भांगरभूंय | प्रतिनिधी
२०० किलो गॅस वाटयलो: ‘युनीक मॉडेल’ म्हूण मान
शिरडी: सध्या देशभर एलपीजी गॅसाचो उणाव आसा. मध्य उदेंतांत चालू आशिल्ल्या झुजाचो परिणाम तेल आनी गॅसीचे पुरवणेचेर जाला, तशेंच भारताचेरूय हाचो आतां व्हड परिणाम जावपाक लागला. जायत्या शारांनी लोकांक गॅस सिलिंडराची वाट पळोवची पडटा.
हे परिस्थितीचो परिणाम कांय देवळांचेरूय जाल्लो दिसून येता. मात श्री साईबाबा संस्थान ट्रस्ट, शिरडी हांगा अर्थीक नदरेन सामकी फायद्याची पद्दत आपणायल्या. हांगा सौर उर्जेचो उपेग करून देशा मुखार एक नवो आदर्श दवरला. सौर उर्जेचेर आदारिल्ले व्हड रांदपाचे पद्दतींतल्यान दर दिसा ४० हजार भक्तांक अन्न शिजोवपाचें काम सुरू आसा. ह्या अभिनव प्रयोगाक लागून दर दिसा २०० किलो गॅस वाचता, आनी केंद्र सरकारान ताका देशांत ‘युनीक मॉडेल’ म्हूण मान दिला.
शिरडीक दर्शना खातीर येवपी ७५ ते ८० हजार भक्तांतले सुमार ४० हजार भक्त दर दिसा साईप्रसादालयांत जेवणाचो लाव घेतात. पयलीं दर दिसा सुमार १७०० किलो गॅस व्हडा प्रमाणांत जेवण तयार करपाक वापरताले, हो संस्थाचेर व्हड अर्थीक भार आशिल्लो. हें मतींत दवरून संस्थानान २००९ वर्सा सौर रांदपाची यंत्रणां स्थापन करपाचें थारायलें. सुमार १ कोटी ३७ लाख रुपया खर्च करून उबारिल्ल्या ह्या प्रकल्पांत ७३ सौर डिश लायल्यात. हे पद्दतींतल्यान एका वेळार १५ क्विंटल तांदूळ, ५ क्विंटल दाळ आनी ५ क्विंटल भाजी शिजयतात.
ह्या प्रकल्पाची येसस्वी अंमलबजावणी जाल्ल्यान २००९ ते २०२६ ह्या काळांत दोन लाख किलो परस चड गॅस वाटोवपाक मेळ्ळा आनी संस्थाक सुमार दोन कोटी रुपयांची वाड जाल्या. फकत रांदपा खातीर न्हय, तर सौर उर्जेचोय उपेग भक्तांच्या निवासस्थानांत गरम उदका खातीर सुरू आसा. हाका लागून १० हजार भक्तांक २४ वरां फुकट गरम उदकाची सुविधा मेळटा. पर्यावरण संवर्धन आनी उर्जा वाटोवपाचें हें मॉडेल आतां राष्ट्रीय पांवड्यार लक्षांत घेतात आनी फुडल्या उर्जा संकश्टाचेर तें एक व्हड उपाय थारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
