भांगरभूंय | प्रतिनिधी
अॅपल -1 येसस्वी जातकच स्टीव आनी वॉझाच्या मनांत अॅपल-2 तयार करपाचो ध्यास लागलो. तांणीं माइक मारकुला नांवाच्या पयशेकारा कडेन आपल्या वेवसायांत गुंतवणूक करपाचो प्रस्ताव मांडलो. जो ताणे मान्य केलो.
माइक मारकुला कडल्यान स्टीव वेवसायांतली तीन म्हत्वाचीं तत्वां शिकलो. पयलें म्हणल्यार – गिरायकाच्यो गरजो समजून घेवन तांच्या गरजेप्रमाण चिंतून म्हाल तयार करपाचो. दुसरें – जें काम हातांत घेतलां तें बरे तरेन करपा खातीर थंयच म्हत्वाच्या गजालींचेरच आपलें लक्ष केंद्रीत करप आनी तिसरें म्हणल्यार – आपलें, कंपनीचें आनी आपल्या म्हालाचें सादरीकरण. हीं तीन तत्त्वां स्टिवान जल्मभर लक्षांत दवरलीं आनी आपणायलीं. तेंच अॅपल कंपनीच्या यशाचे गमक अशें ताचें म्हणणें आशिल्लें.
रॉब जॅनोफ नांवाच्या एका एजन्सीच्या कलानिर्देशकाक तांणी अॅपलाचें नवें प्रतीक चिन्न करपाचे काम दिलें. रंग क्षमता हें अॅपल संगणकाचें वैशिश्ट्य आशिल्ल्यान ताकां ते प्रतीक चिन्नांतल्यान दाखोवपाक जाय आशिल्लें. ते खातीर ताणें एक घास मारून कुडको काडिल्लें सफरचंद काडून स रंगान आनी त्या सफरचंदाचो देंठ पांचव्या रंगान रंगयलो तें प्रतीक चिन्न स्टीवाक खुबूच आवडलें.
3 जानेर 1977त ताणीं अॅपल कंपनीचे शेअर मार्केटांत हाडले. डझन भर कर्मचारी घेवन तांणी आपलें ऑफिस जॉब्स गॅरेजींतल्यान कुपर्टिनो कॅलिफॉर्निया ह्या भाड्याच्या ऑफिसांत व्हेलें. कंपनीचें काम पळोवपाक माइक स्कॉट नांवाचो एक मॅनेजर मारकुलान नेमलो. अॅपल-2 संगणक 30 एप्रील 1977 मेरेन विक्रेक तयार जातलो अशें ताणीं जाहीर केलें. पूण पयशे सोंपत आयिल्ल्यान मॅनेजर माइक स्कॉटान जायत्या खर्चांत काटछाट केली. संगणका वांगडा दिवपाचें मॅन्युअल बरें डिझायन करून छापून घेवपाचें स्टिवाच्या मनांत आशिल्लें. पूण ताच्या मना विरुध्द माइकान तें थंयच टायप करून छापपाक लायलें. पूण एक संगणका वांगडा एक वर्साची हमी मात स्टिवान दिवपाचे थारायलें. मारकुलाच्या पयल्या तत्वा प्रमाण कंपनीन गिरायकाच्या कलान आनी सहानुभुतीन वागपाचें उतर स्टिवान पाळ्ळें.
एप्रील 30 तारखे सावन विक्री सुरू जाली आनी दरेक म्हयन्याक तांची विक्री वाडतच गेली. अशे तरेन अॅपल चाहत्यांचो व्हडलो वर्गच तयार जालो.
उत्पन्न वाडलें तशें स्टिवान आपल्या बापायलें घर सोडून रावपाक एक भाड्याचें घर घेतलें आनी डॅना वांगडा थंय रावपाक लागलो. ताची हायस्कुलांतली गर्लफ्रॅन्ड क्रिसानूय ताच्या वाठारांत रावपाक आयली आनी तांची परत जोडी जमली. कंपनीन कुपर्टिनाक आशिल्ल्या आपल्या ऑफिसा परस पंदरा पटिनीं व्हड ऑफिस भाड्यान घेतलें. वेवसाय भरमसाट वाडोवपाची स्टिवाची योजना आनी हावेस आशिल्लो. वॉझाक आनी माइक स्कॉटाक ती तितली मानवली ना.
स्टिवान आतां अॅपल-3 तयार केलो तो चड म्हारग आशिल्ल्यान लोकांक तितलो पसंत पडलो ना. स्टिवान ‘लिसा’ नांवाचो संगणक तयार करपाक घेतलो. लिसा ताचें आनी क्रिसानाचें चली. क्रिसानाचें आनी ताचे रोकडेंच बिंगसळिल्लें आनी लिसाक आपले वांगडा घेवन क्रिसान ताका सोडून गेल्लें. आपल्या चलयेच्या यादीन ताणें आपल्या संगणकाक लिसा हें नांव दिल्लें.
अॅपल कंपनींत जॅफ रस्कीन नांवाचो एक इंजिनिअर तेच वेळार मॅकिनतोश नावाच्या संगणकाचेर काम करतालो. स्टिवाचे नदरेंत जेफ भोजो आशिल्लो देखून तो ताका दोळ्या मुखार नाका आशिल्लो.
डिसेंबर 1979 त ते झेरॉक्स पार्क कंपनींक भेट दिवपाक गेल्ले कडेन ते कंपनीची ग्राफीक युजर इंटरफेस आनी ती चलोवपाक वापरांत येवपी तीन बटनाचो माउस ताका सामको आवडलो. म्हूण ताणे दोन बटन आनी एक बॉल आशिल्लों एक वेगळे डिजायनाचो माउस तयार करून घेतलो आनी मॅकिनतोशांत वापरांत हाडलो.
