भांगरभूंय | प्रतिनिधी
श्री साई दिगंबर स्पोर्ट्स अँड कल्चरल क्लब, आसगांव, हे संस्थेचो प्रवास हो निर्धार, जिद्द, एकचार आनी कश्टाची व्हड देख.
आपलें पारंपरीक दायज सांबाळून, कश्टान उंचाय मेळोवन, संस्कृतायेचो बावटो उबारून आसगांवचो एक पंगड आयज गोंयच्या सांस्कृतीक जगांत उंच उबो आसा. ‘श्री साई दिगंबर स्पोर्ट्स अँड कल्चरल क्लब, आसगांव’ हे संस्थेचो प्रवास हो निर्धार, जिद्द, एकचार आनी कश्टाची व्हड देख.
ल्हान सुरवात, ध्येय व्हडलें!
2017 वर्सा बार्देश तालुक्यांतल्या आसगांवच्या 10-12 तरणाट्यांनी एकठांय येवन घुमट आरतीचो पंगड तयार करपाचो निर्णय घेतलो. गोंयचे गिरेस्त सांस्कृतीक परंपरेचो अभिमान बाळगून ह्या तरणाट्यांनी गांवचे संस्कृतायेक नवो आयाम जोडपा खातीर हो उपक्रम सुरू केलो.
घुमट आरती ही आमची मोलादीक संस्कृताय. पुर्विल्ल्या काळा सावन आमी ती धर्मीक, संस्कृतीक सुवाळ्यांनी आयकतात. ह्या पंगडान श्रीदत्तात्रेय देवळांत नेमान आरती करपाक सुरवात केली आनी ल्हवू ल्हवू एक वळख तयार केली. वावराक साईबाबाचो आशीर्वाद घेवपाचो हेतू आशिल्ल्यान ‘श्री साई दिगंबर’ हें नांव थारायलें.
सुरवेक फकत 10-12 वांगडी आशिल्ल्या ह्या पंगडान कश्ट करून, हेर तरणाट्यांक उर्बा दिवन पंगड घटमूट केलो. तांच्या समर्पणाक, कश्टांक लागून पंगडाची लोकप्रियता वाडली. वांगडी वाडत गेले. 2019 वर्सा सरकारा कडल्यान अधिकृत नोंदणी मेळ्ळ्या उपरांत ‘श्रीसाई दिगंबर स्पोर्ट्स अँड कल्चरल क्लब, आसगांव- गोंय’ ह्या नांवान हो पंगड सुरू जालो. उपरांत मंडळान फकत घुमट आरती मेरेन मर्यादीत रावनासतना सांस्कृतीक आनी खेळां कार्यावळीय आयोजीत करपाक सुरवात केली.
कठीण काळ, पूण आत्मविस्वास कायम
2020 वर्सा पुराय संवसारांत आयिल्ली कोवीड-19 ची धाम एक व्हड धक्को आशिल्लो. जायत्या जाणांची नोकरी गेली, वेवसाय थांबले, लोक घरांतच बंद पडले आनी सगळे कडेन अनिश्चिततायेचें वातावरण पातळ्ळें. ह्या काळांत ह्या पंगडाकय आपल्यो सांस्कृतीक कार्यावळी बंद करच्यो पडल्यो. आरती, भजन, कार्यक्रम सगळे थांबलें. पूण एक गजाल तांणी सोडून दिली ना ती म्हणल्यार स्वता वयलो विस्वास! ह्या कठीण काळा उपरांत तांणी नव्यान प्रशिक्षण सुरू केलें, सर्तींनी वांटो घेतलो आनी वेगवेगळ्या पांवड्यार नांव जोडलें. तांचे जिद्दीक लागूनच ते आयज येसाचे तेंगशेर पावल्यात.
आयज हो एक गट न्हय तर घटमूट सांस्कृतीक संस्था जाल्या, जंय वेगवेगळ्या पिरायेचे लोक एकठांय येवन पारंपारीक कला आनी खेळांचो अभ्यास करतात. हे संस्थेचे वेगवेगळे विभाग आसात. ते अशे- पयलो श्रीसाई दिगंबर घुमट आरती मंडळ, दुसरें श्री साई दिगंबर फुगडी मंडळ, तिसरें श्रीसाई दिगंबर महिला भजनी मंडळ, आनी निमाणें श्रीसाई दिगंबर बाल भजनी मंडळ.
बायलांची समर्पणाची देख
ह्या मंडळांत व्हड प्रमाणांत बायलो वांटो घेतात. विद्यार्थी आसूं वा घरकान्न आसूं, नोकरी करपी आसूं वा वेवसायीक, सगळीं आपल्या वेळाचें वेवस्थापन करून हे संस्थेक योगदान दितात. तालुको आनी राज्य पांवड्यावेल्या फुगडी आनी भजन सर्तींनी तांणी बरी कामगिरी केल्या.
शिर्डींत भजन सादरीकरण
ह्या वर्सा श्री साई दिगंबर मंडळा खातीर एक भांगराची संद मेळ्ळी. जंय दर दिसा लाखांनी भक्त दर्शना खातीर येतात अशा पवित्र सुवातेर साईबाबा देवळांत कला सादर करप हो व्हड मान. 10 फेब्रुवारीक भजन आनी घुमट आरती रकपाची संद मेळ्ळी. गोंयांतले कांय पंगड थंय आपली कला सादर करतात. तातूंत आतां ह्या पंगडाचो आसपाव जाला.
साईश नार्वेंकार कुशळ शिक्षक
हे संस्थेचे संस्थापक आनी अध्यक्ष साईश गजानन नार्वेंकार हे एक कुशळ शिक्षक. तशेंच शिक्षण आनी समाजीक वावर हांचे मदीं बरी संतुळा दवरपी फुडारी. विद्यार्थ्यांक आकार दिवपा खातीर वावुरतनाच ते समाजसेवाय करतात. कला, खेळ आनी समाजीक वावराच्या प्रचाराक तांणी जायते उपक्रम चालीक लायल्यात. तांच्या कश्टाक लागून आयज हें मंडळ वेगळे उंचायेचेर पावलां.
श्रीसाई दिगंबर स्पोर्ट्स अँड कल्चरल क्लब हें फकत येसस्वीपणाचेंच न्हय, तर संघटनात्मक निश्चय, कश्ट आनी समर्पणाची जिवी देख. तरणाट्यांनी आपल्या प्रवासांतल्यान शिकपाक जाय की शिक्षणा वांगडाच समाजीक आनी संस्कृतीक कार्यावळींनी वांटो घेवप गरजेचें आसा. संस्थेची खरी तांक निर्धार आनी कश्टांत आसता. श्री साई दिगंबर संस्थेन ही शक्त दाखयल्या!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
