भांगरभूंय | प्रतिनिधी
खबरां संस्था
रांचीः दुसरे वन-डेंत दक्षीण आफ्रिकेक 7 विकेटींनी हारोवन तीन वन-डे माळेंतलें आपलें आव्हान जितें दवोरपाक भारत येसस्वी थारलो. तिसरे विकेटी खातीर इशान किशन आनी श्रेयस अय्यर (नाबाद 113) हांणी 161 धांवड्याची भागिदारी केली आनी तीच निर्णायक थारली. हँडिक्स आनी मार्कराम जोडयेन तिसेर विकेटी खातीर 129 धांड्यांची भागिदारी करून दक्षीण आफ्रिकेक साल्वार केल्लें. इशान- श्रेयस हे तिसरे जोडयेन पंगडाक जैत मेळोवन दिलें. श्रेयस- संजू सॅमसन (नाबाद 30) हे चवथे जोडयेन जैताचे सोपस्कार पुराय केले.
शिखर धवन (13) आनी शुभमन गील (28) ह्या ओपनरांक पामेल आनी रबाडान आवट करून भारताक सुरवेक धपके दिल्ले. उपरांत इशान- श्रेयस जोडयेन बॅटिंगेचीं सगळी सूत्रां आपल्या हातांत घेवन दक्षीण आफ्रिकेच्या बॉलरांक धुवून काडलें. 84 बॉलांत 7 सके आनी 4 चौक्यांनी 93 धांवड्यो करपी इशानाचो शेंकडो हुकलो. मात ताणे पंगडाक दोट्टी शेंकड्याचेर व्हरून दवोरलें. श्रेयसान नाबाद 113 धांवड्यो केल्यो. तातूंत 15 चौक्यांचो आसपाव आसा. पयले वन-डेत हार खावची पडिल्ल्यान ही वन-डे जिखपाचें आव्हान भारता सामकार आशिल्लें. दक्षीण आफ्रिकेन ते खातीर 279 धांवड्याचें लक्ष्य दिल्लें. भारतान 45.5 ओव्हरींत तें हातासलें.
हँड्रिक्स- मार्करामाची 129ची भागिदारी
रिजा हँड्रिक्स आनी एडन मार्कराम हांणी तिसरे विकेटी खातीर केल्ल्या 129 धांवड्याचे भागिदारीक लागून भारता आडचे दुसरे वन-डेत दक्षीण आफ्रिकेन आपल्या डावांत 7 बाद 278 धांवड्यो केल्यो. हे मॅचींत पंगडाचें फुडारपण करपी केशव महाराजान टॉस जिखून पयलीं खेळपाचो निर्णय घेतलो. तांची सुरवात बाबत जाली. ओपनर क्विटन डिकॉक (5) आनी मलान (25) सवाय भितर आवट जाले. 10 ओव्हरींत 40 धांवड्यांत दोन बॅट्समन आवट जाल्या उपरांत आफ्रिकेनस सादूरपणान बॅटिंग करपाक सुरवात केली. मार्कराम आनी हँड्रिक्सान व्हडली भागिदारी करपाक सुरवात केली. हँड्रिक्सान पयलीं अर्द शेंकडो केल्या उपरांत मार्करामान अर्द शेंकडो करून तिसरे विकेटी खातीर शेंकड्याची भागिदारी केली. तांणी तिसरे विकेटी खातीर 129 बॉलांत 129 धांवड्यांची भागिदारी केली. मोहम्मद सिराजान निमाणे ही जोडी फोडली. ताणे हँड्रिक्साक 74 धांवड्यांचेर आवट केलें. ताणे 9 चौके आनी एक सको हुबयलो. ते उपरांत विकेटकीपर हेन्निच क्सासेनान आक्रमक खेळ करपाक सुरवात केली मात कुलदीप यादवान ताका 30 धांवड्याचेर आवट करून आफ्रिकेक चवथो धपको दिलो.
आयचे मॅचींत खेळपाची संद मेळल्ल्या वॉशिंग्टन सुंदरान मार्करामाक आवट केले. तांणे 89 बॉलांत 7 चौके आनी एका सक्यान
79 धांवड्यो केल्यो. उपरांत डेव्हिड मिलर आनी पार्नेल खेळपट्टेर आयले. भारतीय बॉलरांनी निमाण्या 10 ओव्हरींत तांकां वरचड जावपाक दिलें ना. शार्दुल ठाकूरान पार्नेलाक 16 धांवड्यांचेर आवट करून आफ्रिकेक सव्वो धपको दिलो.भारता खातीर वन-डेंत पदार्पण करपी अश्टतासी शाहबाज अहमदान ओपनर जे मलानाक एलबीडब्ल्यू करून पयली विकेट घेतली. सिराजान 10 ओव्हरींत 38 धांवड्यो दिवंन 3 विकेटी घेतल्यो. वॉशिंग्टन, शाहबाज, कुलदीप आनी शार्दुलान दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
