भांगरभूंय | प्रतिनिधी
कोलंबो, खबरां संस्था: प्रधानमंत्री नरेंद्र मोदी हांच्या आवाहना उपरांत श्रीलंकेन १४ भारतीय नुस्तेमारांक सोडले. तांचे सुटके विशीं प्रधानमंत्र्यांनी काल श्रीलंकेचे राष्ट्रपती दिसानायके हांचे कडेन चर्चा केल्ली. तीन दिसांचो श्रीलंका दौरो पुराय करून मोदी भारतांत परतले.
काल प्रधानमंत्र्यांनी माहो ओमानथाई रेल्वे मार्गाचें उक्तावण केलें आनी बौद्ध तीर्थस्थळ अनुराधापुरा हांगा सिग्नल यंत्रणेची सुरवात केली. ह्या वेळार प्रधानमंत्री मोदींनी श्रीलंकेचे अध्यक्ष अनुरा कुमार दिसानायके हांचे वांगडा ट्रेनीक पाचवो बावटो दाखयलो. हो रेल्वे मार्ग श्रीलंकेचो माहो जिल्लो आनी ओमानथाई जिल्लो हांचे मदलो उत्तर रेल्वे मार्गाचो १२८ किमी लांबायेचो भाग. हे श्रीलंकेच्या कुरुणेगाला, अनुराधापुरा आनी वावुनिया जिल्ह्यांतल्यान वता.
श्रीलंकेच्या सरकारान ह्या रेल्वे मार्गाचें आधुनिकीकरण आनी सुधारणा करपाक जायते प्रकल्प सुरू केल्यात. भारतीय भौशीक मळार कंपनी, इरकॉन इंटरनॅशनल लिमिटेड, ह्या वाठाराची उदरगत करता. ह्या प्रकल्पा खातीर भारतान ३१८ दशलक्ष (२७२० कोटी रुपया) रीण दिलां.
तमीळ हक्का विशीं उलयतले
दौर्याच्या दुसर्या दिसा, प्रधानमंत्री मोदीन श्री. दिसानायके हांचे कडेन द्विपक्षीय चर्चा केली. भारतीय नुसतेमारांचे अटकेचेर आनी तमिळ समुदायांच्या हक्कांचेर चर्चाय केली. सांजेवेळार, प्रधानमंत्री मोदी श्रीलंकेच्या तमीळ समुदायाक मेळ्ळे, कोलंबोच्या भारतीय शांतता स्मारकांत भारतीय सैनिकांक आर्गां ओंपलीं आनी १९९६ चें वर्ल्ड कप जिकपी श्रीलंकेच्या संघाक मेळ्ळे. मोदींचो हो श्रीलंकेचो चवथो दौरो. ह्यान पयलीं तांणी २०१५, २०१७ आनी २०१९ वर्सा भेट दिल्ली.
नुस्तेमारांचो मुद्दो
भारतीय नुस्तेमारांची बेगोबेग सुटका आनी तांच्यो बोटी सोडोवपा विशीं प्रधानमंत्री मोदीन श्री. दिसानायक हांचे कडेन चर्चा केली. तांणी म्हणलें, हे विशीं आमी मनीसपणा वांगडा मुखार सरपाक जाय, हाचेर आमी सहमत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
