भांगरभूंय | प्रतिनिधी
सावयवेरें: बोणयें-सावयवेऱ्यां श्रीसांतेरी खामिणी देवस्थानाचो जात्रोत्सव आनी दिवजोत्सव सुमार देड हजार सवायशिणींनी वांटेकार जावन भक्तीभावान मनयलो.
दिवजोत्सवाची सुरवात कावंगाळ वाठारांतल्यान जाली. सवायशिणींनी मूळ पुरसाची उंवाळणी करून श्रीसांतेरी देवस्थाना कडेन गेले उपरांत थंय पालकार, सावयकार, आमाडकार, वेलकासकार, तळेकार, कुंडयकार बी वाड्या वेल्याे सवायशिणीं एकठांय आयल्यो. श्रीसांतेरी देवस्थाना मुखा वेल्या देवीच्या खांब्यार पणट्यो पेटोवन, पुरायता वरवीं खांबाची विधीवत पुजा केली.
श्रीसांतेरी देवीची उंवाळणी जाले उपरांत देवळांत सच्चीत पालकार हांणी भौशीक गाराणें घातलें. उपरांत सगल्या दिवजाधारक सवायशिणींनी देवळाक पेट्ट्या दिवजां सयत प्रदक्षिणां घालून खामीण दोंगर हांगासरल्या खामिणी देवळा कडेन वता आसतना वाटेर बारा देवां कडेन आनी उपरांत पालवाड्या वेल्या कुलपुरुसाक उंवाळणी केली.
श्रीसांतेरी खामिणी देवळाक सगल्या दिवजाधारक सवायशिणींनी उंवाळणी केले उपरांत थंय नव्या जोडप्यांचें गांठवल बांदलें. सांतेरी खामिणी देवळाक पांच प्रदक्षिणा घाले उपरांत देवींक भौशीक गाराणें घालें आनी उपरांत दिवजोत्सवाची सांगता जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
