भांगरभूंय | प्रतिनिधी
भारताचो शेजारी देश आशिल्ल्या श्रीलंकेंत हालींच सत्तांतर जालें. थंय डाव्या विचारसरणीचे अनुरा कुमार दिसनायके हे राष्ट्राध्यक्ष जाल्यात. श्रीलंकेंत हालींच वेंचणूक जाली, आनी ते वेंचणुकेंत विमुक्त पेरामुना ह्या राजकी पक्षाक भोवमत मेळ्ळें. श्रीलंकेंत हाचे पयलीं केन्नाच ह्या पक्षाक भोवमात मेळूंक नाशिल्लें. ह्या वेळारूय ह्या पक्षाक भोवमत मेळटलें अशें कोणाक दिसूंक नाशिल्लें. कारण विद्यमान राष्ट्राध्यक्ष रानील विक्रमसिंघे आनी आदले राष्ट्राध्यक्ष राजपक्षे गोटाबाया हांच्या पक्षांत मुखेल लडत आशिल्ली, आनी ह्या दोन पक्षां मदींच एका पक्षाचें जैत जातलें असो अदमास उक्तायताले. पूण हो अदमास फट थारायत दिसनायके हांणी करिश्मा करीत आपली सत्ता हाडली.
श्रीलंके खातीर हें सत्तांतर म्हत्वाचें थारतलें. कारण फाटल्या दोन वर्सांत श्रीलंकेंत खूबश्यो घडामोडी घडल्यात. दोन वर्सां पयलीं म्हणल्यार 2022 वर्सा श्रीलंकेंत लोकांनीच उठाव करून तेन्नाचे श्रीलंकेचे राष्ट्राध्यक्ष राजपक्षे गोटाबाया हांकां देशांतल्यान धांवडावन घाल्लें. राजपक्षे गोटाबाया हांचे उपरांत तांची सुवात विरोधी पक्षाचे फुडारी रानील विक्रमसिंघे हांणी घेतली. ह्या दोगांनी सदांच आलटून पालटून श्रीलंकेची सत्ता भोगल्या. पूण ह्या दोन फुडाऱ्यां विशीं लोकांच्या मनांत निरशेवणी आशिल्ली. घडये हीच निरशेवणी श्रीलंकेंतल्या लोकांनी मतपेटयंंतल्यान उक्तावन तिसरो पर्याय वेंचून काडलो. श्रीलंकेंतल्या लोकांनी वेंचिल्लो हो तिसरो पर्याय मात भारता खातीर तकलीफोड थारूंक शकता. कारण दिसनायके हांचो विमुक्त पेरामुना हो पक्ष डावी विचारसरणी मानपी पक्ष आसा आनी ह्या पक्षाचे चीना कडेन लागींचे संबंद आसात. स्वता दिसनायके हे चीन समर्थक मानतात.
तांणी खूबशे फावटी चीनाची उक्तेपणान बाजू घेतल्या, आनी हीच गजाल भारता खातीर हुस्क्याची आसा. पाकिस्तान, बांगलादेश आनी नेपाळ हीं भारताचीं शेजारचीं राष्ट्रां. हीं हाचें आदींच पाकिस्तानाचे आधीन गेल्यांत. तातूंत आतां श्रीलंकेची भर पडटली. श्रीलंकेचें जर चीना कडेन लागसारपण वाडलें जाल्यार हिंद म्हासागरांत भारताच्या वर्चस्वाक घातक थारूं येता. भारत विरोधी कारवायो करपा खातीर चीन श्रीलंकेचो वापर करूंक शकता. ताका लागून भारतान श्रीलंके विशीं आतां सादूर रावचें पडटलें.
दुसरी गजाल म्हणल्यार दिसनायके हांणी श्रीलंकेतल्या तमीळ चळवळीक कायम विरोध केला. भारत श्रीलंकेतले तमीळ चळवळीक प्रोत्साहन दीत आसून तमीळ नागरिकांच्या स्वतंत्र राष्ट्राच्या मागणी फाटल्यान भारताचो तेंको आशिल्ल्याचो आरोप तांणी हाचे आदींच केला. एकंदरीत श्रीलंकेंतलें सत्तांतर भारता खातीर तकलीफोड थारतलें. अर्थांत सत्तेर येतकच दिसनायके हांणी भारता कडेन सलोख्याचे संबंद दवरतले अशें तांणी म्हळां ही गजाल समाधानाची आसा. 2022 वर्सा श्रीलंकेंत जेन्ना उठाव जालो तेन्ना भारतानूच तांकां अर्थीक मजत केल्ल्याचें तांणी म्हळां, आनी ते खातीर भारताचे उपकारूय मानल्यात. हें जरी खरें आसलें तरी चीन तांकां केन्ना आपल्या फांसात ओडत हें मात सांगूक येवचें ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
