भांगरभूंय | प्रतिनिधी
1996चो संवसारीक वस्ताद श्रीलंका पंगडान वर्साचे अखेरेक भारतांत जावपी संवसारीक वन डे क्रिकेट सर्तीची पात्रताय मेळयली. पात्रताय फेरयेंतले सुपर सिक्सांत ताणें येजमान झिम्बाब्वे पंगडाक 9 विकेटींनी हारयलो. ह्या जैता उपरांत आठ गुणां सयत सुपर सिक्सांत पयले सुवातेर आसा.
हांगाच्या क्विन्स स्पोर्ट्स क्लबाच्या मैदानाचेर श्रीलंकेन टॉस जिखून पयलीं फिल्डिंग करपाचो निर्णय घेतलो. आपल्या मुखेल्याचो हो निर्णय योग्य थारायतना झिम्बाब्वेचो डाव 165चेर आडायलो. 166 धांवड्यांची मोख श्रीलंकेन 33.1 ओव्हरींनी 1 विकेट वगडावन 169 धांवड्यो करून मेळयली.
श्रीलंकेच्या जैतांत महीश तिक्षणान म्हत्वाचें योगदान दिलें. ताणें 25 धांवड्यांनी 4 विकेटी मेळयल्यो. तिक्षणा खेरीत दिलशान मदुशंकान तीन विकेटी मेळयल्यो. झिम्बाब्वे वतीन मुखेली सीन विलियम्सान 56 धांवड्यांची खेळी केली. जाल्यार सिकंदर रझान 31 धांवड्यांचें योगदान दिलें. हेर बॅट्समनांक खाशेलें प्रदर्शन करपाक जमलें ना.
धांवड्यांचो फाटलाव करपी श्रीलंके वतीन ओपनर पथुम निसंकान कारकिर्दींतलो दुसरो शेंकडो मारलो. ताणें 102 बॉलांनी 99.02चे स्ट्रायक रेटीन नाबाद 101 धांवड्यो केल्यो. ताणें 14 चवके मारले. निसंका खेरीत दिमुथ करुणारत्नेन 30 आनी कुशल मॅण्डिसान नाबाद 25 धांवड्यो केल्यो.
मजगतीं, श्रीलंका पंगड सुपर सिक्सांतली आपली निमाणी मॅच वॅस्ट इंडिजा आड खेळटलो. श्रीलंका ती मॅच हारलो जाल्यार लेगीत गुणतकट्यांत दुसरे सुवातेर उरून मुखेल सर्तीक पात्र जातलो.
आतां संवसारीक सर्तीची पात्रताय मेळोवपा खातीर फकत एकूच सुवात बाकी आसा आनी रेसींत तीन पंगड आसात. हातूंत झिम्बाब्वे, स्कॉटलॅण्ड आनी नॅदरलॅण्ड ह्या पंगडांचो आस्पाव आसा. वॅस्ट इंडिज आनी ओमान ह्या पंगडांचें आव्हान पयलींच सोंपलां. झिम्बाब्वे सध्या गुणतकट्यांत दुसरे सुवातेर आसा. ताच्या खात्यांत स गूण आसात. जाल्यार स्कॉटलॅण्डाचे तीन मॅचींतल्यान चार गूण घेवन तिसरे सुवातेर आसा. ताच्यो दोन मॅची बाकी आसात. चवथे सुवातेर नॅदरलॅण्ड आसा. ताचे दोन गूण आसात.
झिम्बाब्वेन सर्तींत जबरदस्त प्रदर्शन केलां. श्रीलंके आडची मॅच सोडली जाल्यार ताणें सगल्यो मॅची जिखल्यात. स्कॉटलॅण्डा आडची मॅच जिखली जाल्यार ताची मुखेल फेरयेंतली सुवात निश्चीत जातली.
स्कॉटलॅण्डाच्यो दोन मॅची बाकी आसात. दोनूय मॅची जिखून संवसारीक सर्तीची पात्रताय मेळोवपाची भांगराळी संद ताचे कडेन आसा. पूण, झिम्बाब्वे आड हार घेवची पडली जाल्यार ताचें आव्हान सोंपतलें.
नॅदरलॅण्डान सुपर सिक्सांत दोन खेपेचो संवसारीक वस्ताद वॅस्ट इंडिजाक हारोवन सगल्यांक अजापाचो धपको दिल्लो. ताच्यो दोन मॅची बाकी आसात. त्यो जिखल्यो जाल्यार ताचे स गूण जातले. तशेंच झिम्बाब्वे आनी स्कॉटलॅण्ड हे पंगड हारचे अशी प्रार्थना लेगीत ताका करची पडटली. तशेंच नेट रन रेट हो फॅक्टर लेगीत ताचे खातीर म्हत्वाचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
