भांगरभूंय | प्रतिनिधी
आमी हालींच संवसारीक संगीत दीस मनयलो. पूण संगीत आयकुपी वाडल्यात, तशे तें शिकपी वाडूंक नात. ते वाडचे म्हूण गोंय सरकारान दरेके शाळेंत संगीत शिक्षक नेमून व्हड कार्य केलां. ते खेरीज खाजगी पांवड्याचेर बालभवनाच्या माध्यमांतल्यान गोंयभर संगीत शिकपाची सुविधा आसा. हांगाचे हवेंत संगीत भरिल्लें आसा. गोंयान संगीताच्या मळाचेर खूब नांव केलां. एका मंगेशकार कुटुंबाचें योगदान कोणूच विसरूंक शकचो ना. तांचो आमका अभिमान. ताचे भायर कितलेशेच गावपी, वाजोवपी गोंयान संगीत विश्वाक दिल्यात. ते मेजून सोंपचे नात. आमचो विशय आसा, संगीता भितर करियर करपाक भुरगे कशे आकर्शित जातले? अश्विनी जांबावलीकार ही पेटी वाजोवपी गोंयांतली एक ज्येश्ठ कलाकार. पायपेटी वाजोवपी गोंयांतली ती एकलीच बायल. घडये संवसारांतलीय आसत!
ती संगीत वर्ग घेता. आदीं शाळांनी शिकोवपाक वताली. तिका व्हडलें दुयेंस, पूण तरीय ती आपल्या कामांत गुंग आसा. संगीताक लागून म्हाका दुयेंसा कडेन झगडपाक बळगें येता, अशें ती सांगता. आपल्या कामांत तिणें हयगय करूंक ना. ती सांगता, ”गावपाचे दायज आई कडल्यान मेळ्ळें. आवय रंगमाचयेर अभिनया वांगडा गायताली बी. मामा बरो तबलें वाजोवपी. समेळूय बरी वाजयतलो. हाका लागून घरांतलें वातावरण संगीतांत बुडून वतालें.” आवयन अश्विनीबायक उर्बो दिली. ती मडगांवां वचून पेटी शिकली. मागीर निर्मला पै काकोडेन पेटी शिकयली.
ती सांगता, संगीतांत व्हड बळगे आसता. दोतोर पसून उपचार म्हूण संगीता कडेन पळयातत. तुमचो मूड बदलपाची तांक संगीतांत आसता. जे कोण संगीत शिकपाक सोदतात, तांणी मेहनत घेवपाक जाय. हालींच्या काळांत विद्यार्थ्यांक रोखडीच प्रसिद्ध जाय आसता. ही कला कश्ट करपा सारकी. एकेक राग जिणभर शिकपी हांवें पळयल्यात. म्हाका स्वरत्रज्ञान आशिल्लें.
ती सांगता, शास्त्रोक्त शिकपाक हांव मडगांवां गेलें. गांवांतल्यान चलत वचप. मागीर मडगांवची बस धरप. त्रास जाताले. पूण पेटी वाजयतकच सगलें विसरून वतालें. आयज स्वताक संगीत शिक्षक म्हणचे परस हांव स्वताक सरस्वतीदेवीची विद्यार्थी मानता. आयज आमकां संगीतांत गंभीर आशिल्लीं भुरगीं खूब कमी मेळटात. तीं आयतो शिक्षक मेळ्ळा म्हूण येतात काय वेळ पासार करपाक तें कळना. घडये हें सगलें फुकट म्हूण तितलें मनार घेना आसतले. म्हाका दिसता विद्यार्थी कचकचीत पयशे मोडून शिकतात, तेन्ना तो गंभीर आसुंये. आतांचें संगीत शिक्षण उण्या त्रासाचें हेंय एक उदासिनतायेचें कारण आसूं शकता.
तांच्या मतान, रेडियो, टिव्हीचेर गावपाची संद मेळप म्हणल्यार एका काळार उमेद येताली. पूण आतां सोशल मिडिया हातांत आयला. तातूंत सहज चमकूंक मेळटा, म्हूण घडये गंभीर विद्यार्थी मेळनात आसतले. आयज गोंयांत जें शिक्षण मेळटा, ताचो बरो उपेग जायत जाल्यार आमकां बरे गायक मेळपाक शकतात. पेटी, तबलें हीं वाद्यां वाजोवपाक कठीण आसलीं तरी संगीताचो लाव घेवपाचे नदरेन उपेगी पडपाक शकतात. हातूंत तुमकां तालीम लागता. तो सराव सदांच करचो पडटा. तुमकां करियरुय करपाक मेळटा. बरो वादक जाल्यार लोक तुमकां पयस- पयस आपयतात. पेटीवादक आनी गायकाचो एकमेकां कडेन मेळ आसचो पडटा. हें काम तुमी सरावान करपाक शकतात. तुमी स्वताचो वर्ग सुरू करपाक शकतात. व्हडल्या हाॅटेलांनी गिरायकांची मनरिजवण करपाक वादक, गायक जाय पडटात. गोंयांत तर सांस्कृतीक कार्यावळी जायत आसतात. सांगपाचो अर्थ, तुमी बरे गायक, वादक आसल्यार तुमी कामा विणें रावप शक्य ना.
सारंगी, संतूर, व्हायोलीन, बासरी सारकीं वाद्यांय तुमी शिकपाक शकतात. कारण तीं शिकपी गोंयांत कमी लोक आसात. मात हाचो सराव सद्दां करपाक जाय. जितले ल्हान पिरायेचेर तुमी हें वाद्य शिकतले, तितलें बरें. किर्तनकारा इतलोच पेटी वाजोवपी म्हत्वाचो, अशें अश्विनी जांबावलीकार हांचें मत. गायक, वादकाक करियराची संद आसा. पूण एक लक्षांत दवरचें, बऱ्यांतलो बरो कलाकार जावपाचो यत्न करचो, अशेंय ती सांगतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
