भांगरभूंय | प्रतिनिधी
ईमेल, वॉट्सअप आनी हेर समाजीक माध्यमां खातीर सोयऱ्या- दायऱ्यांक, आपल्या इश्टांक आनी बऱ्या मागप्यांक
पत्रां बरोवपाचें बंदूच जालां. कांय वर्सां आदीं दिशिल्लें की टपाल कार्यालयाक आतां कांयच अर्थ उरचो ना, तें तांच्या अर्थीक येवजण्यांच्या कामा पुरतेंच चालू उरतलें. पूण सरकारी कामकाजा खातीर आनी वेवसाया खातीर धाडपाक पडपी पत्रां आनी पार्सलां हे खातीर टपाल खात्यान तग धरलो. स्पीड पोस्टाचे सेवे खातीरय टपाल खात्या कडेन लोकांचे पांय वळपाक लागले आनी वळतूच आसात. आमकां (गोंयकारांक) टपाल खात्याचो पत्तो अचूक खबर आसा. देखून आमी वेळ व्हगडायनासतना थंय पावतात, पूण टपाल खात्यान गोंयांत महाराष्ट्रांतल्या उमेदवारांक पोस्टमॅन म्हूण भरपाक सुरवात केल्ल्यान ते आमच्या घरा कडल्यो वांटो चुकतात. तांचीय चूक ना. आमच्यो वांटो तांचे खातीर अनवळखी.
नोकरे खातीर कोणेंय खंयूय वच्चें. आमचे गोंयकार हेर राज्यांनी आनी विदेशांतय काम करतात. कित्याक तर त्या त्या राज्यांची आनी त्या- त्या देशांची ती गरज आसता. तांकां कामगारवर्ग जाय पडटा म्हूण ते हेर वाठारांतल्या लोकांक कामाक घेतात. पूण हांवें मांडला त्या मुद्द्याचे बाबतींत तशें ना आमचे कडेन पोस्टमॅन म्हूण काम करपाक इत्सा आशिल्ले उमेदवार आसात आनी ते त्या पदार कामूय करतात. पूण तांकां काडून उडोवन तांचेर अन्याय करप आनी कायद्यांतल्या एका कुसाच्या आदाराचेर हेर राज्यांतल्या उमेदवारांक घेवप हें चुकीचें. बरें तांकां ह्यो नोकऱ्यो मॅरिटाचेर मेळटात काय तांच्याच गांवचे लोक टपाल कार्यालयांत व्हडल्या- व्हडल्या पदांचेर आसतात, ते तांकां फावोर करतात हें कळपाक कठीण. पूण आमच्या तरणाट्यांचेर जेन्ना अन्याय जाता तेन्ना समाज तांचेर बोट दवरता आनी ‘गांवभाव’ होच नेम तांकां पावता अशे तरेन तिडक उक्तायतात.
अशी तिडक हालींच लोकांनी टपाल भरतीच्या वेळार उक्तायली आनी गोंयांतल्या फार्मास्युटिकल कंपनींनी हेर राज्यांतल्या कामगारांक गोंयांत नोकरी दिवपा खातीर जायरात दिली तेन्नाय उक्तायिल्ली. राजकी पक्षांनी हो मुद्दो गरम करतकच, ह्या कंपनींक भायल्या राज्यांत आयोजीत केल्ल्यो मुलाखती रद्द करच्यो पडल्यो. खाजगी मळार म्हूण हें घडून आयलें. पूण सरकाराच्यो फार्मास्युटिकल कंपनीं आशिल्ल्यो आनी भायल्या राज्यांतल्यान कामगारवर्ग हाडपाक कायद्यांत तरतूद बी करूंक अधिसुचोवणी काडिल्ली जाल्यार तें शक्य नाशिल्लें. लोक तिडक उक्तायत रावपाचे आनी हे वटेच्यान केन्ना भरती जाल्या तें लेगीत कळचें नाशिल्लें.
कांय वर्सां आदीं आमच्या गोंयकारांक नोकरे वयले काडून महाराष्ट्रांतल्या उमेदवारांक गोंयांत पोस्टमॅन म्हूण घेवपाचो प्रकार जालो. अशे प्रकार आतां जायत आसात आनी फाटल्या पांच वर्सांत महाराष्ट्रांतल्या सुमार 71 उमेदवारांक गोंयांत पोस्टमॅन म्हूण घेतल्यात. ह्या पदा खातीर मराठी आनी कोंकणी भास सक्तीची आसा. तशेंच गोंय आनी महाराष्ट्र हें एक ‘सर्कल’ आशिल्ल्यान आमच्या शेजारच्या राज्यांतल्या उमेदवारांक गोंयात रित्या आशिल्ल्या पदां खातीर नोकरेची परिक्षा दिवंक मेळटा. म्हणल्यार कायद्यान तांकां तशी मेकळीक दिल्या आनी जे मेरेन तसो कायदो आसा ते मेरेन तांकां घेवचे न्हय असो विरोधय कोण करपाक शकना.
