भांगरभूंय | प्रतिनिधी
मनशाक कसलें तरी निमित्त जाय पडटा. कोण तरी ताका वाचपाची संवय लायता, कोण व्यायामाची, कोण भोंवडेक
वचपाची…. ह्यो जश्यो बऱ्यो संवयी आसतात, तश्यो वायट गजालींची संवय लेगीत आमकां कोण तरी लायता. मागीर तें ड्रग्साचें आसूं नाजाल्यार सोरो वा जुगाराचें. करियर करतल्याक मात बऱ्या घडणुकींच्या गजालींची संवय लागपाक जाय. आनी ह्यो संवयी आपुण लावन घेतलो अशे संकल्प आमी सोडूंक जाय. ते पुराय करपाक फाटल्यान लागूंक जाय. तरूच त्या संकल्पाचो फायदो.
आतां चालू वर्स पोरणें जातलें आनी ताच्या बदल्यांत नवें वर्स येतलें. ह्या निमतान आमी भेट म्हूण डायरी दितात, तशी आमकांय बी कोण दिता. हे डायरेचो तुमी बरोवपाक उपेग करचो, अशी अपेक्षा आसता. तुमी सुरवातीकूच जो संकल्प सोडला, ताचो उल्लेख करप आनी त्या प्रमाण वागप. अशें म्हणतात की जर तुमी एखादी बरी संवय लागची अशें चिंत्तात तर शिक्षण तज्ञ सांगतात की 21 दीस तरी तुमी तें करीत रावपाक जाय. कितले दीस करप हाका महत्व आसाच, पूण म्हाका दिसता ह्या नव्या वर्सा तुमी बरी संवय आपणावपाची थारायली तर वर्स सोंपतना तुमचे कडे बऱ्या संवयींची भरपूर यादी आसूंक शकता.
तुमी जो फांटो निवडपाचे काम आसा ते बेगुनुंच जावपाक जाय. मागीर तयारी करपाक तुमका सोपे जातले. तान लागली कि बाय खणप हि मानसिकता चलचिना. यवजण आदी पासूनच करपाक जाय. धरून चला तुमका बॅंकेन नोकरी करपाक जाय तर आदीपासुनुच. हालींच चार्ल्स शोभराज (७८)हाची सुटका करची म्हून नेपाळच्या सुप्रीम कोर्टान आदेश दिला. हाणे काय गोव्यान गुन्याव करूंक नासलो पूण पर्वरीच्या ओ कोकेरो हॉटेलान ताका निरीक्षक मधुकर झेंडे हाणे ताका धरलो आनी गोयचे नाव सगळ्याक पावले. १९८६ तली हि गजाल. हाचेर माधव गडकरी हाणे नाटकूय बरयले. हातून भितर एक गजाल म्हळ्यार झेंडे कित्याक चार्लसाक धरुंक पावलो? गोवे काय तेन्ना आता इतके फामात नाशिल्ले. पूण ओ कोकेरो ह्या होटेलान तेन्ना बरी दूरध्वनी यंत्रणा आशिल्ली. तुमी हांच्या मजतीन खय फोन करू शकताले. झेंडेन अदमास केलो कि चार्लस ह्या सुवातीचेर जरूर येतॊलो आनी झेंडेन फुडलें काम केले. पोलीस जाव हेर फांटो अदमास काडप ह्ये गरजेचे आसा. ह्ये तुमका केन्ना शक्य जातले ? एक म्हळ्यार अभ्यासातल्यान आनी दुसरे म्हळ्यार अद्यावत रावत जाल्यार. सदाची दिसाळी वाचत जाल्यार ह्ये काम जावं शकता. आमी वाचताना अभ्यास ह्या नजरेन ती वाचीनात. नव्या वर्साक तुमी अद्यावत रावपाचो संकल्प सोडू येता. आता आधुनिक तंत्रज्ञाना खातीर घरा बसून तुमी ह्ये काम करू शकता. वाचताना पेन डायरी/कादेर्न हाती कडे दवरचो. तुमचो संकल्प हो नवे कितें तरी शिकतोलो ओसो आसल्यार चड बोरो. देखीक तुमका जर चार व्हीलर चलोवपाक येना तर शिकपाचो प्रयत्न करचो हातूंत ल्यान तुमी स्वावलंबी जावपाच्या नजरेन पावल घालतात. आयज काल दुचाकी चार चाकी वाहन चलोवपाक तुमका येवकूच जाय. ती गरज जावन गेल्या. नव्या वर्साचे स्वागत करताना पोरन्या वर्षातल्यो वायट गजाली पैस दवरपाची मोख तर आसपाक जाय खेरीज नवी बरी सवय लागपाचो प्रयत्न जावपाक जाय. हाली जायत्ये तरणाटे दोनपारच्या लागी उठताना दिसता पूण जर तुमका जागरण करचे ना , वो रातचे जागे रावचे पडना जाल्यार बेगीन उठपाचो संकल्प सोडू येता. आपूण वेळ फुकट घालवचो ना हो संकल्प लेगीत तुमका उपेगी पडू शकता.ताशे संकलपाखातीर जायत्ये उपक्रम सुचवपाक जाता पूण आरोग्य आहार हांचेर तुमी भर दिवपाचो प्रयत्न जरूर करचो करियराक ह्येच गुण जाय आसता. कारण नास्ताना निदप हातूंतल्यान तुमी खात्रीन आळसी जातले हातून दुबावूच ना. असल्यो वायट सवयी फुडाराक त्रासक जातात ह्ये मतीन आसू दी. नव्या वर्षाची सगळ्यांक परबी.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
