भांगरभूंय | प्रतिनिधी
सामकें उमळशीक वाडोवपी मॅचींत श्रीलंकेन बांगलादेशाक 2 विकेटींनी हारोवन आशिया करंड क्रिकेट सर्तीच्या सुपर चारांत सुवात मेळयली, जाल्यार हे हारी उपरांत बांगलादेशाचें आव्हान सोंपलें.
बांगलादेशान जैता खातीर 184 धांवड्यांची मोख दिल्ली. श्रीलंकेन ती 19.2 ओव्हरींनी 8 विकेटी वगडावन मेळयली.
कुशल मॅण्डिसान 60 धांवड्यांची खेळी केली. ताचे खेरीत दासून शनाका हाणें 45 धांवड्यांचें योगदान दिलें. बांगलादेशा वतीन इबादत होसैनान 51 धांवड्यो दिवन सगल्यांत चड 3 विकेटी घेतल्यो. ताचे खेरीत तस्कीन अहमदान 2 आनी मुस्तफिजूर रहमान आनी मेहदी हसन हाणें दरेकी एक विकेट घेतली.
ते आदीं श्रीलंकेन टॉस जिखून पयलीं फिल्डींग करपाचो निर्णय घेतलो आनी तिसरेच ओव्हरींत ताका येस मेळ्ळें. सब्बीर रहमान (5) हाका असिथा फर्नांडोन बाद केलो. मेहिदी हसन मिराज आनी मुखेली शाकिब अल हसन हांणी ते उपरांत बांगलादेशाचो डाव सांबाळ्ळो. पूण, वनिंदू हसरंगान ताचे पयले ओव्हरींत मेहिदी हसनाक (28) बोल्ड केलो. मुश्फिकर रहिमाक (4) बाद करून चमिरा करुणारत्नेन बांगलादेशाक तिसरो धपको दिलो.
महिश थिक्षानान श्रीलंके मोठे येस मेळोवन दिलें. ताणें शाकिबाक (24) बोल्ड करून बांगलादेशाची स्थिती 4 बाद 87 केली. बांगलादेशान विकेटी वगडायल्यो आसल्यो तरी ताचो धांवड्यांचो वेग साडेसातचे सरासरीन चालू आशिल्लो.
शाबिकाचे विकेटी उपरांत अफिफ होसैन आनी महमुदुल्लाह हांणी नेटाची बॅटींग केली. दिशाना मधुशंकान ही भागिदारी फोडली. होसैन 22 बॉलांनी 39 धांवड्यो करून बाद जालो. हातूंत चार चवक्यांचो आनी दोन सक्यांच आस्पाव आशिल्लो. फुडले ओव्हरींत हसरंगान महमुदुल्लाहाक (27) बाद करून बांगलादेशाक आनीक धपको दिलो.
मेहदी हसन (1) एलबीडब्ल्यू बाद जालो आनी बांगलादेशाक फाटोफाट तीन धपके बसले. पूण, बांगलादेशाचो धांवड्यांचो वेग उणो जालो ना. ताणें सुमार 13चे सरासरीन अखेरच्या पांच ओव्हरींनी धांवड्यो केल्यो.
मोसाडेक होसैन आनी तस्कीन अहमद हांणी अखेरचे ओव्हरींनी धांवड्यांचो पावस घालो. मोसाडेकान अखेरचे ओव्हरींत जबरदस्त बॅटींग करून पंगडाचो स्कोर 7 बाद 183 मेरेन पावयलो. मोसाडेकान 9 बॉलांनी नाबाद 24 धांवड्यो केल्यो. तस्कीनान 11 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
