भांगरभूंय | प्रतिनिधी
श्रीलंका पंगडान नॅदरलॅण्डाक सहज 128 धांवड्यांनी हारोवन संवसारीक वन डे पात्रताय सर्त जिखली. नॅदरलॅण्ड फायनलींत हारलो तरी वर्साचे अखेरेक भारतांत जावपी संवसारीक वन डे क्रिकेट सर्तीची पात्रताय पयलींच मेळयिल्ली.
नॅदरलॅण्डान टॉस जिखून पयलीं श्रीलंकेक बॅटींग करपाचें आमंत्रण दिलें. श्रीलंकेचो डाव 47.5 ओव्हरींनी 233चेर सोंपलो. सहन अरागिचेन सगल्यांत चड 57 धांवड्यो केल्यो. कुशल मॅण्डिसान 43 आनी चरिथ असालंकान 36 धांवड्यांचें योगदान दिलें. नॅदरलॅण्डा वतीन लोगन वॅन बीक, रायन क्लीन, विक्रमजीत सिंग आनी साकिब जुल्फिकर हांणी दरेकी 2 विकेटी घेतल्यो. आर्यन दत्ताक एक विकेट फावो जाली.
नॅदरलॅण्ड ही मॅच जिखतलो अशें दिशिल्लें. पूण, श्रीलंकेच्या बॉलरांनी सांवार कांडलो. ताणें नॅदरलॅण्डाच्या बॅट्समनांक खेळपट्टीचेर तग धरपाकूच दिलो ना. महीश तीक्षणान सगल्यांत चड चार विकेटी घेतल्यो. ताचे खेरीत दिलशान मदुशंकान तीन विकेटी घेतल्यो. नॅदरलॅण्डाक 25 ओव्हरी लेगीत खेळपाक जमल्यो ना. 23.3 ओव्हरींनी ताचो डाव 105चेर सोंपलो.
श्रीलंकेचो स्टार बॉलर दिलशान मदुशंकाची मॅन ऑफ मॅची खातीर निवड जाली. ताणें सात ओव्हरींनी 2.47चे इकोनॉमीन बॉलींग घालून 18 धांवड्यांनी तीन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
