भांगरभूंय | प्रतिनिधी
सऊद शकील (नाबाद 69) आनी आगा सलमान (नाबाद 61) हांच्या अर्द शेंकड्यां नेटार पाकिस्तानान पयले टॅस्टीच्या दुसऱ्या दिसाचो खेळ सोंप मेरेन 5 विकेटी वगडावन 221 धांवड्यो केल्यात. तरी पूण, तो 91 धांवड्यांनी फाटीं आसा.
श्रीलंकेचो पयलो डाव 312 धांवड्यांचेर सोंपयल्या उपरांत बॅटींगेक मैदानांत देंवपी पाकिस्तानाची सुरवात बरी जाली ना. गॉल आंतरराष्ट्रीय मैदानाचेर प्रभात जयसुर्यान मुखेली बाबर आझमा सयत तीन बॅट्समनांक तंबूंचो रस्तो दाखयलो.
पाकिस्तानाचो अर्दो पंगड 101 धांवड्यांचेर तंबूंत गेल्लो. पूण, शकील आनी सलमान हांणी डाव सांबाळून पाकिस्तानाक संकश्टांतल्यान भायर काडलो. दोगांयनी 70 परस चड स्ट्रायक रेटीन धांवड्यो केल्यो. दोगांयनी श्रीलंकेच्या बॉलरांचेर आपलो शेक दवरपाचो यत्न केलो.
शकीलान 69 बॉलांनी अर्द शेंकडो पुर्ण केलो. जाल्यार सलमानान 50 धांवड्यो करपाक 66 बॉल घेतले. ताचो 11 डावांतलो सवो थारलो जाल्यार सलमानान 15 डावांनी चवथो अर्द शेंकडो पुर्ण केलो. तशेंच दोगांयच्या नांवार दरेकी एक शेंकडो आसा.
दुसऱ्या दिसाचो खेळ सोंप मेरेन शकील-सलमानान 111 धांवड्यांची भागिदारी केल्या. ते पयलीं श्रीलंकेन दिसाची सुरवात 6 बाद 242 धांवड्यां वयल्यान केली. पयल्या दिसा नाबाद 94 धांवड्यांचेर आशिल्लो धनंजय डिसिल्वान आपलो 10वो शेंकडो पुर्ण केलो. पूण, ताका दुसरे वटेच्यान बरी साथ मेळूंक ना. श्रीलंकेन 282चेर आठ विकेटी वगडायल्या उपरांत डिसिल्वान व्हड शॉर्ट खेळपाचो यत्न केलो. पूण, बॉल डीप पॉयण्टाचेर उबो आशिल्ल्या शान मसुदान ताची कॅच धरली. विश्व फर्नांडो (नाबाद 21) आनी कसुन रजित (आठ) हांणी श्रीलंकेचो स्कोर 300च्या मुखार व्हेलो. ते उपरांत अबरार अहमदान रजिताक बाद करून श्रीलंकेचो डाव सोंपयलो.
अबरार, शाहीन आफ्रिदी आनी नसीम शाह हांणी दरेकी 3 विकेटी घेतल्यो. जाल्यार आगा सलमानान एक विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
