भांगरभूंय | प्रतिनिधी
दामोदर शेवडे: रियाज अभ्यासांतल्यान योगदान दियात
हरमल: हालींच्या काळांत संगिताच्या मळार खूबशो संदी उपलब्ध आसात. तरणाट्यांनी आपलो फुडार घडोवपा इतलें हें क्षेत्र उंचेल्या दर्जाचें आसा, आनी जितले आत्मियतेन संगीत आत्मसात करतले तितले ज्ञानी जातले. ते खातीर तरणाट्यांनी संगिताच्या सर्तींनी वांटेकार जावन आत्मविस्वास वाडोवचो आनी रियाझ अभ्यास करून योगदान दिवचें अशें ज्येश्ठ संगीततज्ञ दामोदर शेवडे हांणी सांगलें.
दुर्वांकूर कला केंद्र आनी कला संस्कृती संचालनालय आयोजीत दुर्वांकूर अभंग सम्राट सर्तीच्या धारगळ केंद्राच्या उक्तावण सुवाळ्यांत श्रीशांतादुर्गा संस्थानाच्या सभाघरांत ते उलयताले.
दुर्वांकूर संस्थे कडेन म्हजो पोरणो संबंद आसा. खूबशा कार्यावळी निमतान तांचे कार्य लागींच्या पळयलां. पेडणें म्हाल कलाकारांची खण आसा. म्हालांतल्या कलाकारांनी अशा सर्तींनी वांटो घेवंक जाय. नामनेच्या कलाकारां बरोबर संगीत ज्ञान वाडोवपा खातीर आपले यत्न आसूंक जाय अशें शेवडे हांणी म्हणलें.
हरमलची दुर्वांकूर संस्था कला संस्कृती सांबाळपा खातीर पेडणें म्हालांत बरें काम करता. धारगळ पंचायत वाठारांत तांकां उत्स्फूर्त तेंको आसा आनी तांचे वाटचालीक शुभेत्सा आशिल्ल्याचें सरपंच अनिकेत साळगांवकार हांणी म्हणलें.
ह्या वेळार श्रीशांतादुर्गा संस्थनाचे सचीव शिरीश दिवकार हांचेंय उलोवप जालें.
माचयेर ज्येश्ठ कलाकार गजानन कानुलकार, शांतादुर्गा कला केंद्राचे गजानन नायक, दुर्वांकुरचे अध्यक्ष चंद्रहास दाभोलकार, उपाध्यक्ष प्रकाश नायक रामजी हाजीर आशिल्ले.
दुर्वांकूर केंद्राचें कार्य आनी सर्तीं विशीं विस्तारान म्हायती चंद्रहास दाभोलकार हांणी प्रास्तावीक भाशणांतल्यान दिली.
उद्घाटक ज्येश्ठ संगीततज्ञ दामोदर शेवडे हांणी दिवली पेटोवन उक्तावण केलें. संस्थेचे दत्ताराम ठाकूर, आत्माराम कोरकणकार, रामचंद्र केरकार, प्रणव परब, नाना नायक, संजय रघुवीर नायक, सज्जन नायक, विजय बर्डे, देवेंद्र केपकार बी हांणी फुलांतुरो भेटोवन मानेस्तांक येवकार दिलो. सुत्रनिवेदन केंद्र मुखेली अशोक हरमलकार हांणी जाल्यार सचीव अर्जून गडेकार हांणी उपकार मानले.
ह्या केंद्रांतल्यान यशवंत नायक, अजीत नायक, प्रमोद परब आनी परशुराम परब हांची 27 ऑगस्टाक मांद्रेंच्या श्रीभगवती सप्तेश्वर देवळांत जावपी उपांत्यपूर्व फेरये खातीर निवड जाल्ल्याचें चंद्रहास दाभोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
