भांगरभूंय | प्रतिनिधी
प्रभात जयसुर्या (5 विकेटी) हाच्या जबरदस्त बॉलिंगे नेटार येजमान श्रीलंका पंगडान दुसरे टॅस्टीच्या चवथ्या दिसा बांगलादेशाक डाव आनी 78 धांवड्यांनी हारोवन दोन मॅचींची माळ 1-0 अशा फरकान जिखली.
काल एसएससी मैदानाचेर बांगलादेशान 6 बाद 117 धांवड्यां वयल्यान मुखार खेळपाक सुरवात केली. त्या वेळार श्रीलंका पंगडान दुसऱ्या डावांत काडिल्ल्या धांवड्यां परस बांगलादेश 94 धांवड्यांनी फाटीं आशिल्लो.
चवथ्या दिसाची पयली विकेट लिटन कुमार दास (14) हाच्या रुपान पडली. विकेटकीपर कुशल मॅण्डिसान जयसुर्याचे बॉलिंगेचेर ताची कॅच धरली. ते उपरांत जयसुर्यान नईम हसनाक (5) बाद केलो. कुशल मॅण्डिसान हसनाक स्टम्प बाद केलो. भुजाचे दुखापतीक लागून तिसऱ्या दिसाच्या खेळा वेळार मैदाना भायर रावपी मॅण्डिसान काल विकेटी फाटल्यान बरी कामगिरी केली.
तैजुल इस्लाम (6) आनी इबादत हुसैन (6) धांवड्यो करून बाद जाले. बांगलादेशान सकाळच्या सत्रांत फकत 16 धांवड्यांची भर घालून 4 विकेटी व्हगडायल्यो. श्रीलंकेच्या बॉलरांनी बांगलादेशाचो डाव 44.2 ओव्हरींनी 133चेर सोंपयलो आनी मॅच डाव आनी 78 धांवड्यांनी जिखली. श्रीलंकेन टॅस्ट इतिहासांत बांगलादेशा आड णववे खेपे डावान जैत जोडलें. तशेंच संवसारीक टॅस्ट वस्तादपण सर्तींत म्हत्वाचे गूण मेळयले.
जयसुर्यान टॅस्ट कारकिर्दींत 12वे खेपे एका डावांत पांच विकेटी घेतल्यो. धनंजय डिसिल्वा आनी थरिंडू रत्नायके हांणी दरेकी 2 विकेटी घेतल्यो. श्रीलंका पंगडान पयल्या डावांत पथुम निसांकाच्या 158 धांवड्यांच्या नेटार 458 धांवड्यो केल्ल्यो. दिनेश चंदिमलान 93, कुशल मॅण्डिसान 84 धांवड्यांचें योगदान दिल्लें. ते उपरांत बांगलादेशाचो पयलो डाव 247चेर आनी दुसरे डाव 133चेर सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
