भांगरभूंय | प्रतिनिधी
येजमान श्रीलंका पंगडान दुसरे टॅस्ट जिखपाक पाकिस्तानाक जैता खातीर 508 धांवड्यांची व्हड मोख दिल्या. धांवड्यांचो फाटलाव करतना चवथ्या दिसाचो खेळ सोंप मेरेन एक विकेट वगडावन 89 धांवड्यो केल्यात. उण्या उजवाडाक लागून खेळ बेगीन थांबोवचो पडलो. च्या च्या विसवा उपरांत फक्त स ओव्हरीच जाल्यो.
पाकिस्तानाक निमाण्या दिसा जैता खातीर आनीक 419 धांवड्यो करपाक जाय. पूण, तिनूय सत्रां खेळून मॅच बादाबाद दवरपाचो ताचो यत्न आसतलो. दोन टॅस्टींचे माळेंत पाकिस्तान 1-0 असो मुखार आसा.
मजगतीं, अब्दुल्लाह शफीक आनी इमाम उल हक हाणें पयले विकेटी खातीर 42 धांवड्यांची भागिदारी केली. पयले टॅस्टींत नाबाद 160 धांवड्यांची खेळी करपी शफीक 16 धांवड्यो करून बाद जालो. ते उपरांत मैदानाचेर देंवपी मुखेली बाबर आजमान सहज रितीन स्पीन बॉलींग खेळून काडली. ताणें इमाम उल हका वांगडा मेळून दुसरे विकेटी खातीर 47 धांवड्यांची भागिदारी केल्या.
डावाचे 28वे ओव्हरींत आमकां बॉल योग्य रितीन दिश्टी पडना अशी कागाळ पाकिस्तानाच्या बॅट्समनांनी मैदानी अंपायरांक केली. कागाळी उपरांत खेळ थांबयलो. त्या वेळार इमाम 46 आनी बाबर 26 धांवड्यो करून खेळटालो.
पाकिस्तानाक जैत जोडपाक संवसारीक विक्रम करचो पडटलो. अजून मेरेन चवथ्या डावांत 508 धांवड्यांचो फाटलाव करूंक ना. सध्या हो विक्रम वॅस्ट इंडिजाच्या नांवार आसा. 2003त ऑस्ट्रेलियेन दिल्ले 418 धांवड्यांचो विंडिजान येसस्वी रितीन फाटलाव केल्लो.
ते पयलीं श्रीलंकेन आपलो दुसरो डाव 5 बाद 176 धांवड्यां वयल्यान मुखार व्हेलो आनी 6 बाद 360 धांवड्यांचेर घोशीत केलो. आदल्या दिसाचे नाबाद बॅट्समन धनंजय डी सिल्वा आनी दिमुथ करुणारत्ने हांणी सवे विकेटी खातीर 126 धांवड्यांची भागिदारी करून श्रीलंकेक व्हड धांवसंख्या उबारून दिवपाक म्हत्वाचें योगदान दिलें.
करुणारत्नेन 31वो अर्द शेंकडो पुर्ण केलो. तशेंच टॅस्टींत स हजार धांवड्यो पुर्ण करपी श्रीलंकेचो सवो बॅट्समन थारलो. तो 61 धांवड्यांचेर बाद जालो. धनंजयान 109 धांवड्यांची खेळी केली. ताचो हो णववो टॅस्ट शेंकडो थारलो. ताणें रमेश मॅंडिसा वांगडा आठवे विकेटी खातीर 82 धांवड्यांची भागिदारी केली. मॅंडिसान 55 बॉलांनी नाबाद 45 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
