श्वीऑनटेकाचें तिसंरे फ्रेंच वस्तादपण खडेगांठ मॅचींत कॅरोलिना मुचोव्हचेर मात 

भांगरभूंय | प्रतिनिधी

खबरां संस्था
पॅरीश- पोलंडाची अव्वल खेळगडी इगा श्वीऑनटेकान चेक प्रजासत्ताकाच्या कॅरोलिना मुचोव्हाचे आव्हान मोडून काडून तीन सेटांचे झुंजांत ताका 6-2, 5-7, 6-4 अशें हारोवन फ्रेंच उक्त्या ग्रँडस्लॅम टॅनीस सर्तीत फाटल्या चार वर्सांत तिसरें वस्तादपण मेळयलें. वस्तादपण राखपी  श्वीऑनटेक हे दुसरें बायल टॅनीस खेळगडी थारलां. हाचे पयलीं 2007 वर्सा जस्टिन हेनिनान अशी कामगिरी केल्ली. सर्तीत एकूय सेट वोगडायनास्तना फायनलींत पावल्ल्या श्वीऑनटेकाक फायनलींत मात एक सेट वोगडावचो पडलो. ताचे कारकिर्दींतलें हें चवथें ग्रँडस्लॅम आसा.
दुसरी सिडेड आरिना सबालेन्काक हारोवन पयलेच फावट फायनलींत पावल्ल्या मुचोव्हा कडल्यान श्वीऑनटेकाक प्रतिकार जातलो हें अपेक्षीत आशिल्लें मात श्वीऑनटेकान दोन फावट सर्व्हिस तोडटना पयलो सेट जिखून दमदार सुरवात केली. विशेश म्हणल्यार दुसऱ्या सेंटांत दुसरेच गेमांत ब्रेकाची संदी सादून श्वीऑनटेकान 3-0 अशी आघाडी घेतिल्ली. मात जिगरबाज मुचोव्हान उपरांत सेगीत तीन गेम जिखून बोरोबोरी केली. फुडें दोन फावट श्वीऑनटेकाची सर्व्हिस तोडून मुचोव्हान दुसरो सेट जिखलो. ताणे दाखयल्ली आक्रमकता जबरदस्त आशिल्ली. मुचोव्हाचे ओव्हरहेडचे फटके श्वीऑनटेकाचो कस पळयताले. नेटाचेर येवपाचें धाडस लगीत येसस्वी थारलें. तिसऱ्या सेटांत मुचो्हान पयल्याच सेटांत ब्रेकाची संद सादून श्वीऑनटेका सामकार आनीक आव्हान उबें केलें. मात अणभवी श्वीऑनटेकान संयय राखलो आनी चवथ्या आनी धावे गेमींत ब्रेकाची संद सादून तिसऱ्या सेटा कयत जैताचेर शिक्को मारलो.