भांगरभूंय | प्रतिनिधी
कसलीय वेंचणूक म्हणली काय तिका उत्सवाचेंच रुप आयिल्लें आसता. जात्रा, सण, परबांनी करोडांनी रुपयांची उलाढाल जाता. वेंचणुकोय ताका आडवाद नात. 2019 चे लोकसभा वेंचणुकेंत 60 हजार कोटी रुपया खर्च जाल्यात, अशे आंकडे म्हणटात. सामान्य लोकांच्या, पक्ष वावुरप्यांच्या बोल्सांतूय चार पयशे पडटात. ताका लागून वेंचणुको ह्यो परत- परत जावपाक जाय, असो मतप्रवाह कांय लोकां मदीं आसा. तर दुसरे वटेन देशाचो मोलादीक पयसो सद्दां उठून वेंचणूक घेवन मोडपाक जायना. आमदारांनी पक्षांतर करतकूच जागो रिकामी जालो जाल्यार तो पुराय खर्च वेंचणुकेक जापसालदार आशिल्ल्या लोकप्रतिनिधी कडल्यान घेवपाक जाय, अशें कांय जाणांचें मत. हालींच्या कांय वर्सांनी आमच्यो लोकसभा, विधानसभा वेंचणुको साबार पांवड्यांनी जाताल्यो. म्हणल्यार आयज अमूक मतदारसंघांनी मतदान, तर फाल्यां दुसऱ्या मतदारसंघांनी. हाचेर टिका करीत जाल्यार भारताची लोकसंख्या व्हड, देखून सुरक्षा वेवस्थेक लागून त्यो तश्यो घेवच्यो पडटा. एकाच दिसा वेंचणूक घेवप शक्य ना, अशें कांय जाण म्हणटाले. मात, आतां ‘वन नेशन, वन इलेक्शन’ संकल्पना मुखार आयल्या. ताका विरोधूय जाता आनी समर्थनूय मेळटा. एकाच दिसा वा एकाच सप्तकांत ह्यो लोकसभा, विधानसभा, पालिका, पंचायत वेंचणुको जातल्यो. अर्थांत त्यो पांवड्या- पांवड्यान जातल्यो काय एकाच दिसा मतदान आसतलें, तें अजून स्पश्ट जावंक ना. आदले राष्ट्रपती राम नाथ कोविंद हांचे अध्यक्षते सकयली समिती हाचेर विचार करता.
विरोधकांक हातूंत छुपें राजकारण दिसता, मात सामान्य भौसाक दर दोन वर्सांनी लायनींत रावचे परस एकदांच, एकाच वेळार मतदान करप बरें दिसता. सरकारी पयशांची बचत जाता, अशें ते म्हणटात. सरकारां खर्च करतात, तो चडसो पयसो लोकांच्या टॅक्सांतल्यान जमयिल्लो. म्हणटकूच एकाच वेळार वेंचणूक जायत जाल्यार व्हड प्रमाणांत बचत जातली. कांय जाणांक पंच ते आमदार, खासदारा मेरेन सगल्यांचो एकाच वेळार ‘आशिर्वाद’ मेळटलो. पूण, देशाचो पयसो वाटावतलो, तो उदरगतीच्या कामांचेर खर्च जावंक जाय, हें तितलेंच खरें. मतदानाचो वाज आयिल्ल्यांक एकूच दीस 2 वा 3 उमेदवार वेंचून काडपाक आवडटलें. वेंचणुके वेळार सरकारी कर्मचारी, शिक्षक हांकां कामाक लायतात. ‘वन नेशन, वन इलेक्शन’ संकल्पने खाला तांकां एकूच फावट वावुरचें पडटलें. कारण ही प्रक्रिया उणीच म्हयनोभर तरी चलता. कर्मचारी घुस्पून उरिल्ल्यान उदरगतीचीं कामां सवकासायेन जातात, तें बंद जातलें. आचारसंहितेक लागून दरवर्सा कांय दीस सगलें प्रशासनूच ठप्प जाता, हें आमी विसरूंक फावना. सुरक्षा वेवस्थेचेर ताण येता. प्रचाराक लागून आवाजाचें प्रदुशण जाता, तें तशें उणें जालां. मात, हे संकल्पनेक लागून तें आनीक कमी जातलें. वेंचणूक प्रचारा वेळार गांवांनी कोडसाण येता. मतां आपल्या पक्षाक मेळचीं म्हूण कांय पक्ष नाका जाल्लें करतात, मतदारांचे ध्रृवीकरण करपाचो यत्न जाता, हिंसाचार जाता…. तेंवूय उणें जातलें. निरोगी समाजा खातीर हें खूब फायद्याचें.
सोमारा 18 ते 22 सप्टेंबर मेरेन संसदेचें खास अधिवेशन आपयलां. तातूंत वन नेशन, वन इलेक्शनाचो (आनी घडये सरकारी कामकाजांत देशाचें नांव भारत करपाचो) निर्णय जावपाची शक्यताय जाणकार उक्तायतात. गोंय राज्य ताका तयार आसा, अशें मुख्यमंत्री प्रमोद सावंत हांणी जाहीर केलां. विकासकामां मुखार आडमेळीं येतात, तीं पयस जातलीं. देखून ही वेंचणुकेची नवी संकल्पना देशाचे उदरगती खातीर फायद्याचीं, अशेंय तांणी म्हणलां. कांय विरोधकांच्या मतान एकाच वेळार वेंचणुको जाल्यो जाल्यार राज्यांतल्या राजकी पक्षांची प्रादेशीक अस्मिताय आसा ती नश्ट जातली. थळावे मुद्देय फाटीं पडटले. कारण लोकसभा वेंचणुकांनी देश पांवड्या वयले मुद्दे, प्रस्न पूर्ण प्रचार आपल्या चपक्यांत दवरतात. थंय प्रादेशीक मुद्द्यांक दुय्यम स्थान मेळटलें, अशी भिरांत कांय पक्षांक दिसता. राज्यां वयलो तांचो शेक ना जायत ही भिरांतूय मनांत आसा. थोड्यांक हातूंत हुकूमशायेचीं बियां दिसतात. तरीय भोवसंख्यांक ‘वन नेशन, वन इलेक्शन’ संकल्पना मानवल्या. कितेंय जालें तरी आमची परिस्थिती तशी रातयां सुदारची ना, असो न्हयकारात्मक विचारूय थोड्यांच्या मनांत खेळटा आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
