशें भागवत हांणी सांगलें.

संघ मुखेली भागवत हांणी सांगलें, जेन्ना संघ सुरू जालो तेन्ना तो ल्हान आशिल्लो. संघाचें काम एके ल्हान वस्तींत सुरू जालें आनी तें ब्राह्मण वस्तींत आशिल्लें. हे खातीर, सुरवेक संघाचे सगले पदाधिकारी ब्राह्मण आशिल्ले. लोक म्हणटाले, संघ ब्राह्मणांचो आसा आनी ते आयजूय अशेंच म्हणटात, कारण लोक फक्त स्वताच्या लोकां मदले कितले आसात, तें पळयतात. पूण तशें ना.

आतां संघ वाडला आनी आमी लोकांक जातीच्या आदाराचेर वांटून घालिनात. आमी भुगोलीक वाठारांत विस्तार करतात. 10- 10 हजार लोकांच्यो वस्ती आसात. शारांनी आनी दरेके वस्तींत काम करपाक जाय. एका मंडळांत 10- 10-, 12 गांवांचो समूह आसता आनी दरेका मंडळांत काम करपाक जाय. जर आमी भुगोलीक नदरेन विस्तार केलो जाल्यार सगल्यो वस्ती संपर्कांत येतात. सगले जातीचे लोक येतात, अशें भागवत हांणी सांगलें.

संघ मुखेल्यान फुडें सांगलें, आयज तुमकां दिसतलें, अखील भारतीय पांवड्याचेर फक्त एकेच जातीचे लोक नात, जाल्यार सगले जातींचे लोक आसा. संघांत ही एक गजाल सभावीक गजाल आसा. हेच खातीर एससी- एसटी आसप ही अपात्रताय ना आनी ब्राह्मण आसप ही लेगीत पात्रता ना.

वेंचणूक पद्दत

संघाच्या क्षेत्राचें, जिल्ह्यांचे आनी विभागांचे संघचालक हांची तीन वर्सांतल्यान एकदां वेंचणूक जाता. स्वयंसेवकूच तांकां वेंचतात. 50 स्वयंसेवकां फाटल्यान 1 अशे प्रांत प्रतिनिधी आसतात. 40 प्रांत प्रतिनिधीं फाटल्यान 1 अखील भारतीय प्रतिनिधी सरकार्यवाहक आनी क्षेत्र संघचालकांची निवड करतात. तांचे वांगडा प्रांतनिधी हे प्रांत, जिल्हो संघचालकांची निवड करतात, अशें मोहन भागवत हांणी सांगलें.