भांगरभूंय | प्रतिनिधी
धर्मीक, संस्कृतीक कार्यावळी, पावणी, तीन कोंकणी नाटकां, आर्केस्ट्रा जातलो
मडगाव : फातर्पेंची नामनेची श्रीशांतादुर्गा फातर्पेकरीण देवस्थानाची जात्रा २१ ते २४ डिसेंबर ह्या काळांत जातली. ह्या निमतान विवीध धर्मीक आनी सांस्कृतीक कार्यावळींचें आयोजन केलां, अशी म्हायती देवस्थानाचे अध्यक्ष देवेंद्र देसाय हांणी दिली. पत्रकार परिशदे वेळार देवेंद्र देसाय हांणी वर्सुकी जात्रे विशीं म्हायती दिली. ह्या वेळार सरचिटणीस अजय देसाय, भांडारी सत्येंद्र देसाय आनी मुखत्यार संजय देसाय हाजीर आशिल्ले.
अध्यक्ष देसाय हांणी सांगलें, शांतादुर्गा फातर्पेकरीण संस्थानांत जावपी कार्यावळींचो आंकडो वाडला. हेर राज्यांतल्यान येवपी भाविकांचो आंकडोय दिसान दीस वाडतूच आसा. संस्थानाची वर्सुकी जात्रा २१ डिसेंबर सावन सुरू जातली. ह्या चार दिसांच्या उत्सवांत धर्मीक विधी, रथोत्सव आनी सांस्कृतीक कार्यावळींचें आयोजन केलां.
पयल्या दिसा २१ डिसेंबराक सकाळीं महाअभिषेकान उत्सवाची सुरवात जातली. रातचें नमन, १० वरांचेर शिबिकोत्सव आनी उपरांत दिडेच्या गजरांत रुप्याच्या रथांतल्यान श्रींची मिरवणूक जातली. तशेंच रातचें ‘पांडगो इलो रे बा इलो’ हें दोन अंकी मालवणी कोंकणी नाटक सादर जातलें.
२२ डिसेंबराक महाभिशेक, रातीं शिबिकोत्सव आनी उपरांत दिंडीच्या गजरांत मयुर रथांतल्यान श्रींची मिरवणूक जातली. उपरांत ‘आरे देवा तूं रे भावा?’ हें कोंकणी नाटक सादर जातलें.
२३ तारखेर सकाळीं महाभिषेक, रातचो शिबिकोत्सव आनी ताचे उपरांत दिंडेच्या गजरांत श्रींची सूर्य रथांतल्यान मिरवणूक काडटले. उपरांत दोन अंकी कोंकणी नाटक ‘यो… घर तुमचेंच’ हें नाटक जातलें.
बुधवार २४ तारखेर सकाळीं महाभिशेक, सांजेवेळार थळाव्या भुरग्यांच्यो कार्यावळी, ११ वरांचेर युनायटेड आर्ट निर्मित ‘स्टार मेलेाडिज’ हो ऑक्रेस्ट्रा जातलो.
२५ डिसेंबराक सकाळीं ६ वरांचेर दिंडेच्या गजरांत श्रींची महारथांतल्यान मिरवणूक काडटले. जात्रे निमतान देवळां आनी वाठारांत सीसीटीव्ही कॅमेरे बसयल्यात. तशेंच पुलीस, उजो पालोवपी दळ आनी प्रशासनाचेंय सहकार्य घेतलें अशें देसाय हांणी म्हणलें.
उत्सवा मजगतीं सदांच दनपरां आनी रातीं महाप्रसाद आसतलो. अर्पण केल्ल्यो भांगरा-रुप्या वस्ती आनी कपड्यांची पावणी २६, २७ आनी २८ डिसेंबराक सकाळीं १० ते सांजेवेळार ५ ह्या वेळार संस्थानाच्या वाठारांत जातली. भक्तांनी ह्या उत्सवाक व्हडा संख्येन हाजीर रावन दर्शनाचो आनी महाप्रसादाचो लाव घेवचो, अशें आवाहन संस्थाना वतीन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
