भांगरभूंय | प्रतिनिधी
सेगीत तीन हारी घेतल्या उपरांत संवसारीक वन डे क्रिकेट सर्तींतलें आव्हान कायम राखपाचो निर्धार करून मैदानांत देंवपी श्रीलंका पंगडाक अखेरेक येस आयलें. नॅदरलॅण्डा आड 5 विकेटींनी जैत जोडून गुणाचें खातें उगडलें.
नॅदरलॅण्डान दिल्ली 263 धांवड्यांची मोख श्रीलंकेन 48.2 ओव्हरींनी 5 विकेटी राखून मेळयली.
कसून रंजिथा आनी दिलशान मधुशंका हांचे उत्कृश्ट बॉलिंगे उपरांत बॅटिंगेंत पथूम निसंका, सदीरा समरविक्रमा आनी चरिथ असलंका हांणी जबरदस्त प्रदर्शन केलें.
नॅदरलॅण्डान टॉस जिखून पयलीं बॅटींग करपाचो निर्णय घेतलो आनी 49.4 ओव्हरींनी सगल्यो विकेटी वगडावन 262 धांवड्यो केल्यो. ताची सुरवात बरी जाली ना. ताणें 91 धांवड्यांचेर 6 विकेटी वगडायिल्ल्यो. पूण, सिब्रॅंड इंंग्लेब्रेच (70) आनी लोगन व्हॅन बीक (59) हे जोडयेन सातवे विकेटी खातीर 130 धांवड्यांची भागिदारी करून पंगडाक बरो स्कोर उबारून दिलो. श्रीलंकेच्या कसून रंजिथा आनी दिलशान मधुशंका हांणी दरेकी 4 विकेटी घेतल्यो. 2007 उपरांत संवसारीक वन डे क्रिकेट सर्तींत पयलेच खेपे श्रीलंकेच्या दोन बॉलरांक दरेकी 4 विकेटी घेवप शक्य जालें. 2007चे संवसारीक सर्तींत मुथय्या मुरलीधरन (4-19) आनी फरवीज महरुफ (4-25) हाणें आयर्लेण्डा आड दरेकी चार विकेटी घेतिल्ल्यो.
संवसारीक सर्तींत 100 भितर स विकेटी वगडावन लेगीत सगल्यांत चड धांवड्यो करपाचे वळेरेंत नॅदरलॅण्डान दुसरी सुवात मेळयली. भारतान 1983त झिम्बाब्वे आड 6 बाद 77 वयल्यान 8 बाद 266 अशी मजल मारिल्ली. झिम्बाब्वेन 1987चे संवसारीक सर्तींत न्युझिलॅण्डा आड 6 बाद 94 वयल्यान 239 धांवड्यो केल्ल्यो.
मोखीचो फाटलाव करपी श्रीलंकेची लेगीत सुरवात बरी जाली ना. कुशल परेरा (5) आनी कुसल मॅण्डिस (11) हे बाद जाल्ल्यान श्रीलंकेची अवस्था 2 बाद 52 अशी जाली. पथूम निसंकान 52 बॉलांनी 54 धांवड्यो केल्यो.
सदीरा समरविक्रमा आनी चरिथ असलंका हांणी डाव सांबाळ्ळो. पूण, नॅदरलॅण्डाची उत्कृश्ट बॉलींग चालूच आशिल्ली. ताका 20 ओव्हरींनी आनीक 92 धांवड्यांची गरज आशिल्ली. सदीरान 53 बॉलांनी अर्द शेंकडो पुर्ण केलो. सदीरा आनी चरिथ हांणी केल्ली 77 धांवड्यांची भागिदारी आर्यन दत्तान फोडली. 44 धांवड्यांचेर खेळपी चरिथाक ताणें बोल्ड केलो.
धनंजय डी सिल्वान (30) उपरांत सदीराक बरी साथ दितना 84 बॉलांनी 76 धांवड्यांची भागिदारी केली आनी श्रीलंकेक 5 विकेटी जैत मेळोवन दिलें. संदीरान 107 बॉलांनी नाबाद 91 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
