भांगरभूंय | प्रतिनिधी
संकश्ट फक्त भायल्या परिस्थितींतल्यान येना, तें अचकीत वैयक्तीक जिणेंतूय प्रवेश करता.
मनशाचें जिवीत कितलेंय नियोजीत आसलें तरी दर एका खिणाक कितें तरी अनिश्चीत घडपाची शक्यताय सदांच आसता. मनीस फाल्यांचें सपन पळयत, येवजण्यो आंखता आनी फुडार सुरक्षीत दवरपाचो यत्न करता. पूण फुडारांत नशिबाच्या पटाचेर घडपी सगल्यो हालचाली वा गजालींची ताका पयलीं मात लेगीत मेळना. देखूनच संकश्टां अचकीत येवन आमचीं मर्यादा, धैर्य आनी बळगें हाची जाणविकाय करून दिता. मनशाच्या इतिहासाचेर नदर मारल्यार जायतीं उदाहरणां मेळटात. कांय वर्सां आदीं संवसारांत आयिल्ली COVID-19 जागतीक म्हामारी हें ताचें जिवी देख. कोरोना एका अदृश्य जिवाणून पुराय संवसार थांबयलो, जागतीक अर्थवेवस्था हाल्ली, लाखांनी लोकांचें जिवीत बदल्लें आनी लाखांनी लोक संवसारांतल्यान अंतरले. हें अचकीत अरिश्ट येतलें हाची कोणाकूच कल्पना नाशिल्ली.
पूण ह्या संकश्टान मनशाक धीर, सहकार आनी विज्ञानाचेर विस्वास दवरपाचें म्हत्व शिकयलें. संकश्टाक लागून भंय निर्माण जालो, पूण मनीसपणाचे सोबीत पैलू उक्ते जाले. सैमाच्या मुखार मनीस चड करून असहाय्य आसता. भुंयकांप, हुंवार, दुकळ आनी चक्रवादळ सारकिल्ल्याे आपत्ती अचकीत येतात. Indian Ocean tsunami सारकिल्ल्या प्रलयकारी घडणुकांनी एका खिणाक हजारांनी कुटुंबांचो विध्वस केलो. शांत दिसपी दर्या अचकीत हिंसक जावन मनशाच्या जिविताची नाजूकपणा दाखवोन दिता. अश्यो घडणुको मनशाक सैमा कडेन एकचारान जगपाची आनी पर्यावरण सांबाळपाची शिटकावणी दिता.
संकश्ट फक्त भायल्या परिस्थितींतल्यान येना, तें अचकीत वैयक्तीक जिणेंतूय प्रवेश करता. नोकरी वचप, अपघात, गंभीर दुयेंसाचे निदान वा प्रीय व्यक्तीक मरण येवप ह्यो सगल्यो घडणुको शिटकावणी दिनासतना घडूंक शकतात. अशा वेळार मनशाच्या मानसीक बळग्याची खरी चांचणी जाता. कांय जाण थकतात, जाल्यार कांय जाण ह्या संकश्टातल्यान भायर सरून नव्यान सुरवात करतात. संकश्ट हें व्यक्तीमत्व घडयता आनी परिपक्व करता. इतिहासांतल्या जायत्या व्हड मनशांनी संकश्टांक तोंड दिवन येस मेळयलां. छत्रपती शिवाजी महाराज हांचें जिवीत ताचें एक जिवंत उदाहरण. दुस्मानाचे हल्ले, विश्वासघात आनी बंदखण अश्यो जायत्यो अडचणी आसून लेगीत ताणें धैर्य सोडलें ना. संकश्टाच्या काळांत ताणें धीर आनी चातुर्यान स्वराज्याची बांदावळ केली.
संकश्ट येतात तेन्ना मनशाक दोन पर्याय आसतात. पळून वचप वा घट्ट उबो रावन परिस्थितीचो स्विकार करून तातूंतल्यान भायर सरपाचो मार्ग सोदप. जो दुसरो मार्ग स्विकारता, तोच मुखार वता. संकश्ट हें सदांच नाशाचें प्रतीक न्हय; तें बदल घडोवपाचें आनी नव्यान सुरवात करपाचें दार आसता. संकश्टांतल्यान जायते आविश्कार, नवे उद्देग आनी नवे विचार जल्माक आयल्यात. अर्थीक मंदीच्या काळांत जायत्या जाणांनी नवे वेवसाय सुरू करून नव्या तंत्रगिन्यानाचो प्रयोग केलो. म्हणल्यार संकश्टां सृजनशीलते खातीरय प्रेरणा जावंक शकतात.
मनशाच्या आत्म्याचें बळगें संकश्टाच्या काळांत चड दिसून येता. आशावाद, आत्मविस्वास आनी परस्पर आदार हांचो व्हड अडचणींवर मात करपाक उपयोग जाता. कुटूंब, इश्ट आनी समाजाचो आदार मेळ्ळ्यार संकश्टाचें वजें हलकें जाता. “एकवट म्हणल्यार बळगें” ही संकल्पना अशा काळांत चड खरपणान जाणवता. संकश्टां टाळूंक मेळनात, पूण ताचे खातीर तयार रावप शक्य आसता. योग्य नियोजन, अर्थीक शिस्त, भलायकी जतनाय आनी सकारात्मक विचार मनशाक मानसीक नदरेन घटमूट करता. शिक्षण आनी जागृताय संकश्टाचो परिणाम उणो करपाक मजत करतात, तर आपत्ती वेवस्थापनाची तयारी केल्यार सैमीक संकश्टांचो परिणाम उणो जाता.
निमाणें “संकश्टां सांगून येनात” ही म्हण जिवीताच्या अनिश्चिततेची याद करून दिता. जिवीत अनिश्चीत आसता आनी ताची सोबीतकाय अनिश्चिततायेंत आसता. म्हजे मतान संकश्ट येतलें तरी तांचे कडल्यान शिकप, स्वताक चड सक्षम करप आनी तांकां भियेनासतना नव्यान आशेन मुखार वचप हेंच खरें तत्व. संकश्ट हें शेवट न्हय, तर नव्या अध्यायाची सुरवात. धैर्य, धीर आनी सकारात्मक वृत्तीच्या आदारान मनीस खंयच्याय संकश्टाचेर मात करून बळिश्टपणान भायर सरूंक शकता.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
