भांगरभूंय | प्रतिनिधी
आशिया करंड क्रिकेट सर्तींत आयज सुपर चारांत येजमान श्रीलंका आनी पाकिस्तान ह्या पंगडां मदीं मॅच जातली. जिखपी पंगड 17 सप्टेंबराक जावपी फायनलींत भारता आड खेळटलो.
फायनलींत सुवात मेळोवपाक दोनूय पंगड नेटाचो यत्न करतले. एके तरेन ही सेमी फायनलूच कशी आसा. दोनूय पंगडांचे दरेकी दोन गूण आसात. ताका लागून आयची मॅच नॉकआवट थारल्या. पाकिस्तानाचे खेळगडी दुखापती कडेन झुजतात. मुखेल फास्ट बॉलर हॅरीस राउफ आनी नसीम शाह हांचो आयचे मॅचींत खेळपा विशीं दुबाव आसा. तांचे सुवातेर शाहनवाज दहानी आनी जमान खान हांचो बॅकअप खेळगडे म्हणून पंगडांत आस्पाव केला. 22 वर्सां पिरायेचो जमान एका वराक 150 किलोमिटर वेगान बॉलींग घालपाक सक्षम आसा.
पाकिस्तान पंगडाचो हुस्को फकत जखमी खेळगड्यां मेरेन मर्यादीत ना. ताच्या बॅट्समनांक अजून मेरेन सर्तींत बरें प्रदर्शन करपाक जमूंक ना. पाकिस्तानान मुल्तानांत नेपाळा आड खेळटना 6 विकेटी वगडावन 342 धांवड्यो केल्ल्यो. पूण, ते उपरांत बॅट्समनांक व्हड खेळी करपाक जमूंक ना.
बॅटिंगेची भिस्त दोनूय ओपनर फखर जमां आनी इमाम उल हक आनी मुखेली बाबर आजम हांचेर आसा. आयज जैत जोडपा जाय जाल्यार मोहम्मद रिजवान आनी सलमान आगा सारक्या बॅट्समनांक म्हत्वाचें योगदान दिवचें पडटलें.
इफ्तिखार अहमदान नेपाळा आड आक्रमक बॅटींग करतना शेंकडो मारिल्लो. पूण, ताका आपल्या प्रदर्शनांत सातत्य राखपाची गरज आसा. पाकिस्ताना परस श्रीलंका घटमूट दिसता. बांगलादेशाक हारयल्या उपरांत श्रीलंका पंगडान भारताक घाम काडिल्लो. मुखेल खेळगड्यांचे गैरहाजेरेंत लेगीत श्रीलंका बरें प्रदर्शन करपाक सक्षम आसा.
जर पावसाक लागून मॅच रद्द करची पडली तर श्रीलंका पंगड फायनलींत पावतलो. पाकिस्तानाची नेट रन रेट सामकी बाबत आसा. ताका लागून मॅच पावसाक लागून रद्द करची पडली जाल्यार श्रीलंकेचो फायनलींत सुवात मेळोवपाचो मार्ग मेकळो जातलो.
सुपर चारांतल्यो दोन मॅची खेळ्ळ्या उपरांत पाकिस्तानाची नेट रन रेट -1.892 आसा, जाल्यार श्रीलंकेची नेट रन रेट -0.200 आसा.
मॅची खातीर आयोजकांनी राखीव दीस दवरूंक ना. ताका लागून पावसाक लागून मॅच जायना जाल्यार ताचो फायदो श्रीलंकेक जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
