भांगरभूंय | प्रतिनिधी
येजमान श्रीलंकान पंगडान माळेंतले पयले टॅस्टींत न्युझिलॅण्ड पंगडाक 63 धांवड्यांनी हारयलो. काल पांचव्या दिसा न्युझिलॅण्ड पंगडाक आपले पयरचे 207 धांव संख्येंत फकत चार धांवड्यांची भर घालप शक्य जालें आनी अशे तरेन ताचो दुसरो डाव 211चेर सोंपलो. स्पिनर प्रभाथ जयसुर्यान मॅचींत 9 विकेटी घेतल्यो. ताचीच प्लेयर ऑफ द मॅची खातीर निवड जाली.
275 धांवड्यांचे मोखीचो फाटलाव करपाक मैदानाचेर देंवपी न्युझिलॅण्डाची सुरवात बरी जाली ना. फकत 6 धांवड्यांचेर ताणें आपली पयली विकेट व्हगडायली. रचिन रवींद्रान सगल्यांत चड 92 धांवड्यो केल्यो. दुसऱ्या डावांत जयसुर्यान 5 आनी रमेश मॅण्डिसान 3 विकेटी घेतल्यो. जाल्यार धनंजय डिसिल्वा आनी असिथ फर्नांडोन 1-1 विकेट मेळयली.
ते पयलीं श्रीलंकेचो दुसरो डाव चवथ्या दिसाच्या दुसऱ्या सत्रा पयलींच 309चेर सोंपलो. श्रीलंकेन पयल्या डावांत 305 आनी न्युझिलॅण्डान आपल्या पयल्या डावांत 340 धांवड्यो केल्ल्यो.
ही माळ वर्ल्ड टॅस्ट चॅम्पियनशीप 2023-25 सर्तीचो भाग आसा. ताका लागून श्रीलंकेन मेळयिल्ल्या जैता उपरांत टॅस्ट चॅम्पियनशीपच्या गुणतकट्यांत लेगीत व्हड बदल जाले.
ह्या जैता उपरांत श्रीलंकेन न्युझिलॅण्डाक चॅम्पियनशीपीच्या गुणतकट्यांत फाटीं घालो. श्रीलंकेन तिसरी सुवात मेळयली. न्युझिलॅण्ड चवथे सुवातेर घसरलो. श्रीलंका आठ मॅची खेळ्ळा. हातूंतल्यो चार जिखला जाल्यार चार मॅचींनी हार घेतल्या. ताका लागून ताची सरासरी 50 टक्के अशी आसा.
न्युझिलॅण्ड सात मॅची खेळ्ळा. ताणें तीन मॅचींनी जैत जोडलां जाल्यार चार मॅचींनी हार घेतल्या. ताका लागून तो आतां 42.86 सरासरी टक्केवारी सयत चवथे सुवातेर आसा.
गुणतकट्यांत भारत आनी ऑस्ट्रेलिया वळेरेन पयले आनी दुसरे सुवातेर आसा. भारतान 10तल्यो सात मॅचींनी जैत जोडलां. तशेंच भारताची जैताची सरासरी टक्केवारी 71.67 अशी आसा. दुसरे सुवातेर आशिल्ल्या ऑस्ट्रेलियेची सरासरी टक्केवारी 62.50 अशी आसा. ताणें 12तल्यो 8 मॅची जिखल्यात.
मजगतीं, श्रीलंकेन केल्ले वाटचालीक लागून आतां फायनलींत प्रवेश मेळोवपा खातीर चुरस वाडल्या. सगल्याच पंगडांच्यो वर्ल्ड चॅम्पियनशिपींतल्यो अखेरच्यो कांय माळो बाकी आसात. ताका लागून ही चुरस वाडल्या.
सध्या भारत आनी बांगलादेश ह्या पंगडां मदीं टॅस्ट माळ चालू आसा. श्रीलंका आनी न्युझिलॅण्ड ह्या पंगडां मदीं माळ चालू आसा ताका लागून परतून गुणतकट्यांत उपरांत व्हड बदल जावपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
