भांगरभूंय | प्रतिनिधी
येजमान श्रीलंका पंगडान न्युझिलॅण्डाक दुसरे टॅस्टीच्या तिसऱ्या दिसा फॉलोऑन दिलो. फॉलोऑन करतना न्युझिलॅण्डान 5 विकेटी व्हगडावन 199 धांवड्यो केल्यात. अशे तरेन तो अजून 315 धांवड्यांनी फाटीं आसा. उण्या उजवाडाक लागून तिसऱ्या दिसाचो खेळ बेगीन थांबवचो पडलो.
टॉम ब्लंडेल 47 आनी ग्लॅन फिलिप्स 32 धांवड्यांचेर खेळटा. श्रीलंके वतीन निशान पेरिसान तीन विकेटी घेतल्यो. न्युझिलॅण्डाचो पयलो डाव फकत 88चेर सोंपिल्लो.
न्युझिलॅण्डान काल 2 बाद 22 धांवड्यां वयल्यान मुखार खेळपाक सुरवात केली. दावखुरो स्पिनर प्रबथ जयसुर्यान 6 विकेटी घेतल्यो. ताणें कॉन्वे (9), केन विलियम्सन (7), डॅरील मिचेल (13), टॉम ब्लंडेल (1), ग्लॅन फिलिप्स (0) आनी टीम सावथी (2) हाका बाद केलो. न्युझिलॅण्डा वतीन फकत तीन बॅट्समनांक दोट्टी आंकडो हुपपाक जमलो.
श्रीलंकेक पयल्या डावांत 514 धांवड्यांची आघाडी मेळ्ळी आनी ताणें न्युझिलॅण्डाक फॉलोऑन दिलें. फॉलोऑना उपरांत न्युझिलॅण्डान आपल्या दुसऱ्या डावाक सुरवात केली. दुसऱ्या डावांत लेगीत टॉम लॅथम शुन्याचेर बाद जालो.
पूण, पयल्या डावांतली चूक सुदारून डॅव्होन कॉन्वे आनी केन विलियम्सन हांणी संयमान बॅटींग करून दुसरे विकेटी खातीर 96 धांवड्यांची भागिदारी केली. अखेरेक कॉन्वे 61 धांवड्यांचेर बाद जालो, ताच्या फाटोफाट विलियम्सन 46 धांवड्यो करून तंबूंत परतलो.
ते उपरांत डॅरील मिचेल आनी रचीन रवींद्र चड वगत खेळपट्टीचेर तग धरपाक शकले नात. मिचेलाक एक धांवडेचेर जयसुर्यान बाद केलो. जाल्यार रचिनाक 12 धांवड्यांचेर निशानान बोल्ड केलो. ते उपरांत टॉम ब्लंडेल आनी ग्लॅन फिलिप्स हांणी डाव सांबाळून अर्द शेंकड्याची भागिदारी केली.
तिसऱ्या दिसाचो खेळ सोंपलो त्या वेळार न्युझिलॅण्डान 41 ओव्हरींनी 5 विकेटी व्हगडावन 199 धांवड्यो केल्यात.
केन विलियम्सन, डॅरिल मिचेल आनी रचिन रवींद्र हे मॅचीच्या तिसऱ्या दिसा दोन खेपे बाद जाले. पयल्या डावांत ह्याच दिसा तांणी आपल्यो विकेटी व्हगडायिल्ल्यो. दुसऱ्या डावांत लेगीत ते रोखडेच बाद जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