12 डिसेंबर 1980 त अॅपलान, 22 डॉलर प्रती शेअर दरान आय.पी ओ काडले जो तेच दिसा 29 डॉलर इतलो चडलो. स्टीव आतां 26.5 कोटी डॉलर्सांचो धनी जालो आनी कंपनीचे 40 कर्मचारी लक्षाधीश जाले. फकत पंचवीस वर्सांचो स्टीव जॉब्स नामनेच्या इंक आनी टाइम्स मॅगझिनाच्या कव्हराचेर झळकलो. लॉस गॅटोस हांगासर ताणें स्वताचें घर विकतें घेतलें, पूण थंय लेगीत ताणें राहणीमान सादेंच दवरलें.
बारीक-सारीक कारणां वयल्यान तो भडकतालो म्हूण ऑफिसांत ताचे वांगडा काम करपाक जायते जाण बेजारताले. मेकिनतोश प्रकल्पाचेर जेफ काम करतालो. स्टिवाक तो प्रकल्प आपल्या कडेन घेवंक जाय आशिल्लो. म्हूण त्या कारणां वयल्यान तांचें दोगांयचेय बरेंच पेटलें. कंपनीचो अध्यक्ष माइक स्कॉट मदीं पडलो. स्टीव ल्हान भुरग्या भशेन रडलो आनी माइकान जेफाक थोडे तेपा खातीर सुटयेर वचपाक सांगलें. जेफ अॅपल कायमचोच सोडून गेलो. स्टिवान आपली टीम केली आनी मेकिनतोशाचेर काम करपाक सुरू केलें. मात्शें म्हारग आसल्यार जाता पूण सर्वोत्कृश्ट म्हाल वापरून, कलात्मक रितीन तो तयार करपाची ताची मोख आशिल्ली.
अॅपल कंपनींतल्यान राजीनामो
अॅपल -3 संगणकाच्या अपेसा खातीर कंपनीक बरेंच लुकसाण सोसचें पडलें. माइक स्कॉटान चाळीस कर्मचाऱ्यांक कामां वयल्यान काडले. तो दीस अॅपल कंपनींत ‘ब्लॅक वेनस्डे’ म्हूण वळखतात. कांय म्हयन्यांनी माइक स्कॉटान स्वता राजनामो दिलो. दोन वर्सां उपरांत ‘जॉन स्कली’ नावाच्या व्यक्तीक ताणीं कंपनीचो अध्यक्ष म्हूण नेमलो.
अॅपल कंपनींत मेशिन्तोश आनी लिसा संगणकाचेर काम चलतालें. लिसा पयलीं तयार जालो. लिसाच्या लोकार्पणच्या दिसा मेकिन्तोश बद्दल ताका कांय उलयनाका म्हूण स्कलीन सांगिल्लें आसतना ताणें मेकिन्तोशाचो उल्लेख केलोच. लिसाची किंमत सोळा हजार डॉलर आशिल्ली. मेकिन्तोश ताचे परस सवाय आशिल्ल्यान थोडे दिस रावन तोच घेवया अशी लोकांची मानसिकता जाल्ल्यान लिसाच्या विक्रीचेर परिणाम जालो.
मेकिन्तोश एक हजार डॉलरांत विकपाची स्टीवाची मोख आशिल्ली. पूण ताचो खर्चच इतलो जालो कीं स्कलीन ताची किंमत अडेज हजार डॉलर दवरपाक सांगली. त्या मुद्द्याचेर स्टीवाचे संबंद स्कली कडेनूय ताणले.
1984 क जेन्ना मेशिन्तोश विक्रेक तयार जालो तेन्ना नामनेचो निर्देशक रिडली स्कॉट हांकां जायरात करपाक दिली. पस्तीस वर्सां आदीं जॉर्ज ऑरवेल्सा हांणी बरयिल्ल्या 1984 ह्या भविश्यवादी कादंबरीचेर आदारीत, ते क्रांतीकारी जायरातीचें बजेट आशिल्लें णव लाख डॉलर्स. 1984 वर्साच्या जानेराच्या 24 तारखेक मेशिन्तोश बाजारांत येवपाचो आसा अशें तांणी जायरात फिल्मांत सांगलें. स्कलीक ती जायरात मात लेगीत आवडली ना. ताणें ती टेलिविजनाचेर येवची न्ही हे खातीर जायते यत्न केले. पूण जेन्ना ती आयली तेन्ना त्या जायरातीन सगळे रिकॉर्ड मोडले आनी जायते पुरस्कारूय मेळयले.
कांय दिसांनी कुपर्टिनोच्या फ्लीन्ट सभाघरांत स्टीवान मेकिन्तोशाचें भपकेबाज लोकार्पण केलें. मेकिन्तोशाची विक्री दबाजांत सुरू जाली. पूण कांय दिसांनी मेकिन्तोशाचें वारें मात्शे कमी जालें. अॅपलाच्या कर्मचाऱ्यां मदींय फूट पडूंक लागिल्ली. तातूंत स्कली वांगडा स्टीवाचे संबंद चडूच ताणले. स्टिवान बॉर्डांच्या सदस्यांक आपले आनी स्कली भितर निवड करपाक सांगलें आनी ताणीं स्कलीक निवडलें. स्टिवाक कंपनींतल्या भायर मारले ना. पूण ताका कसलोच
प्रकल्प दिनासतना एक ऑफिस दिवन बेकार बसयले. आपणेंच उबारिल्ल्या
कंपनींत आपल्याचेर असली वेळ आयली तें पळोवन ताका सामकें वायट दिसलें. तो ऑफिसांत येवन दोन-तीन वरां भितर घरा परततालो. 17 सप्टेंबर 1985 ताणें राजनामो दिलो.
मंजुषा सिनाय तळावलीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