फोंडेंच्या पोस्ट ऑफिसांतल्या अशा कांय तात्पुरत्या काळा खातीर सेवेक आशिल्ल्या गोंयकारांक कामा वेल्यान काडटकच, कांय राजकी पक्षांनी बोवाळ घाल्लो आनी केंद्रीय मंत्री श्रीपाद नायक हांकां लक्ष्य केल्लें. अचकीत बेकार जाल्ले हे तरणाटे वचून तांकां मेळ्ळे लेगीत, पूण तांकां परत कामाक घेतले नात. आयज तातूंतले कांय जाण फ्लिपकार्ट आनी अशा हेर आस्थापनांनी काम करतना दिसतात. घडये थोडे बेकारूय आसत. हे घडणुकेन तांचें डिमोशन केलें आनी तांकां गरजे भायलो मानसीक ताण दिलो.
हें सगळें बंद जातलें जाल्यार ‘नोकरी भरती नियम’ बदलचे पडटले. आतां ते बदलपाचें काम हें साद्या व्यक्तींचें न्हय. तर केंद्रीय मंत्री श्रीपाद नायक सारक्या सत्तेंत आशिल्ल्या खासदाराक घडये तें सोंपें जावंक शकता. गोंयचे लोक श्रीपाद नायक हांचे कडेन खूब मानान पळयतात. कारण तांचेर भ्रश्टाचाराचो, भानगडींचो, रोगंट वागपाचो, फटींगपणाचें एक पसून खत ना. वयल्यान गोंयांत भाजप पक्षाची बुन्याद घट करपाक आनी उपरांत पक्ष बळिश्ट करपाक तांचो मोलाचो वांटो आसा हें राजकारणाचो अभ्यास आशिल्लो आनी भाजपाचो कोणूय वांगडी सांगतलो. संस्कारी आनी विचारवंत, आदले प्रधानमंत्री अटलबिहारी वाजपेयी हांच्या मंत्रीमंडळांत श्रीपाद नायक हांकां सुवात मेळिल्ली. नरेंद्र मोदी हांच्याय मंत्रीमंडळांत सेगीत श्रीपाद नायक हांकां सुवात मेळ्ळ्या. कित्याक तर तांचे ‘गूण’ बरे आसात. ह्याच गुणांचो वापर करून तांणी गोंयच्या तरणाट्यांक न्याय मेळटलो हे खातीर आपलें योगदान दिवंक जाय आशिल्लें. अजून वेळ गेल्लो ना. तांणी आपलो अनमनपाचो सवभाव कुशीक दवरून आनी मात्शे कडक रावून ही मागणी केल्यार ती मंजूरय जायत. अशें जालें जाल्यार श्रीपाद नायक, जांकां गोंयकार मानान भाऊ म्हूण पाचारतात, त्या भाऊची सुवात गोंयच्या लोकांच्या काळजांत भक्कम उरतली. सासणाची. श्रीपादभाऊ हें गंभीरतायेन घेत? काय हेर राजकारण्यां भशेन तेवूय बी आस्वासनांच दीत आपली राजकी पोळी भाजून घेतले हें काळूच थारायतलो.
हे नोकर भरते खातीर फकत ‘कोंकणी’ भास सक्तीची केली जाल्यार हो प्रस्न सुटावो जावंक शकता. पूण तशे तरेन ‘वयर’ केंद्र सरकाराक समजावचें पडटलें. भायल्या राज्यांतले हे उमेदवार हांगां येवन आमचीं घरां सोदता सोदता वाट कशे शेणटात आनी पत्रां उसरां कशीं पावतात तें सांगचें पडटलें. आमचे थळावे तरणाटे वाट शेणनासतना कितले गतीन पत्रां हाडून दिवंक शकतात आनी टपाल खात्याचें नांव वयर काडूंक शकतात ताचें म्हत्व पटोवन दिवचें पडटलें. राजकारण्यांक अशे तरेन आपल्या पक्षांतल्या फुडाऱ्यांक आनी संबंदीत मंत्र्यांक ‘पटोवन’ दिवप व्हडलें कुस्तार न्हय, कित्याक तर भाऊ सारक्या इतलीं वर्सां राजकारणांत आशिल्ले व्यक्तीच्या उतराक मान मेळचो ना अशें जावंकच शकना. तांची मागणी फांफडून उडोवप म्हणल्यार तांणी दिल्ल्या योगदानाचो अपमान कसो आनी तो कोण केन्नाच करचो ना अशें एक गोंयकार म्हूण मनाक ओगीच दिसता. श्रीपादभाऊक ‘कम्युनिकेशन’ मंत्रालयाची वाट आनी पत्तो अचूक मेळटलो अशी आस्त धरुया.
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
