भांगरभूंय | प्रतिनिधी
पणजीः ज्ञान प्रबोधिनी मंडळाच्या श्रीमल्लिकार्जून आनी चेतन मंजू देसाय म्हाविद्यालयान पालक शिक्षक संघाच्या जोड पालवान आयोजीत केल्ल्या ‘संगम’ ह्या कला उत्सवांत माशेंच्या एसएस आंगले उच्च माध्यमीक विद्यालयान करंड जिखलो.
‘संगम’ हे कार्यावळींत खेळ आनी सांस्कृतीक अशा विवीध सर्तींचें आयोजन केल्लें. हातूंत रस्तोनाट्य सर्तींत एसएस आंगले उच्च माध्यमीक विद्यालय पयलें, बलराम उच्च माध्यमीक विद्यालय दुसरें जाल्यार श्रीमल्लिकार्जून उच्च माध्यमीक विद्यालयान तिसरो क्रमांक मेळयलो. तशेंच देशभक्ती गीत गायन सर्तींत पयलें एसएस आंगले उच्च माध्यमीक विद्यालय पयलें, श्री मल्लिकार्जून उच्च माध्यमीक विद्यालय दुसरें जाल्यार सरकारी उच्च माध्यमीक विद्यालय काणकोण हांणी तिसरो क्रमांक मेळयलो.
भारतीय लोकनृत्य सर्तींत एसएस आंगले उच्च माध्यमीक विद्यालय पयलें, श्रीमल्लिकार्जून उच्च माध्यमीक विद्यालय दुसरें जाल्यार सरकारी उच्च माध्यमीक विद्यालयाक तिसरें इनाम फावो जालें.
‘संगम’ कार्यावळी निमतान ‘रील निर्मिती’ सर्तीचें आयोजन केल्लें. हातूंत बलराम उच्च माध्यमीक विद्यालय पयलें, एसएस आंगले उच्च माध्यमीक विद्यालय दुसरें आनी श्रीमल्लिकार्जून उच्च माध्यमीक विद्यालय तिसरें आयलें.
तशेंच चल्या खातीर आनी चलयां खातीर विवीध खेळांचें आयोजन केल्लें. हातूंत भुरग्यांच्या धांवपाचे सर्तींत चंद्रहास वेळीप पयलो, प्रणव वेळीप दुसरो आनी पांडू बावधान तिसरो आयलो. चलयांचे धांवपाचे सर्तींत सहेली वेळीप पयलें, गुलाबी वेळीप दुसरें, जाल्यार प्रज्ञा गोसावी तिसरें आयलें.
टेबल टेनीस सर्तींत चल्यांच्या गटांत ज्योएल डायस पयलो, सुशील यमकार दुसरो जाल्यार डेलन डिसोझा तिसरो आयलो. चलयांच्या गटांत गौरवी फळदेसाय पयलें, फ्लारिडा बार्रेटो दुसरें जाल्यार निविता वेळीप तिसरें आयलें.
बॅडमिंटन सर्तींत चल्यांच्या गटांत सुईम जागवेश पयलो, रौनक पागी दुसरो, जाल्यार पियूष देविदास तिसरो आयलो. जाल्यार चलयांच्या गटांत संचिता सैल पयलें, रोनिशा रुजारियो दुसरें जाल्यार नेहा पाटील तिसरें आयलें.
ह्या वेळार म्हाविद्यालयाचे आदले आनी आतांचे विद्यार्थी, पालक शिक्षक संघ, शिक्षक आनी कार्यकारी वर्ग अशें सगल्यांनी मेळून ‘बाजार दीस’ मनयलो. कार्यावळीचें उक्तावण मुखेल सोयरे तशेंच आदले विद्यार्थी समाजसेवक आनी उद्देजक पंकज नायक गांवकार हांचे हस्तुकीं जालें. संगम कार्यावळीच्या जैतिवंतांक ज्ञान प्रबोधिनी मंडळाचे अध्यक्ष चेतन मंजू देसाय हांचे हस्तुकीं इनामां भेटयलीं.
ह्या वर्सा सुरू जाल्ल्या ‘संगम’चे दरवर्सा आयोजन करतले आनी हे कार्यावळी वरवीं विद्यार्थ्यांच्या कलागुणांक उर्बा मेळटली अशें चेतन देसाय हांणी म्हणलें. तशेंच ह्या वेळार पालक शिक्षक संघाचे अध्यक्ष चंदा देसाय, भांडारी प्रसाद नायक गांवकार, म्हाविद्यालयाच्यो प्राचार्य डॉ. सुचेता नायक, संयोजक डॉ. रुपा च्यारी, प्रशासन मुखेली रामादस सावंत, कमलाकर म्हाळशी, दिनार म्हाड्डोळकार, आयक्यूएसचे अध्यक्ष विवीध पावसकार, तशेंच विद्यार्थी आनी सांस्कृतीक प्रतिनिधी समर्थ कोमरपंत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
