भांगरभूंय | प्रतिनिधी
-प्रदेश काँग्रेसी वतीन मेणवाती मोर्चा; मरण आयिल्ल्यांक ओंपलीं आर्गापणजीः संघटीत रावून देशांत वाडत आशिल्ल्या आतंकवादाचेर मात करप गरजेचें. हे खातीर गोंयकारांनीय संघटीत उरपाक जाय. हे विशीं राज्य सरकारानय सादूर रावपाची गरज आसा अशें मत काँग्रेस प्रदेशाध्यक्ष अमीत पाटकार हांणी उक्तायलें.
कांय दिसां आदीं जम्मू-काश्मीरांतल्या पहलगामांत जाल्ल्या आतंकवादी हल्ल्यांत 28 नागरीकांक मरण आयलें. कांय जाण जखमीय जाले. ह्या हल्ल्यांत मरण आयिल्ल्यांक आर्गा ओंपपा खातीर गोंय काँग्रेसीन शुक्रारा पणजे आनी मडगांवां मेणवाती मोर्चा आयोजीत केल्लो. पणजी काँग्रेस भवनांतल्यान आझाद मैदान मेरेन मोर्चा काडलो. तेन्ना पाटकार पत्रकारां कडेन उलयताले.
पहलगाम हल्ल्याक लागून पुराय देशांत खवदळ पडला. ह्या हल्ल्यांत मरण आयिल्ल्यांच्या कुटुंबांतल्या दुख्खांत आमी वांटेकार आसात. अशी घडणूक परतून घडची न्हय हाची पुराय जापसालदारकी केंद्र सरकाराचेर आसा. हे खातीर सगल्या विरोधी पक्षांनीय केंद्र सरकाराक सहकार दाखयला. राज्यांतय चड करून बनावट कॉल आनी हल्ल्याचे संदेश मेळटात. तशेंच राज्य सरकारान ताचे कडेन आडनदर करची न्हय अशें आवाहन पाटकार हांणी केलां.
मजगतीं, पहलगामांत आतंकवाद्यांनी केल्लो हल्लो फकत पर्यटकांचेर हल्लो न्हय, जाल्यार देशाचेर हल्लो केला. हल्ल्या वेळार थंयच्या पर्यटन थळांचेर सुरक्षा कित्याक नाशिल्ली हाची पुराय चवकशी केंद्र सरकारान करपाची गरज आसा अशें महिला काँग्रेस प्रदेशाध्यक्ष डॉ. प्रतिक्षा खालाप हिणें सांगलें. प्रदेश काँग्रेसीचे पदाधिकारी हे रॅलीक हाजीर आशिल्ले.
हज समितीन हल्ल्याचो केलो निशेध
गोंयांतल्या हज समिती सयत सगल्या मुसलमान संघटणांनीय पहलगामांतल्या हल्ल्याचो निशेध केलो. केंद्र सरकारान आतंकवाद्यां आड खर कारवाय करची अशीय मागणी ह्यो संस्था करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
