भांगरभूंय | प्रतिनिधी
खबरां संस्था
गॅले : न्युझिलॅण्ड आनी श्रीलंका हांचें मदलीं पयलीं टॅस्ट सामकीच उमळशीक वाडोवपी थारल्या. चवथ्या दिसाचो खेळ सोंपलो तेन्ना 275 धांवड्यांचे आव्हान घेवन मैदानार देंविल्ल्या न्युझिलॅण्डाची अवस्था 8 बाद 207 अशी जाल्ली. तांकां निमाण्या दिसा जिखपाक 68 धांवड्यो जाय. मात, हातांत दोनूच विकेटी आसात. जाल्यार दुसरे वटेन श्रीलंका जैत जोडून टॅस्ट चँपियनशीपींत तिसरे सुवातेर पावपाक इत्सुक आसा. सध्या न्युझिलॅण्ड तिसरे, जाल्यार श्रीलंका चवथे सुवातेर आसा. मॅच जिखल्यार श्रीलंकेची पर्सेंटेस सरासरी 50 टक्के जातली. आनी न्युझिलॅण्डाची 42च्या म्हऱ्यांत देंवतली. न्युझिलॅण्ड जिखल्यार तांची सरासरी वाडून 54 मेरेन पावतली. वर्ल्ड टॅस्ट चँपियनशीपींत आव्हान कायम दवरूंक दोनूय टिमींक जैत सामकें गरजेचें आसा.
चवथ्या दिसा श्रीलंकेचो डाव 305 धांवड्यांचेर सोंपलो. कुशल मेंडीसान 50 धांवड्यो काडल्यो. मात, बाकीचें खेळगडे बेगीन आवट जालें. विलियम ओरोकेन 5, अजाझ पटेल आनी ग्लेन फिलिप्सान दरेकी 2 विकेटी काडल्यो. 275 धांवड्यांचें आव्हान घेवन मैदानार देंविल्ल्या न्युझिलॅण्डाचो ओपनर कॉनवे (4) सवाय भितर आवट जालो. उपरांत टॉम लॅथम (28) आनी केन विलियम्सान (30) डाव सांबाळ्ळो. मात, दोगूय फाटोफाट आवट जाले. उपरांत श्रीलंकेन मॅचीचेर शेक गाजयलो.
मात, रचीन रविंद्रान
प्रतिआक्रमण करीत श्रीलंकेक बॅकफुटार घालो. तो 91 धांवड्यांचेर नाबाद आसा.
श्रीलंका आनी जैताच्या मदीं तो उबो आसा. श्रीलंकेवतीन रमेश मेंडीस आनी प्रबथ जयसुर्यान दरेकी 3 विकेटी काडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
