भांगरभूंय | प्रतिनिधी
खबरां संस्था
मेलबर्नः संवसारीक क्रमवारींत पयले सुवातेर आशिल्ल्या इगा श्र्वी ऑटेकाक ऑस्ट्रेलियन ओपन टॅनीस सर्तीत संवसारीक क्रमवारींत 50वे सुवातेर आशिल्ल्या लिंडा नोस्कोवा कडल्यान हार खावची पडली. बायलांच्या गटांत हेर मॅचींत व्हिक्टोरिया अझरेन्का, चीनाची किनवेन झेंग आनी युक्रेनच्या एलिना स्वितोलिना हांणी जैत मेळोवन उपउपांत्यपूर्व फेरयेंत प्रवेश केलो. दादल्यांच्या गटांत स्पेनाचो दुसरो सिडेड कार्लोस अल्कराझ, तिसरो सिडेड डॅनील मेदवेदेव आनी पोलांचो हर्बट हुरकाझ हांणी फुडलें फेरयेतली आपापली सुवात निश्चीत केली.
बायलांचे एकोडींत जेतेपदाची मुखेल दावेदार आशिल्ले ऑटिक आपली मॅच जिखून फुडें वतली अशें दिसतालें.मात चेक प्रजासत्ताकाच्या नोस्कोवान ताका 3-6, 6-3, 6-4 अशें हारोवन सगल्यांत धपको दिलो. चार ग्रँडस्लॅमांत जैत मेळोवपी ऑटेक ऑस्ट्रेलियन ओपन टॅनीस सर्तीच्या उपांत्य फेरयेच्या फुडें वचपाक शकली ना. 19 वर्सा पिरायेच्या नोस्कोवान पयलेच फावट हे सर्तीच्या मुखेल फेरयेंत खेळटा.
श्र्वी ऑटेकान पयले फेरयेंत 2020ची ऑस्ट्रेलियन टॅनीस जैतिवंत सोफिया केनीन आनी 2022 वर्सा सर्तीचे फायनलींत पावल्ले डॅनिलय कोलिन्स हांका हारयल्लें. नोस्कोवा आडचे मॅचीत ताणे पयलो सेट जिखून सुरवात बरी केल्ली. मात उपरांत ताका आपली लय राखपाक जमलें ना. दुसऱ्या सेटांत नोस्कोवा सातवे गेमींत ब्रेक पायंट वाटयतना मॅच बोरोबोरींत हाडली आनी तिसरो सेट जिखून जैत मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
