भांगरभूंय | प्रतिनिधी
अध्यक्षपदार रामनाथ शेटगांवकार
पेडणें: मोरजेच्या श्रीमोरजाई देवस्थान समितीच्या आतां मेरेनच्या इतिहासांत पयलेच फावट मतदान जावन वेंचणूक घेतली. हे वेंचणुकेंत रामनाथ वसंत शेटगांवकार हांणी मोरजे जिल्लो पंचायत वांगडी सतीश शेटगांवकार हांकां हारोवन अध्यक्षपद मेळयलें.
देवस्थान समितीच्या अध्यक्षपदाची वेंचणूक आतां मेरेनच्या इतिहासांत पयलेच फावट जाल्या. ह्या मतदानांत सगल्या महाजनांनी उमेदीन वाटो घेतलो. ही वेंचणूक शांतपणान जावची म्हणून तीन मामलेदार, पुलीस बंदोबस्त दवरिल्लो.
फाटल्या म्हयन्यांत राज्यभर देवस्थान समितीच्यो वेंचणुको जाल्यो. तेन्नाय श्रीमोरजाई देवस्थान समितीची वेंचणूक घेतिल्ली. मात वेंचणूक प्रक्रिया बेकायदेशीर असो दावो करून दुसर्या गटान आक्षेप घेतिल्लो. तशे तरेचो अहवाल मामलेदारांक धाडिल्लो. उपरांत मामलेदारान आदली वेंचणूक प्रक्रिया चुकीची आशिल्ल्यान २३ तारखेर महाजनांची बसका घेवन तातूंत वेंचणूक घेवपाचो आदेश दिल्लो. ते प्रमाण २३ मार्चाक देवळाच्या मंडपांत महाजनांची बसका जाली. हे बसकेंत अध्यक्ष पदा खातीर जिल्लो पंचायत वांगडी सतीश शेटगांवकार आनी रामनाथ वसंत शेटगांवकार हांचे दोन अर्ज आयिल्ल्यान मतदान पद्धतीन वेंचणूक जाली.
रामनाथ शेटगांवकार अध्यक्ष म्हणून जैतिवंत जाले. जाल्यार प्रकाश काळू शेटगांवकर बदली अध्यक्ष म्हणून वेंचून आयले.
वेंचणूक अधिकारी म्हणून संजय शेटगांवकार हांणी काम पळयलें.
वेंचून आयिल्ली हेर समिती
भांडारी : उत्तम शिवराम शेटगांवकार, सचीव : सुनील नानू शेटगांवकार, एटर्नी : देऊ गोपी शेटगांवकार
कळसोत्सव करपाचो यत्न करतलों
अध्यक्ष रामनाथ शेटगांवकार आनी प्रकाश काळू शेटगांवकार हांणी प्रतिक्रिया दितना सांगलें: सगळे महाजन आनी आमचे विस्वास दवरून, शांतपणान मतदान करून आमकां जैतिवंत केल्ले खातीर सगल्यांचे उपकार. फुडाराक मोरजाई देवीचो उत्सव मनोवपा खातीर फुडल्या वर्सा नेटान सुरवात करतले. हाका लागून सगल्या महाजनांक विस्वासांत घेवन फुडली प्रक्रिया पावसा उपरांत सुरू करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
