भांगरभूंय | प्रतिनिधी
अखेरेक पेलवानांच्या आंदोलनाचेर केंद्र सरकारान तोडगो काडला. स्वता खेळां मंत्री अनुराग ठाकूर हांणी ही म्हायती पत्रकारांक दिल्या. भारतीय कुस्ती म्हासंघाचे अध्यक्ष बृजभूषण सिंह हांचेर लिंगीक गैरवेव्हाराचे आरोप आंतरराष्ट्रीय मळाचेर भांगरा पदकां जोडपी बायल पेलवानांनी केल्ले. बृजभूषण हे भाजपाचे खांपे खासदार. फाटोफाट वेंचून येवपी. तांचे आड कांय गुन्यांव आसात. पूण, सात बायलां पेलवानांनी लिंगीक छळाचे आरोप करतकच बृजभूषण संवसारभर उजवाडाक आयले. पापाचे 100 घडे भर मेरेन नियती वाट पळयता आनी मागीर सासणाची बुद्द शिकयता. सध्या तरी बायल पेलवानांनी बृजभूषण हांचे आडची पयली फेरी जिखल्या. घडये ह्या बाहुबली खासदाराच्या नशिबांत हार आसूं येता. एक- देड म्हयनो वाट पळोवन सरकारान ह्या प्रकरणाचो आतां सोक्षमोक्ष लावपाचें थारायलां. 15 जून मेरेन सरकारान निर्णय घेवंक ना जाल्यार पेलवान परत आंदोलनाक बसतले. हो वेळ परत येवचो न्हय..
बृजभूषण हांचे आड पुलिशेंत दोन एफआयआर दाखल जाल्यात. आंतरराष्ट्रीय कुस्ती संघटनेन भारतीय कुस्ती महासंघाची वेंचणूक घेयात, नाजाल्यार तो बरखास्तूच करतां, अशी जाहीर शिटकावणी दिली. नामनेचे खेळगडे, हरियाणांतले शेतकार, खाप पंचायतीन आंदोलनाक सक्रिय तेंको दिलो… म्हणटकच सरकाराक एक पावल फाटीं सरचेंच पडलें. कारण हे पेलवान आंतरराष्ट्रीय पदकां मेळोवपी. बातमी संवसारांतल्या समेस्त खेळगड्यां मेरेन पाविल्ली. दिल्ली पुलिसांनी हें आंदोलन चिड्डूपाचो यत्न केलो. हे वटेन सोशल मिडिया वयल्यान ह्यो बायलो कोण ताचो विचार करीनासतना इमानदार व्हाॅट्सअप पदवीधरांनी वेगवेगळे पद्दतीन आंदोलना आड मोहीम चलयली. वैयक्तीक टिकाय केली. पूण, पोरूं दिल्लींत कृशी धोरणा आड आंदोलन करपी हरियाणांतल्या शेतकारांच्याच गांवांतल्यो ह्यो बायलो. त्यो फाटीं सरतात?
प्रकरण आनीक इबाडचें न्हय, ह्या हेतून कांय दिसां पयलीं पेलवान आनी केंद्रीय गृहमंत्री अमित शाह हांची रातीं दोन वरां बसका जाली. मात हे चर्चेंत कितें जालें, तें मात पसून भायर सरुंक ना. उपरांत रोखडीच खेळां मंत्री अनुराग ठाकूर आनी पेलवानां मदीं स वरां भासाभास जाली….. आनी आंदोलन जैताच्या मार्गाचेर पावलें. अर्थांत अजून जैत मेळपाचें आसा. खुद्द ठाकूर हांणी सांगलां ते प्रमाण, ब्रृजभूषण हांचे वयल्या आरोपां विशीं तपास करून 15 जून मेरेन चार्जशीट दाखल करतले. भारतीय कुस्ती म्हासंघाची वेंचणूक 30 जून मेरेन घेवची, म्हासंघाची अंतर्गत कागाळ समितीन स्थापन करची, ताची अध्यक्ष बायल आसची, खेळगडे, आखाडे, प्रशिक्षकांचेर गुन्यांव दाखल केल्यात ते फाटीं घेवचे, वेंचणूक जातली तेन्ना बरे जाळवणदार वेंचून येवचे म्हूण खेळगड्यां कडेन भासाभास करची, बृजभूषण हांणी तीन टर्म पुराय केल्यात. ताका लागून ते वा तांचे कडेन संबंदीत व्यक्ती वेंचून येवची न्हय, ह्यो पेलवानांच्यो मागण्यो आशिल्ल्यो. त्यो सगल्यो सरकारान मान्य केल्यात. हाचो अर्थ दाल मे कुछ काला था. मागीर खेळां खातें इतले दीस ओगी कशें रावलें? चेपण हाडटकच पेलवान आंदोलन फाटीं घेतले अशें बी तांकां दिशिल्लें?
कांय लोक वचत थंय घाण करतात. कदेलार बसलो काय हात मारूंक कसो मेळटलो, हाचो सगल्यांत पयलीं विचार करतात. एकामेकांक साह्य करूं, आसले काय मागीर विचारपाक नाका. म्हणटकच हाचे मुखार कुस्ती संघटनेंत अप्रवृत्ती येवच्यो नात, हे खातीर दोळ्यांत तेल घालून म्हणटात तशें खेळां खात्यान जागृत रावचें. कारण हो नासलो, तरी दुसरो ब्रृजभूषण तयार जावं शकता. आनी हेर खेळां संघटनांचें कितें? थंय कोण बृजभूषण आसा जाल्यार ताका घरा धाडचो. दोन टर्मा परस चड काळ कोण सरकारी नागोबा वेटोळे घालून बसला जाल्यार ताका शेंपडेक धरून अटंग्या रानांत व्हरून सोडचो. जे राजकी जाळवणदार आसात, तांचेर बारीक लक्ष दवरचें. समित्यांचेर स्वतंत्र विचारांच्या खेळगड्यांक घेवचे. नंदीबैल आसल्यार कांय सुदारणा जावची ना. देशांतल्या खेळां संघटनांचेर कितले राजकी फुडारी वा तांचे पूत, धुवो आसात, ताची वळेरीच सरकारान दरवर्सा जाहीर करपाक जाय. संघटनांचें आॅडिट नेमान जावंक जाय. गोंयां परस इल्ली चड लोकसंख्या आशिल्ले जमैका सारके देश 4- 4 भांगरां पदकां घेतात आनी सगल्यांत चड लोकसंख्या आशिल्लो आमचो देश खेळां मळाचेर कुस्ती, बाॅक्सिंग सोडल्यार उपाशीच उरता, हें म्हासत्ता जावपाच्या मार्गाचेर आशिल्ल्या आमच्या भारताक सोबना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
