भांगरभूंय | प्रतिनिधी
दक्षीण आफ्रिका पंगडान आदलो वस्ताद श्रीलंका पंगडाक 6 विकेटींनी हारोवन संवसारीक टी-20 सर्तीच्या आपल्या अभियानाक जैतान सुरवात केली. श्रीलंके खातीर ही सामकी बाबत मॅच थारली. पयलीं बॅटींग करतना ताणें 19.1 ओव्हरींनी सगल्यो विकेटी व्हगडावन फकत 77 धांवड्यो केल्यो. आंतरराष्ट्रीय टी-20 क्रिकेटींतलो श्रीलंका पंगडाचो हो सगल्यांत उणो स्कोर थारलो.
श्रीलंकेचो मुखेली वानिंदु हसरंगान टॉस जिखून पयलीं बॅटींग करपाचो निर्णय घेतलो. दक्षीण आफ्रिके वतीन एन्रीक नोर्टजेन चार ओव्हरींनी फकत7 धांवड्यो दिवन 4 विकेटी घेतल्यो. मोखीचो फाटलाव करपी दक्षीण आफ्रिकेन 16.2 ओव्हरींनी 4 विकेटी व्हगडावन 80 धांवड्यो करून जैत जोडलें.
ते पयलीं श्रीलंकेची सुरवात सामकी बाबत जाली. चवथे ओव्हरीच्या पयल्या बॉलाचेर पथुम निसांका (3) बाद जालो. ते उपरांत कुशल मॅण्डिस आनी कुमांदू मॅण्डिस हांणी पंगडाचो स्कोर मुखार व्हरपाक संघर्श केलो. दोगांयनी 7.5 ओव्हरींनी 31 धांवड्यांची भागिदारी केली. कुमांदू 15 बॉलांनी 11 धांवड्यो करून बाद जालो.
केशव महाराजान जबरदस्त बॉलींग घाली. ताणें पयलीं श्रीलंकेचो मुखेली हसरंगाक बाद केलो. तेच ओव्हरींत समरविक्रमाक (0) बोल्ड केलो. ताका हॅट्रीक करपाची संद आशिल्ली. पूण, ताका ती चुकली.
फास्ट बॉलर हॅन्रिक काल वेगळ्याच फॉर्मांत आशिल्लो.ताणें 10वे ओव्हरींत कुशल मॅण्डिसाक बाद केलो. कुशलान 30 बॉलांनी 19 धांवड्यो केल्यो. 12वे ओव्हरींत ताणें असलंकाक बाद करून श्रीलंकेचो स्कोर 6 बाद 45 असो केलो. असलंकान 9 बॉलांनी 6 धांवड्यो केल्यो.
शनाका आनी अॅंजेलो मॅथ्यूजान स्कोर मुखार व्हरपाचो यत्न केलो. पूण, 15वे ओव्हरींत रबाडान शनाकाक (9) बाद केलो. ते उपरांत हॅन्रिकान मॅथ्यूजाक (16) बाद केलो. ही हॅन्रिकाची चवथी विकेट आशिल्ली. संवसारीक टी-20 सर्तींत दक्षीण आफ्रिके वतीन हॅन्रिकान सर्वोत्कृश्ट प्रदर्शन केलें.
रबाडान पथिरानाक (0) बाद केल्या उपरांत नुवान तुषाराच्या (0) रुपान श्रीलंकेची निमाणी विकेट पडली.
मोखीचो फाटलाव करपी आफ्रिकेची सुरवात बरी जाली ना. फास्ट बॉलर तुषारान रिजा हॅण्ड्रिक्साक (4) बाद करून श्रीलंकेक पयलें येस मेळोवन दिलें. क्विंटन डी कॉकाक धांवड्यो करपाक संघर्श करचो पडलो. पांचवे ओव्हरींत दासून शनाकान मुखेली एडेन मार्करमाक (12) बाद केलो. आफ्रिकेन 23 धांवड्यांचेर दुसरी विकेट व्हगडायली.
दोन विकेटी पडल्या उपरांत आफ्रिका बॅकफुटाचेर आयलो. डी कॉक आनी ट्रिस्टन हांणी 100 परस उणे स्ट्रायक रेटीन बॅटींग केली. ट्रिस्टनाची स्ट्रायक रेट एका वेळार 40 परस सकयल गेली. दुसरे वटेन डी कॉकान एकोडी-दोट्टी धांवडींचेर भर दिली. पूण, 11वे ओव्हरींत डी कॉक बाद जालो. ताणें 27 बॉलांनी 20 धांवड्यो केल्यो. ते उपरांत हसरंगान ट्रिस्टनाक बाद करून आफ्रिकेक चवथो धपको दिलो. उपरांत हॅन्रिक क्लासेनान आफ्रिकेचें जैत सोंपें केलें. ताणें जलद बॅटींग करून आफ्रिकेक 6 विकेटींनी जैत मेळोवन दिवपाक मजत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
